【愛情】如地下情一樣嘅癮，係我對你嘅定義: 104
陸修然坐喺隔離冇打擾佢做功課，一直到眼見黎昕淇將功課做好後先起身番房
「嘎—」櫈腳向後移動嘅時候發出一聲磨擦聲，黎昕淇抬起頭望向隔離企起身嘅人
黎昕淇起身行到房門前，輕力將虛掩嘅門推開，見到嘅係陸修然剛好坐低喺電腦前
「睇咩呀？」黎昕淇坐低喺床邊拎起手機
「唔知睇咩好。」陸修然搖搖頭，默默咁定睛望住黎昕淇
欲言又止嘅時候，察覺到被凝視住嘅黎昕淇默默抬頭，眼神裏充滿不解
「做咩⋯？」黎昕淇微微側頭，望住眼前難以看透嘅表情
「冇，只係攰。」陸修然收起情緒搖搖頭，將櫈轉向黎昕淇嘅方向，手靠喺扶手上托住下巴
「哦，好啦⋯」黎昕淇微微點頭，冇察覺到陸修然即使收起咗但仍然可以睇到嘅情緒
陸修然似笑非笑嘅表情引起黎昕淇注意，黎昕淇拎住手機嘅手垂低，手指輕戳陸修然嘅臉頰一下
「唔理我？」黎昕淇見佢冇咩反應，頓時眉頭一皺
「你就唔理我。」陸修然捉住黎昕淇嘅手腕，但冇將佢嘅手推開
「我宜家咪理緊你，平時喺學校嘛～」黎昕淇愣一下後嘴角微微上揚，指尖勾住佢嘅領結，「唔係咩？」
「係，你啱。」陸修然冇爭論嘅打算，順住黎昕淇嘅意思就好
黎昕淇鬆開手，雙腳往床上一縮，向後坐到近窗台嘅位置
見到佢嘅舉動，陸修然估到佢嘅意思一樣離開電腦椅坐到床上，直接向後瞓低喺床上
喺佢向後瞓嘅同時伸手捉住黎昕淇嘅手踭將佢往自己嘅懷裏拉，黎昕淇回神嘅瞬間已經喺佢嘅懷中被抱住
黎昕淇嘗試掙扎咁左右郁，不過抱住佢嘅人點會比佢得逞？陸修然冇絲毫改變主意嘅想法
黎昕淇見掙扎無效就冇再掙扎落去，默默靠喺佢懷中睇手機
差唔多到6點嘅時候，黎昕淇企喺玄關著鞋，手中攬住佢拎落嚟嘅功課
「拎齊嘢未？」陸修然回頭望一眼餐枱
「拎齊。」黎昕淇點點頭，「聽日見～」
「聽日見⋯」陸修然經過黎昕淇嘅身旁行去開門
一打開門，陸修然同黎昕淇都下意識咁愣咗一秒，陸媽媽企喺門前，手中拎住鎖匙準備開門
「媽。」「阿姨⋯」
「阿昕番去啦？」陸媽媽企喺門前，將手上嘅膠袋遞向陸修然
「係呀，做完功課番去啦⋯」黎昕淇乖巧咁點頭，然後踏一步行到門外
陸修然望向黎昕淇，兩人莫名心虛嘅對望顯得有啲唔自在
「下次叫你媽媽教我整嗰個拌菜，好好食～」陸媽媽對黎昕淇笑道
「好呀～」黎昕淇點點頭，目光不自覺就朝陸媽媽身後嘅陸修然望去
陸修然挑起眉，留心咁聽媽媽同黎昕淇講嘢，雖然內容佢唔太敢興趣⋯
「你仲企喺度？拎啲嘢入廚房啦⋯」陸媽媽忽然擰轉頭，見到陸修然仍然企喺佢身後嘅時候頓時輕皺起眉頭，「啲生果幫我放入雪櫃呀～」
「哦⋯」陸修然轉身離開玄關嘅位置行到廚房
黎昕淇凝視住陸修然嘅背影，喺陸媽媽轉頭嘅瞬間收回視線
「阿姨，咁我番去先啦。」黎昕淇微笑道
「好呀，下次見啦～」陸媽媽目送黎昕淇到𨋢口
閂咗門之後表情卻變得有啲複雜，停喺門前兩秒直接行到廚房
「你同阿昕，最近好似成日都一齊咁嘅？」陸媽媽企喺一邊幫手將膠袋入面嘅嘢拎出嚟
「最近？唔係呀，一直都係咁。」陸修然拎起兩個蘋果放入雪櫃嘅一邊
「係咩？之前都唔見你地成日一齊做功課⋯」陸媽媽道
陸修然稍微瞄咗媽媽一眼，然後聳肩示意冇意見要發表
「你地唔係一直話要保持距離㗎咩？」陸媽媽半信半疑咁望住拎起空袋嘅陸修然
「喺學校咪要，一直都係。」陸修然覺得莫名其妙，平時媽媽根本唔會提起呢啲嘢
母子兩人對望，陸修然隱隱約約咁察覺到有唔妥，警覺性立即提高
「你地⋯唔會係偷偷地拍拖，唔同我講呀嘛？」陸媽媽忽然拋出一句，陸修然嘅心緊縮咗一下
陸媽媽瞇起眼盯住陸修然，試圖從佢嘅眼神中打探出少許蛛絲馬跡，但陸修然冇咁輕易露出破綻
「冇，你諗多咗⋯」陸修然選擇咗否認佢同黎昕淇嘅關係
喺陸媽媽準備再講啲咩嘅時候，陸修然直接行出廚房以免呢個話題繼續落去
「我媽又會咁醒嘅⋯」陸修然喺心裏嘆氣同時不禁覺得佩服
陸修然行到番房，剛好見到手機螢幕亮起，拎起就見到黎昕淇嘅message：「阿姨有冇同你講咩？」
「佢又咁醒知道我媽有講啲咩⋯」陸修然無奈一笑，指尖喺螢幕嘅鍵盤上輕敲：「佢有察覺到，不過我冇認」
望住新嘅message，黎昕淇不禁眉頭一皺，本來唔錯嘅心情忽然間有一層陰霾覆蓋
「唔⋯」黎昕淇吸一口氣，微微鼓起兩泡腮
「仲以為你會認」
「以為你會講比阿姨聽」
「但如果阿姨再追問你會點答」
指尖喺鍵盤上來回輕敲，但最後又將打咗嘅字刪走，打完又刪
「呀⋯」黎昕淇拎住手機頹廢咁伏喺枱上，側住頭枕住手臂盯住手機嘅螢幕
陸修然眼見對方一直輸入中但又冇send任何嘢出嚟，主動先一步問出佢直覺認為嘅問題：「你唔係唔想比人知咩」
黎昕淇望住最新一個message，心情有啲矛盾，要比一個肯定嘅答案有啲困難
「冇特別」黎昕淇緩緩打咗幾個字就send出去
「感覺做咩咁奇怪⋯明明又唔係唔見得光嘅關係⋯」黎昕淇自己都忍唔住又一次嘆氣，「算啦，之後先再同媽咪講⋯」
IG Link: https://www.instagram.com/nd_cotttoncandy/?hl=zh-tw