【愛情】如地下情一樣嘅癮，係我對你嘅定義: 88.
「嘻，原來你嘅瞳孔係好明顯嘅啡色～」鍾樂時笑着，喺同江清懿隔咗少許距離嘅位置坐好
心跳嘅餘韻仍然從心臟擴散緊，但鍾樂時心底裏好清楚，唔係所有感情都可以拎出嚟講，有啲事講到嘴邊嘅時候，就要轉移話題避免多言
「我地唔可能再有進一步嘅關係⋯」鍾樂時好清楚呢一點，「只可以維持現狀⋯」
鍾樂時喺自己面紅之前匆忙起身番房，留低只係覺得莫名其妙嘅江清懿喺客廳
江清懿冇諗太多，耷低頭又繼續睇手機，佢本來對鍾樂時就冇其他嘅想法，更加唔會有跨過界線嘅念頭
「好似落荒而逃⋯」鍾樂時企喺房門後垂低頭苦笑
⋯
最近喺學校，只要黎昕淇同陸修然一齊，總會聽到有人喺背後講佢地，一直有目光注視住佢地
「佢地又一齊，應該係學生會有嘢做？」
「如果真係拍拖嘅話都唔差，佢地睇起嚟都幾合襯呀～」
「算唔算係有正當理由一齊？畢竟都係學生會成員。」
「係唔係真係一齊咗㗎？人地又冇承認⋯」
「會長真係有女朋友啦？突然間覺得好失落⋯」
傳言滿天飛，但兩人唔承認嘅話其他人就只可以維持喺估嘅階段
「你同黎昕到底有冇拍拖？」忍咗好幾日嘅莫淮禮最終都係忍唔住問出口，「我早幾日已經想問你，不過唔好意思咁解⋯所以到底有冇一齊？」
「唔係好明顯？」陸修然反問莫淮禮，「以為你唔洗問我都會睇得出。」
「會長你唔好喺度賣關子⋯直接答我唔該⋯」莫淮禮反咗個白眼，「你同黎昕係拍緊拖定唔係拍緊拖？」
「唔係。」「真係唔係？」
「我答唔係你又唔信，咁我答唔答你有咩分別？」陸修然更無奈，答案一出嚟，莫淮禮已經因為唔信而追問
黎昕淇喺課室行出嚟，朝兩人迎面而來，陸修然同黎昕淇對望一眼，莫淮禮喺半秒後先望兩人一眼
其實佢地同平時一樣，喺學校嘅相處模式冇改變，只不過係其他人強制製造幻想出嚟，將自己心中想要嘅答案套喺兩人身上
陸修然同莫淮禮坐喺小食部嘅一角食嘢，陸修然拎住嘢飲，另一隻手拎住手機，佢嘅視線一直落喺手機上，反而莫淮禮一直聽緊後面幾個女仔講緊嘅嘢
「其實我覺得文書都幾靚啦，又高又瘦又靚，脾氣感覺上都幾好，仲想點？」
「雖然係啫，但配會長嘅話好似又唔係真係咁好⋯會長睇起嚟太完美啦⋯！」
「你又暗戀會長呀？人地可能近水樓台呢～不過我覺得喺學校嚟講，文書佢都算幾唔錯㗎啦，恨唔嚟。」
「好想知到底係有一齊定冇一齊～但如果係刻意隱瞞嘅話又好難知道⋯」
「上次嗰幾個師姐唔係話去問咗會長咩？會長話冇呀嘛～」
「你唔比人刻意隱瞞㗎咩？」
「唔好妒忌人地文書啦～就算冇一齊，你都冇機會㗎啦～」
「嗯，我都係咁話。」陸修然當然有聽到佢地講嘅嘢，喺心入面點點頭
聽到呢度，佢覺得冇咩必要再聽落去，拎住飲完嘅空盒起身：「行啦，番上去啦。」
「唔知道—」「噓噓噓⋯！唔好講啦⋯！會長會長⋯！」
幾個女仔顯然地有啲慌張，佢地講嘅嘢的同佢地諗到嘅狀況一樣，陸修然完全聽到晒
陸修然望住佢地臉上嘅不知所措，微微點一下頭就同莫淮禮轉身走；莫淮禮喺走嘅時候擰轉頭望咗一眼，幾個女仔低聲竊竊私語
「佢地都講得幾細聲，好似特登講比你聽咁⋯」莫淮禮無奈咁笑，「宜家啲女仔真係⋯」
「由得佢地講啦，佢地中意點諗就點諗啦。」陸修然隨意聳肩，「我冇咩所謂。」
食完午飯之後，黎昕淇行到會室門口推開入去，一入去就見到陸修然坐喺窗邊嘅位置，睇起嚟心情唔錯，有啲愉悅
「心情做咩咁好？」黎昕淇行到陸修然隔離嘅位置拉櫈坐低
「我？冇特別好，同平時差唔多。」陸修然搖搖頭，坐喺電腦椅上左右微微轉動，「小息嘅時候聽到有幾個女仔講緊我地。」
「哦，唔意外。」黎昕淇嘅反應好平靜，佢都已經預計到最近一定有人講
「人地讚你又高又瘦又靚。」陸修然將黎昕淇坐嘅櫈拉到更近自己嘅距離
「多謝，呢個係事實。」黎昕淇對自己向來有自信
「不過佢地話我太完美，你配我嘅話又唔太好。」陸修然湊近黎昕淇耳邊細聲道，偷偷留意黎昕淇嘅表情
黎昕淇聽到後緩緩回頭望向陸修然，托住下巴同時，嘴角露出一絲淡淡嘅笑意：「會長覺得呢？」
「唔⋯」陸修然假裝沉思，靈機一動後嘅笑容有啲意味深長，「放學再話你知。」
「正經啲得唔得？」黎昕淇皺起眉頭，喺陸修然嘅手臂上搣咗一下
另一邊廂喺課室，宋楚妍、蘇序然同江清懿坐埋一齊，但三人各自睇手機，完全冇溝通嘅打算
「又講啦⋯」蘇序然聽到離佢地唔遠嘅幾個女仔又喺度討論緊黎昕淇，「日日都要討論啲冇結論嘅嘢⋯你個friend呀宋楚妍。」
「咩呀？想知嘅直接去問黎昕。」宋楚妍敷衍回答，「不過黎昕就話冇。」
「你完全信晒佢？可能佢講大話呃你呢～」蘇序然道
「佢唔會呃我㗎！」宋楚妍肯定道，「黎昕冇同我講大話嘅必要呀～所以我100%信任佢～」
宋楚妍口係咁講，不過心入面都會忍唔住諗黎昕淇會唔會對佢講大話，諗深一層覺得冇必要，諗多一陣又覺得有機會
「唉～」宋楚妍不禁嘆氣，「我都好想知呀～江清懿知唔知？」
「我點會知？」江清懿臉上寫滿不解，「我同黎昕唔會講呢啲。」
「你地唔係一齊番工㗎咩？」蘇序然自己都有啲想知
IG Link: https://www.instagram.com/nd_cotttoncandy/?hl=zh-tw