【愛情】如地下情一樣嘅癮，係我對你嘅定義: 99.
「嗯？」黎昕淇感覺到落喺膊頭上嘅重力，於是望向鍾樂時，鍾樂時只係笑一笑
陸修然故意咁用鞋頭輕輕踢咗黎昕淇嘅皮鞋邊一下，黎昕淇無奈一笑，完全明白呢一下刻意背後嘅意思
下一秒，陸修然起身將手機放入褲袋，繞過黎昕淇同鍾樂時朝會室門口行去
「去邊？」黎昕淇喺陸修然行到佢身後嘅時候回頭問道
「廁所。」陸修然回答，喺其他人面前，佢仍然會保持距離
鍾樂時聽到門閂上嘅聲音就坐好起嚟，然後定睛凝視黎昕淇兩秒：「你宜家放學係唔係直接走？同江清懿一齊。」
「哦係呀。」黎昕淇微微點頭
「宜家星期六，你係咪都係同江清懿一齊番工呀？」鍾樂時稍作思考後道
「係呀，我地都係報星期六嘅更期。」黎昕淇回答
「唔⋯黎昕你知唔知⋯江清懿喺班上面，有冇中意邊個⋯？」鍾樂時輕抿唇，吞吞吐吐咁開口問黎昕淇
「冇聽佢講過。」黎昕淇輕皺一下眉頭，平時佢地好少講呢啲事，「就算有，佢都唔會特登同我地講。」
「嗯⋯」鍾樂時打聽唔成功，心入面有啲失望，本來以為黎昕淇會知道啲咩，但似乎事實並唔係咁樣
「你去問佢唔係仲快仲簡單咩？」黎昕淇不禁困惑，「你地日日都見到。」
「我問佢嘅話佢一定一定唔會同我講啦⋯」鍾樂時扁起嘴灰心道
「但你想知嘛，你開口問嘅話可能佢會同你講呢。」黎昕淇道，「但做咩突然問起呢樣嘢？」
「唔⋯冇呀⋯就係隨便問問⋯」鍾樂時伏低喺枱上，怕黎昕淇太醒目睇穿佢嘅心思，「好羨慕，你同會長，唔知羨慕邊個好⋯」
黎昕淇嘅嘴角微微上揚，呢句說話喺黎昕淇耳中聽起嚟都唔算意外，其他人望向佢地嘅時都係羨慕嘅眼神
「我都想係青梅竹馬，睇起嚟好似容易啲有機會⋯」鍾樂時將呢個想法連同所有情愫都收喺心底，「就算佢知道，都唔可能有機會⋯」
「叩叩—」陸修然敲門後推門行入會室，鍾樂時頓時坐好
「你今日著長袖冷衫嘅？」黎昕淇仰起頭嘅時候，陸修然剛好行到佢嘅身後，「最近見你成日都著住。」
「今日咁涼，你做咩唔著冷衫？」陸修然拉一拉自己嘅冷衫後反問黎昕淇
「我有帶，只係冇著，唔中意著冷衫。」黎昕淇嘅眉頭輕皺一下
「宜家你地都識光明正大咁餵我食狗糧啦⋯」鍾樂時托住頭望住兩人，「有冇諗過我嘅感受⋯？」
「你都知啦，咁冇所謂。」陸修然拉開櫈坐低喺佢嘅主席位
「有所謂呀，我唔係打算過嚟食狗糧㗎汪汪⋯」鍾樂時嘆氣道，「連你地都恰我⋯」
「邊個恰你？」黎昕淇聽到後不禁輕笑一聲
「唉～冇⋯」鍾樂時又嘆氣，腦海中都係諗緊同江清懿有關嘅事
放學嘅時候，黎昕淇同宋楚妍佢地一齊行，宋楚妍同蘇序然一前一後咁行都可以鬥到氣
「蘇序然你係唔係啱啱冇食飯呀⋯樽蓋都開唔到⋯」宋楚妍毫不掩飾佢嘅嫌棄，望住蘇序然點擰都開唔到樽蓋
「你自己都擰唔到啦！你都係叫我幫你開咋嘛！」蘇序然不留情面直接對宋楚妍反咗個白眼
黎昕淇不經意咁回頭望一眼，見到陸修然同莫淮禮喺離佢不遠嘅位置後就收回視線
兩人約好咗喺大堂等，黎昕淇先一步番到屋企樓下，喺行入大堂前拎出手機望一望時間
搭遲一班車嘅陸修然一行出地鐵站，就大步朝住屋企樓下嘅大堂入口行去
行到離大堂唔遠嘅位置見到黎昕淇企喺度，連忙加快腳步小跑過去
「你唔喺大堂入面等我？」陸修然行到黎昕淇嘅面前時第一個反應係拉起黎昕淇嘅手，冰涼嘅感覺從手心傳嚟，將佢嘅溫暖蓋過
「你都係遲一班車啫，都好快。」黎昕淇回握住陸修然嘅手，轉身去拍卡開門，「都唔係等咗好耐。」
「你有帶冷衫又唔著。」陸修然皺住眉頭將黎昕淇由上而下打量一番，「今日咁涼都唔著冷衫⋯」
「唔中意著冷衫。」黎昕淇輕哼一聲
陸修然行喺前面行入𨋢，拉咗黎昕淇一下將佢拉近到自己面前，黎昕淇微微抬起頭定睛望住陸修然
𨋢門緩緩閂上，鏡面反映兩人嘅身影，陸修然提手輕放喺黎昕淇嘅臉頰上將佢嘅臉微微捧起
暖意從臉頰傳嚟，黎昕淇乖乖抬頭，陸修然高大嘅身影將佢覆蓋，輕輕合上眼後感受住落喺唇上嘅觸感同溫熱，體溫上嘅互補聽起嚟羞澀又溫馨
一行出𨋢，陸修然嘅步速明顯咁加快，佢拖住黎昕淇大步走向屋企門口，一推開門，黎昕淇就比陸修然一手捉住拉入屋
陸修然將書包放喺一旁，一個轉身就將黎昕淇攬住，黎昕淇立馬用手掩住陸修然嘅嘴
「嗯？」陸修然不解咁輕皺起眉頭
「一陣，做完功課先。」黎昕淇認真咁搖頭
「嗯。」陸修然知自己拗唔過黎昕淇而無奈點頭
兩人坐喺餐枱前，枱上擺咗要做嘅功課，手拎住原子筆，頭微微耷低；客廳好安靜，只有自然嘅呼吸聲同紙筆磨擦嘅聲音，一旦開始認真工作同思考就會變得心無雜念
「呼⋯」黎昕淇輕呼一口氣，往後靠到櫈背上，目光落喺坐喺對面嘅陸修然身上，「睇起嚟都唔係真係咁唔一樣⋯」
就算想深究原因，好似每一個都係觸發點，根本唔知道要由邊度開始講起
如果感情可以控制，係唔係唔會有咁多人為情所困，為咗一份唔知有冇理想結果嘅感情而茶飯不思？
「會長。」黎昕淇靠住櫈背定睛望住陸修然，手中拎住嘅原子筆輕輕戳喺枱面
「放咗學啦。」陸修然冇抬頭，手仍然一直寫緊字，平靜咁提醒黎昕淇
「都一樣唔係咩⋯」黎昕淇無奈道
「你叫我做咩？」陸修然輕嘆一口氣後回應
「冇咩，就係想叫下你。」黎昕淇聳肩，坐好拎起原子筆繼續寫佢未做完嘅英文作文
「嗯。」陸修然無奈一笑後抬眼望黎昕淇
IG Link: https://www.instagram.com/nd_cotttoncandy/?hl=zh-tw