【愛情】如地下情一樣嘅癮，係我對你嘅定義: 102
「餐牌。」江清懿拎起兩份餐牌，其中一份放喺兩個女仔面前
「樂時，餐牌。」張詩楠將餐牌放到鍾樂時面前，眼見鍾樂時冇反應，伸手喺佢面前揮兩下，「樂時？發咩呆呀？」
「哦⋯唔該⋯」鍾樂時眨一下眼，回神見到放咗喺面前嘅餐牌，即刻拎起餐牌睇
鍾樂時最近嘅心情都冇特別好，反而有啲鬱悶，番到屋企一齊匿喺房直到夜晚食飯先行出廳一陣
「樂時食咩呀？」張詩楠過咗一陣問鍾樂時
「呀？我未睇⋯」鍾樂時一臉愕然，佢想回想起自己啱啱到底諗緊啲咩，不過似乎啱啱嗰段記憶係空白，「C餐啦。」
最近都一直處於呢種突然發呆嘅狀態，雖然唔太肯定原因，但鍾樂時大概都估到令自己有啲呆同鬱悶嘅起因
食完飯番學校嘅路上，鍾樂時睇起嚟又已經回復原狀，同其他人有講有笑
「食唔食雪糕？前面嗰間超平，12蚊四球！」「食囉⋯但你要一個人食四球？」
後方傳嚟嘅談話聲令鍾樂時不禁回頭望一眼，本來已經收回視線嘅佢又忍唔住再望多一眼
「哦～係黎昕呀～」張詩楠見鍾樂時一直回頭，於是跟住佢一齊望後對黎昕淇揮揮手
鍾樂時同江清懿嘅視線對上，鍾樂時瞬間撇開臉，呢個反應令江清懿困惑咗一秒
放學嘅時候蘇序然去咗補課，黎昕淇同宋楚妍兩個女仔趕住去食茶點一樣匆忙離開，只剩低江清懿一個人自己搭車番屋企
「幫我去超市買嘢」江清懿望住媽媽send比佢嘅購物清單，本來向地鐵站行緊嘅佢180度轉身朝巴士站行去
江清懿企喺站牌前等巴士嚟到，餘光出現一個女仔嘅身影企喺佢隔離，江清懿望咗一眼但冇理會，對方亦冇特別反應
「你做咩唔理我？」企喺隔離嘅人先開口問
「你睇起嚟冇想理我呀。」江清懿輕嘆一口氣後回答
「我、我冇呀。」鍾樂時比人戳破佢嘅心思，心入面慌張但又唔可以咁明顯咁表露出嚟，「你今日做咩搭巴士？」
「你唔係都係等緊巴士？」江清懿望向鍾樂時，將佢上而下打量一番後反問
「你唔準反問我，宜家我問緊你！」鍾樂時不悅咁皺起眉頭，「你理得我搭咩車啫！你做咩搭巴士⋯？」
「幫我媽去超市買嘢。」江清懿望住鍾樂時嗰個大小姐一樣嘅脾氣，只好無奈咁回答
「哦。」鍾樂時不感興趣一樣點一下頭，知道咗佢想知嘅嘢就冇再問嘢
巴士緩緩駛到車站停低開門，江清懿行喺前面上車行到上層，搵咗個空位坐低
鍾樂時行到上層，眼睛一直搵緊江清懿坐嘅位置，見到後直接行過去坐到靠窗嘅位置
江清懿轉身向走廊比鍾樂時先行入去
「佢做咩都唔問我一唔一齊去㗎⋯」鍾樂時嘅餘光留意住一直冇理佢嘅江清懿，「不過佢都冇真係問我嘅必要⋯」
鍾樂時撇開臉望向車窗外，安靜落嚟嘅佢睇起嚟同平時大大咧咧嘅佢完全係兩個人，略帶點憂鬱嘅表情，雙眸亦唔似平時一樣明亮
江清懿悄然探頭望咗一眼，嘴唇微微張開想講嘅咩嘅時候又默默咁合上，咩都冇講坐番好
落車嘅時候，江清懿行喺前面，鍾樂時一落車就扁住嘴跟喺江清懿身後，加快步伐跟住佢，怕只要行慢啲就會比江清懿掉低一樣
鍾樂時追上前拉住江清懿，江清懿見到前面就有同學嘅學生迎面行嚟
「男女授受不親，你唔好咁樣拉住我啦⋯」江清懿頓時將手抽番出嚟
「有咩授受不親啫，你清朝人嚟㗎？」鍾樂時嘅心情本來已經唔太好，宜家就更加唔好
「啱啱有學校嘅人行過，比人見到又唔知會比人亂傳啲咩。」江清懿一臉嚴肅，佢唔想比機會人地傳出唔正確嘅嘢，「你唔知你地學生會幾受人矚目？」
「就算係都冇所謂啦，又唔係真係有咩關係⋯」鍾樂時有故意將聲量收細，但又確保係江清懿聽到嘅聲量
江清懿頓時停咗落嚟，擰轉頭望向鍾樂時，嘴微張但又欲言又止，最後將所有想講嘅變成一個沉重嘅嘆氣聲
鍾樂時覺得自己嘅意思已經表達得好明顯，但睇起嚟，江清懿嘅意思更明顯⋯
「唔好咁任性。」江清懿認真道，聽起嚟刺耳但卻無言反駁
「我冇⋯」鍾樂時提手用力拉住江清懿嘅手腕，「我點解係任性？你唔可以向好嗰邊諗，覺得我好勇敢㗎咩？」
江清懿比鍾樂時呢句說話逗笑，微微點頭：「多謝你嘅勇敢，不過—」
「唔想聽！」鍾樂時喺後半句要講出嚟嘅時候及時打斷，佢喺心入面清楚，後半句會係咩說話，「唔想知⋯」
江清懿有啲無奈，佢都唔太理解鍾樂時到底諗緊咩，係唔係喺一件冇結果嘅事上勇敢嘗試，所以更顯得佢勇敢？定咁樣算係明知故犯⋯？
「你以後會後悔⋯」鍾樂時低聲講咗一句，鬆開手轉身：「我番去先啦。」
鍾樂時冇比時間江清懿回答，直接就小跑起嚟朝屋企嘅方向跑去
鍾安而行出客廳嘅時候剛好見到鍾樂時開門行入屋，但只有鍾樂時一人：「得你嘅？江清懿呢？你地唔係一齊去買嘢？」
「哦⋯係呀～」鍾樂時愣一下後笑了笑，「不過我冇去，唔想幫佢拎嘢～」
「佢都唔會叫你幫佢拎嘢啦。」鍾安而笑道
鍾樂時番房換完衫再行出嚟嘅時候，見到鍾安而已經坐咗喺梳化，手上拎住罐汽水
鍾樂時一下子坐低喺鍾安而嘅身旁，貼住喺鍾安而嘅身邊坐，臉頰靠喺鍾安而嘅膊頭上，拎住手機望住電視嘅反射發呆
「唉⋯」鍾樂時不禁嘆氣，「哥哥呀⋯點解我地嘅情路咁坎坷？」
「我冇坎坷⋯」鍾安而無奈一笑，「你中意邊個咁坎坷？」
「呵呵～唔話你知～」鍾樂時搖搖頭，伸手挽住鍾安而嘅手，「唔同你講，反正唔係你～」
「我都知。」鍾安而帶住淡淡嘅微笑點一下頭
IG Link: https://www.instagram.com/nd_cotttoncandy/?hl=zh-tw