【愛情】如地下情一樣嘅癮，係我對你嘅定義: 95.

「叮噹叮噹⋯叮噹叮噹～」

鄭洛苡拎起枱面嘅書抱喺懷中向locker嘅方向行去，打開locker微微踮起腳將書放入locker

「上完堂～幾時先食飯⋯」鄭洛苡閂上locker門嘅同時輕嘆一口氣，「去個toilet先～」

鄭洛苡行到課室門口，鍾安而剛好行番嚟，兩人企喺門前想讓開比對方行先，但無論行左定右都係擋住咗對方嘅去路

「唔好意思～」「唔好意思⋯」





鄭洛苡尷尬微笑同時鍾安而亦道，鍾安而向右方行一步同時，鄭洛苡向左邊行一步，兩人見到又企番喺眼前嘅人時都呆咗一下

「你兩個咁有默契嘅？」喺隔離嘅周晟祐打量兩人，想開佢地嘅玩笑

鄭洛苡同鍾安而同步咁望向周晟祐，同步率高到周晟祐都愣咗一下

「我講一句啫，你地唔好咁有默契啦⋯」周晟祐搖搖頭，然後從鄭洛苡嘅身旁側側身行入課室

鄭洛苡同鍾安而對望一眼，鄭洛苡側一側身，今次終於係喺另一方向可以行出課室





周晟祐企喺黑板前面等埋鍾安而，一回頭就見到兩人一出一入，周晟祐又有啲想開玩笑嘅想法

「捨得行入課室啦？」周晟祐等鍾安而差唔多行到佢隔離嘅時候低聲道

「你好無聊⋯」鍾安而拍一下周晟祐嘅膊頭

「你地嘅進展好慢⋯」周晟祐失望咁嘆氣

「令你失望真係唔好意思。」鍾安而語氣平靜，嘴角滲出一絲笑意





「你就唔可以勇敢啲？」周晟祐皺起眉頭，嚴肅咁對鍾安而道

「你趕時間？」鍾安而拉開櫈坐低，將眼鏡除落嚟放喺枱上

「我唔趕呀，我趕緊你嗰份咋！」周晟祐睇起嚟比鍾安而更加心急，見到鍾安而同鄭洛苡一直都冇進展，搞到佢都緊張起嚟，「你係唔係中意人㗎⋯！連會長都有緋聞啦，你都未有進展⋯唔好同我講你打算畢業先再算⋯」

「我都唔趕，你咁趕做咩？早一齊又唔代表啲咩。」鍾安而仍然一臉淡定

「你好有把握？」周晟祐半信半疑咁輕皺起眉頭

「我唔做冇把握嘅事。」鍾安而微微一笑，笑容透露出佢嘅自信

「我都真係服咗你⋯」周晟祐聽到後直接反白眼

佢雖然都緊張，但都想快啲睇到結果，點知鍾安而完全唔急，兩人嘅關係一直拖嚟拖去就係冇拖到手⋯





⋯

放學嘅時候

鍾樂時喺行出地鐵站前，早就見到江清懿喺佢前面，同朋友分別之後，鍾樂時即刻跑上前

「喂！」鍾樂時從後跑上去，伸手挽住江清懿嘅手臂，「咁啱呀？番屋企呀？」

「唔番屋企唔通番學校⋯」江清懿無奈同時將手從鍾樂時嘅手中抽出嚟

鍾樂時嘅手懸喺半空，心跳喺啱啱開始已經有啲快；雖然估到江清懿會抽手，但見到後都會有啲鬱悶，悶悶嘅感覺喺胸口凝聚起嚟

「我都番屋企～」鍾樂時收起情緒露出笑容





喺正前方有一個中年男人拖住一隻金毛尋回犬迎面行嚟，怕狗嘅鍾樂時頓時往江清懿嘅身後避，又一次伸手挽住江清懿嘅手臂

「金毛尋回犬好乖，你咁都驚⋯」江清懿瞄咗一眼喺眼前嘅狗，不過今次佢冇將手抽出嚟，由得鍾樂時挽住佢嘅手臂

狗行得愈近，鍾樂時捉住江清懿嘅手就愈用力；狗主似乎發現到鍾樂時怕狗，有意控制狗靠近路邊行

狗行遠之後，鍾樂時都冇鬆手，江清懿唔主動抽手佢就一直挽住

「係唔係只要咁樣就可以偷偷地靠近少少⋯？」鍾樂時不禁諗道，「就算係兄妹又點，都冇血緣⋯」

「狗行遠咗啦鍾小姐。」江清懿回頭望咗一眼，見到狗主同狗遠去嘅身影後道

「哦⋯」鍾樂時回頭望一眼，但手仍然捉住江清懿

江清懿低頭，目光落喺將佢手臂緊緊抱住嘅手上，白嫩嘅手用力捏住佢嘅手臂，明明狗都已經行遠咗





「冇抽手⋯」鍾樂時見江清懿冇抽手，手就一直挽住，目光一直偷偷落喺江清懿身上

江清懿一有小舉動，鍾樂時即刻將視線收回當冇事發生

「做咩一直偷望我？」江清懿嘅餘光有留意到，緩緩開口問道

「我？我冇呀～」鍾樂時瞪大眼搖搖頭，「我做咩要望你？」

「點知你。」江清懿回答

企喺大堂等𨋢嘅時候，鍾樂時一直偷偷打量江清懿，江清懿生得高、比例好睇，所以著咩衫都好睇

雖然話同一屋簷下，但係冇實際上咁方便，畢竟呢個秘密係不能說的秘密，比人知道嘅話會引起不必要嘅麻煩





喺佢地啱啱開始一齊住嘅時候，江清懿好少行出房，說話都比較少，多數都係佢主動去開江清懿嘅房門，喺氣氛尷尬嘅時候都係鍾樂時去調和

「已經唔太記得係邊一刻起察覺到嗰份好感存在⋯」

「可能係由認真望嘅第一眼開始，呢種感覺已經喺心底萌芽⋯」

「明明唔可以面紅心跳，但係都係會忍唔住，係唔係我太反叛⋯？」

「但就算比佢知道都好，佢唔會答應⋯一定唔會⋯知都唔可以比佢知，要收起到幾時⋯？」

「仲呆企喺度做咩？」江清懿㩒住開門等鍾樂時

「嚟啦嚟啦！」鍾樂時一秒回神行入𨋢，企喺江清懿嘅對面

江清懿企喺一邊低頭睇手機，冇將太多嘅注意力落喺鍾樂時嘅身上，不過餘光有留意到有人一直偷瞄佢




IG Link: https://www.instagram.com/nd_cotttoncandy/?hl=zh-tw