【愛情】如地下情一樣嘅癮，係我對你嘅定義: 72. 差距
「早。」 陸修然微微點頭，插住褲袋背靠住身後嘅扶手
「阿姨佢地執行李未？」黎昕淇順口咁問一句
「執好啦，早幾日已經執緊。」陸修然微微點頭，「諗好嚟緊幾日食咩未？」
「未呀，應該都係隨便煮啲嘢食住先。」黎昕淇聳肩道，「媽咪叫我地乖乖地食飯。」
「我會，但唔知你。」陸修然輕笑道
「我都會！」黎昕淇頓時回答
陸修然嘅手自然垂低，手背同黎昕淇嘅手背輕碰到；陸修然抬起頭望一眼顯示器，本來向住自己嘅手心微微轉咗90度變成手背向住前方
黎昕淇嘅手離陸修然嘅手好近，好輕易就可以感覺到對方細微嘅郁動，黎昕淇嘅手稍微轉動
陸修然嘅手向後收嘅時候，指尖掂到黎昕淇嘅指尖，兩人嘅手指只喺第一節嘅關節輕輕扣住對方嘅手指
喺𨋢到地面層嘅時候，𨋢門打開，兩人嘅手早就已經鬆開，兩人一前一後行出大堂，就好似平時番學一樣
番學校嘅路上有宋楚妍同佢一齊，宋楚妍仍然中意每日都有嘢同黎昕淇開心share
「然後呢？你同佢仲講咗啲咩？」黎昕淇笑問道，「你地兩個成日都拗呢啲無謂嘢嘅？」
「唔係我講先㗎！係蘇序然講先㗎！」宋楚妍瞪大眼，理直氣壯咁將問題推到蘇序然身上，「佢幼稚咋！」
「你兩個真係好投契，喺呢啲幼稚嘅事上⋯」黎昕淇無奈道，「日日都可以有唔同嘅嘢拗一餐⋯」
「呿，邊個稀罕同佢投唔投契？」宋楚妍一臉嫌棄咁講道，佢望向前方嘅時候，見到行喺離佢地一段距離嘅江清懿同鍾樂時，「佢兩個好似好多時都會一齊番學。」
「佢兩個？」黎昕淇一時間唔明白宋楚妍指嘅係邊個，直到佢望向前方，「哦，唔出奇呀，佢地一齊住。」
「佢地唔會尷尬？聽講有人懷疑過江清懿同鍾樂時係咪有兄妹以外嘅特殊關係。」宋楚妍突然搬出一個令人匪夷所思嘅話題，「雖然聽起嚟都幾荒謬。」
「都真係幾荒謬。」黎昕淇無語一笑，「江清懿睇起嚟完全唔似係呢啲人，我只係知樂時緊張鍾安而多啲。」
「親哥哥呀，自然唔一樣。」宋楚妍唔覺得意外，「只係最近都有聽到過類似嘅嘢，啲人中意討論呢啲無聊嘢⋯」
「冇辦法，好難唔討論，啲人都係當茶餘飯後嘅話題。」黎昕淇輕嘆一口氣，「傳嚟傳去都係啲無解嘅問題，都唔知有咩意義。」
「你講緊你同會長？」宋楚妍探頭望向黎昕淇，「我作為你嘅朋友加外貌協會成員，我覺得會長同你好襯。」
黎昕淇嘅手輕握咗一下，佢宜家諗一諗都覺得今朝早做嘅事好唔正常，佢同陸修然嘅關係仍然改變緊，離佢地預設嘅範圍愈嚟愈遠
「唔係，只係普通同學。」黎昕淇仍然將佢同陸修然之間嘅事收起，隻字不提，「大家，諗多咗⋯」
「可以日久生情呀～唔試過點知？」宋楚妍沒好氣咁嘆氣
「試到幾時？」黎昕淇無奈笑問道，「陣間冇嘅話咁咪好嘥時間？」
「偷偷地有啲不經意嘅肢體接觸，睇下反唔反感先囉～」宋楚妍一講呢啲話題就起勁，成個人都精神咗一倍，「冇反感嘅話可以曖昧下？」
「你當我係咩人？當會長係咩人？」黎昕淇表面係無奈嘅笑，實際上聽住宋楚妍講嘅時候心虛又緊張
「反唔反感嘅話，睇起嚟冇反感⋯」
「曖昧下⋯日日都暪住大家，我嘅罪惡感同心虛感都已經上到頂點啦⋯」
黎昕淇嘅內心將宋楚妍提出嘅意見逐個回答，但就算有罪惡感都好，黎昕淇都冇打算將呢件事同宋楚妍講，畢竟好難講出口
「之後再算啦⋯」黎昕淇喺心入面重重咁嘆一口氣
⋯
晏晝嘅會室
「你離我遠啲⋯」黎昕淇嘅手推住陸修然唔比佢再靠近自己，「喺學校你同我檢點啲，會長⋯！」
「檢點啲？我已經好檢點，幾時開始同你喺同一空間都變成唔檢點？」陸修然輕笑一聲，壓低聲線反問道
「總之，你就離我遠啲⋯！我已經好有罪惡感⋯！」黎昕淇撇開臉低聲道，佢企喺陸修然同會室嘅門之間，背完全貼住會室嘅木門
「你算係過橋抽板？啱啱攞完解藥就要我檢點啲，你會唔會太自相矛盾？」陸修然嘅雙眸中只有眼前臉泛一層紅霞嘅黎昕淇，佢聽住黎昕淇嘅「要求」不禁覺得好笑
「最衰係因為你⋯！」黎昕淇咬住牙關、用力喺陸修然嘅胸口上揼咗一拳，壓住聲線同怒氣道，「會長你唔好令我更加有罪惡感⋯」
「你都唔係第一日有罪惡感。」陸修然挑一挑起眉，伸手捉住領結往上推番上去，遮住裇衫最頂嘅衫鈕
「呢個唔係比你嘅藉口⋯！」黎昕淇不悅道
「真係難觸摸。」陸修然轉身行到離佢最近嘅位置嘅櫈坐低，「你嘅心情好難估，你今日係因為咩事而唔高興？」
「我？我冇唔高興。」黎昕淇搖搖頭，伸手扭動門鎖，門鎖「噠」一聲解鎖
黎昕淇緩緩行到離陸修然最近嘅枱靠坐喺枱邊，佢定睛望住陸修然，視線一秒都冇離開過
「想點？」陸修然連人帶櫈向後退，拉開同黎昕淇之間嘅距離
「你做咩移走？」黎昕淇問道
「按你嘅意思，離你遠啲檢點啲。」陸修然將櫈貼到白板前，離黎昕淇一米嘅距離
黎昕淇嘅嘴角微微上揚，陸修然口講話唔怕比人知，但一直都會因為黎昕淇嘅不願而保持距離
「你今晚會唔會送阿姨同叔叔去機場？」黎昕淇轉移話題
「送佢地落樓下都會嘅。」陸修然拎起手機，睇下媽媽有冇比咩吩咐佢，「諗下佢地飛咗之後夜晚食咩好過。」
IG Link: https://www.instagram.com/nd_cotttoncandy/?hl=zh-tw