【愛情】如地下情一樣嘅癮，係我對你嘅定義: 82.
「你做咩仲坐喺度？」江清懿托住下巴望住鍾樂時
「好悶。」鍾樂時雙手撐喺床、仰起頭，一臉悠閒，「你睇緊咩？」
鍾樂時往書枱嘅方向平移過去，坐喺離電腦更近嘅地方
「打機嘢嚟。」江清懿本來靠喺右邊嘅扶手上托住頭，喺鍾樂時坐過嚟之後佢就移向左邊嘅扶手，轉成左手托住頭，「你唔番房？」
「唔番去住，係咪安靜坐喺度都唔可以？」鍾樂時反問道，聽佢質問一樣嘅語氣，就知道佢係比屋企嘅寵愛下長大嘅孩子
「得～你想坐幾耐都得～」江清懿怕咗鍾樂時，面對鍾樂時，佢多數都會讓步
鍾樂時得意咁抬起下巴表示佢嘅勝利，佢望住江清懿嘅側臉，又默默咁垂眸，一直捏自己嘅手指
「你知唔知鍾安而係咪有中意嘅人？」鍾樂時朝房門口望咗一眼，上身前傾，擺出好奇想知嘅表情問道
「唔知。」江清懿眼珠一轉，佢選擇咗幫鍾安而將呢件事隱瞞落嚟，「佢有咩？」
「我上次見佢同女仔傾計，仲同個女仔一齊番學！」鍾樂時一臉激動，但又要將聲線壓住
「係咩？」江清懿笑咗一笑，「都唔出奇啦，佢咁受歡迎。」
「我哥咁受歡迎，點解你唔係？」鍾樂時一臉認真咁望住江清懿，清澈純真嘅眼神令人想嬲都嬲唔落
「點知，唔係同一個阿爸阿媽生掛。」江清懿以唔在乎嘅語氣講道
「咁⋯你有冇中意邊個？」鍾樂時收起剛才雙眸中嘅清澈純真，微微側住頭問
問出口嘅時候，心跳加快啦；喺等待答案嘅時候，心跳更快啦⋯
「吓？我？冇喎。」江清懿連猶疑嘅心都冇，直接回答問題
「哦～我仲以為你有添～」鍾樂時露出笑容，壓喺心頭嘅大石終於一下推開咗，「原來你冇呀？」
「我就算有都唔會同你講啦係咪～」江清懿嘅視線緩緩從電腦移到鍾樂時身上
「我好可信，唔會講出去㗎～」鍾樂時愣咗一愣
「宜家冇啦～」江清懿笑道
鍾樂時垂頭收起自己嘅微表情，想知道江清懿中意邊個，但佢唔講嘅話就只可以自己思前想後猜測
⋯
曖昧嘅聲音同空氣佈滿睡房嘅每一個角落，今日嘅吻感覺起嚟比平日又熾熱咗一倍，感覺渾身發熱
「哈⋯哈⋯」陸修然將微喘住氣嘅黎昕淇抱起放到床上
黎昕淇鬆開拉住陸修然冷衫衫袖嘅手，往近窗台嘅位置坐後啲；陸修然嘅左腳跪喺床上右腳踩喺地上，一手攬過黎昕淇嘅腰將佢抱到自己面前拉近距離
氣都未順得切又繼續，喉嚨冇一刻乾涸落嚟，眼底都因為換唔切氣而有一層薄薄嘅水氣
陸修然俯身落去，左手撐住喺床上；黎昕淇伸手攬住陸修然嘅頸，手心傳嚟嘅溫度都分唔清係屬於佢自己定陸修然
身上著住長䄂冷衫令熱力一直積聚，成個人都散發緊熱力
「好熱⋯」陸修然鬆開黎昕淇，因為熱而臉紅嘅佢將長䄂冷衫一下子除咗落嚟
喺佢面前嘅黎昕淇睇到覺得面紅耳熱，白色裇衫睇起嚟更有致命嘅吸引性，喺呢個時候除衫會令人諗到唔應該諗嘅事⋯
「諗咩？」陸修然將冷衫隨手就掉到櫈上，一回頭就見到黎昕淇定睛望住佢
「冇⋯」黎昕淇搖搖頭，調整好坐姿跪坐喺床上，左手㩒喺床上作支撐點，伸出右手捉住陸修然嘅呔，「除個冷衫都除太慢啦⋯」
「真係唔好意思，已經盡快⋯」陸修然唔洗黎昕淇出力拉佢，佢已經自動番到黎昕淇面前
陸修然嘅手放喺呔嘅領結上，黎昕淇嘅手從呔嘅背面將領結扣住，陸修然嘅手往下拉將校呔拉鬆
黎昕淇雙手環抱住陸修然嘅頸，飢渴難耐嘅感覺一湧而出，急不及待將吻送出
「唔⋯！」黎昕淇比陸修然稍微一壓就往後瞓低喺床上，陸修然嘅手放喺黎昕淇嘅後尾枕將佢嘅頭護住，直到佢安全著陸喺床上
兩人帶住泛紅嘅臉頰同微喘嘅狀態對望着，黎昕淇輕抿一下唇，伸手捉住陸修然嘅校呔輕輕拉咗一下示意繼續
陸修然緩緩俯身，但佢冇繼續，而係移過少許將頭靠喺黎昕淇嘅頸窩上，微微抬頭喺黎昕淇嘅頸上輕吻一下
「喂⋯！你唔好留痕跡喺度⋯！」黎昕淇瞬間緊張咁屏住氣息，雙手輕輕推陸修然一下
「冇，喺呢個位太明顯。」陸修然嘅指尖喺黎昕淇嘅頸上輕掃過，黎昕淇下意識反應咁縮咗一下，「哈⋯」
陸修然坐喺床邊，垂眸令自己嘅思緒同內心一同冷靜落嚟
黎昕淇曲起雙腳踩喺床上，坐起身後整理一下校服，將髮圈解開，天然啡黑色嘅頭髮披喺膊頭上，佢隨意撥一撥頭髮
「會長發緊呆？」黎昕淇坐到陸修然嘅身旁，整理身上皺起嘅裇衫
「休息緊。」陸修然將校呔推番近頸喉鈕嘅位置
兩個人靜靜咁坐喺床邊，忽然有種距離好近嘅感覺，但唔係因為貼住對方、坐喺對方身邊而覺得近⋯
黎昕淇拎住手機安靜咁睇，貼住陸修然嘅手向後捉咗陸修然嘅手臂一下
「你隻手做咩又咁凍？」陸修然輕皺一下眉頭，將黎昕淇嘅手拉起握喺手中
「你做咩成日都咁暖？」黎昕淇隨即感覺到暖意從手心傳嚟，「我啱啱都好暖，不過一停落嚟又慢慢凍番，唔知係咪因為最近天氣有啲涼⋯」
「可能啦⋯」陸修然微微點頭，「番學著多件冷衫。」
黎昕淇從旁打量陸修然，咁啱留意到陸修然嘅頸喉鈕解開咗，腦海中第一時間諗起嘅係啱啱陸修然喺佢面前將冷衫除落嚟嘅畫面
「冷靜啲，諗咩呀黎昕淇！」黎昕淇想將腦海中重複播放嘅畫面暫停同關閉，伸手就拍咗自己嘅額頭兩下，「但就算真係⋯冇就算！唔好諗啦！」
陸修然望向黎昕淇，望住佢令人一頭霧水嘅舉動不禁有啲疑惑
「我到底係佢對呢個人上癮定係只係想錫⋯？」陸修然將黎昕淇由頭到腳打量一番，忽然就覺得壓喺心底嘅慾望未完全咁解決好，心中似乎有答案，「兩樣都係⋯」
IG Link: https://www.instagram.com/nd_cotttoncandy/?hl=zh-tw