【愛情】如地下情一樣嘅癮，係我對你嘅定義: 74. 原則

「我喺邊⋯！？」黎昕淇一下子坐起身，意識稍微清醒咗少許，「陸修然屋企⋯陸修然人呢⋯？」

黎昕淇掀開被落床，輕手輕腳咁打開房門行出走廊探頭望向空無一人嘅客廳，屋內安靜到跌一粒米都會聽到；望向廁所，但廁所冇開燈亦冇聲；望向左邊嘅睡房，睡房虛掩住，留咗一道門縫

黎昕淇走到虛掩住嘅房門前，輕力推開房門，見到熟睡中嘅陸修然，本來有啲不安嘅心慢慢放鬆落嚟

確認陸修然喺度後，黎昕淇向後退將門虛掩番，番到陸修然嘅睡房瞓，畢竟如果佢呢個時間番樓下，陸修然第二朝早見唔到佢喺度，或者會擔心⋯

⋯





江清懿托住頭聽書，內容一個字都聽唔入耳，除咗想直接瞓著之外冇咩其他想法

「叮噹叮噹⋯叮噹叮噹～」聽到放飯嘅鐘聲響起令佢成個人都醒咗一下，大概係成朝早第二次清醒

老師都想準時食飯，所以準時放大家去食午餐，江清懿喺老師一話落堂即刻企咗起身

「食飯！」江清懿邊尋找蘇序然嘅身影，邊將枱上嘅嘢都收入櫃桶，「蘇序然！食飯啦！」

「聽到聽到！」蘇序然執嘢嘅動作都好快手，直接將所有嘢疊好放入櫃桶，起身就執匯合江清懿，「行未？」





「佢兩個執緊嘢。」江清懿指住啱啱好執完嘢嘅黎昕淇同宋楚妍

「執快啲啦宋楚妍！人地黎昕都執好啦！」蘇序然直接落手將宋楚妍枱上嘅嘢一次過疊好，「食飯啦！仲慢慢執！」

「你好嘈呀蘇序然！」宋楚妍接過疊好嘅嘢塞入櫃桶，「行啦行啦！」

每次食飯都好似打仗，要早過人地落堂、早過人地出學校門口、早過人地食到飯，食個飯都有啲大壓力

「你今日咁精神完全冇發呆呀？」江清懿啱啱坐低就對精神奕奕嘅黎昕淇道





「琴晚黎昕超早瞓，10點幾已經搵唔到人。」宋楚妍將要用嘅餐具拎出嚟放入熱水中，「蘇序然用叉係唔係？你食常餐。」

「係呀，唔通用羹？」蘇序然反咗個白眼，下一秒即刻比宋楚妍踢咗一腳

「你琴晚咁早瞓，今朝一定好早起身啦～」宋楚妍對黎昕淇講道

「今日⋯早過鬧鐘響。」黎昕淇回答

今朝早黎昕淇起身之後先番屋企一轉，梳洗換衫，最重要嘅係要餵貓，然後夠鐘先再出門口番學

「你琴晚做咩突然咁早瞓？」宋楚妍好奇問道，「我以為你冇睇手機。」

「有少少攰，所以就⋯瞓咗。」黎昕淇微微一笑，隨便就搵咗個借口解釋成件事

「就話平時好少見你咁早瞓嘛～」宋楚妍笑道





阿姨拎住一份常餐嘅奄列放到枱上，宋楚妍同蘇序然同時望向枱上嘅奄列，因為佢地兩個都係食常餐

宋楚妍冇伸手去拎，對於食先食後佢冇咩太大所謂，不過蘇序然卻將奄列先放低喺宋楚妍面前

「你食先。」蘇序然順口講咗一句

「好呀～我唔客氣啦～」宋楚妍拎起叉，佢先唔會同蘇序然客氣

鍾樂時同朋友一齊嚟到嘅時候，一眼就望到黎昕淇，亦望到江清懿嘅背影

「喲～」鍾樂時企喺江清懿身後，雙手搭喺江清懿嘅膊頭上

江清懿嚇咗一跳，膊頭一縮頓時擰轉頭望，轉身望嘅同時下意識將上身向旁邊嘅位置移開少少





鍾樂時微微彎腰，探頭望江清懿，然後對黎昕淇一笑：「你地咁快嘅？」

「你地咁晏先放飯？」江清懿撥開鍾樂時嘅手

「遲咗少少放嘛～」鍾樂時縮咗手，笑道：「唔阻你地食飯啦～」

黎昕淇同宋楚妍對望咗一眼，眼神中夾雜咗一絲訝異，佢地望向蘇序然，蘇序然望向江清懿

「咩呀？」江清懿一抬頭就係三對眼望住佢，完全唔知咩事嘅佢嚇咗一跳

「你地兄妹關係都，幾好喎⋯」蘇序然輕皺起眉頭，「我以為佢要攬住你，嚇親我⋯你地平時喺屋企都係咁㗎？」

「痴咗線？」江清懿一臉嫌棄，「點可能。」

「佢同你關係好啲？」宋楚妍朝鍾樂時嘅方向悄然望一眼





「冇咩分別，有好嘢食同玩佢就會跟住我。」江清懿若無其事咁食飯，完全感覺唔到三人嘅懷疑目光，「不過平時佢中意痴住鍾安而多啲，而且佢最聽鍾安而嘅話。」

「你地唔怕比人傳緋聞呀？咁親近嘅話。」宋楚妍直接問道，「見你地平時一齊番學，佢又好似會痴住你，睇起嚟好close。」

「知唔知自己講緊咩⋯？」江清懿差啲嗆到，皺起眉頭道，「你地諗緊啲咩唔正常嘅事？點可能同自己個妹有嘢？」

「呢樣嘢好難講喎～你地又唔係親兄妹。」蘇序然講道，「倫理上冇問題。」

「有冇問題都唔應該囉。」江清懿嘅三觀好清醒清楚，佢皺起眉頭對蘇序然反駁道，「你地唔好亂講，陣間傳到去鍾安而度，佢以為我中意佢個妹真係殺咗我都似，不過我唔會。」

「睇嚟你係好有原則嘅人嚟。」宋楚妍認真咁點頭

「你宜家先發現？多謝晒。」江清懿無奈道





食完飯之後番到學校又上埋餘下嘅堂，下午嘅堂基本上都比較安靜，因為大家都睡意滿滿

聽到放學鐘聲嘅時候係下午堂中最精神嘅時候，睡意全消可以再聽書一樣，不過好可惜已經要放學

「啱啱上堂又唔見你咁精神⋯」黎昕淇無奈望住江清懿，呢個人同啱啱上堂坐佢隔離直接坐喺度瞓嘅人好似兩個人一樣

「落堂啦嘛，我可以番屋企瞓。」江清懿一臉認真咁講道

黎昕淇無奈咁搖頭，耳仔聽住佢地三人嘅閒聊，佢微微轉頭望向同佢相隔咗兩行座位嘅陸修然同莫淮禮

「講緊咩？」黎昕淇有啲好奇莫淮禮講緊啲嘢可以令陸修然笑，「唉，今晚食咩好⋯」

黎昕淇仰起頭望住天花嘅燈，再過兩、三日，佢爸媽就會番嚟，佢就唔洗日日都食公仔麵或者外賣做晚餐

到站嘅時候，黎昕淇同陸修然喺同一站落車，一如既往等到出咗地鐵站之後先匯合

「今晚你想食咩？」「冇所謂，公仔麵？」

最近嘅話題都係圍繞住晚餐食咩好，畢竟兩個唔識煮飯嘅人淨係可以食外賣或者最簡單嘅公仔麵

黎昕淇悄然望咗陸修然一眼，佢其實有感覺到佢同陸修然嘅關係嘅變化，特別係自從上一次喺梳化錫過之後⋯

佢唔知道陸修然嘅想法，因為佢從來都冇開口問過，但單憑直覺嘅話，佢覺得陸修然同佢嘅心入面嘅想法冇差太遠




IG Link: https://www.instagram.com/nd_cotttoncandy/?hl=zh-tw