【愛情】如地下情一樣嘅癮，係我對你嘅定義: 65. 氣氛

「你夾另一隻啦！」鍾樂時先開口

「我夾先㗎！你夾另一隻啦！」江清懿完全冇退縮嘅打算，直接反駁道

「你夾另一隻！」「你夾！」

兩個人小學雞一樣嘅無謂爭吵聽到鍾安而都攰，直接夾起另一隻雞翼放到鍾樂時嘅碗中

「唔好同佢拗，你讓下佢啦。」鍾安而淡定咁講道，佢都習慣咗呢兩個人日日都因為啲雞毛蒜皮嘅事爭拗一輪





「知道哥哥！」鍾樂時即刻收番筷子番嚟，夾起碗中嘅雞翼放入口咬一啖

鍾樂時得戚咁望咗江清懿一眼，江清懿雖然無奈，不過佢都唔會真係唔讓步

有時佢都覺得鍾樂時喺鍾安而面前好聽話，鍾安而講咩就咩，但去到佢面前嘅時候完全係調皮都極點，一啲都唔係聽話嗰個佢

「即係針對我啦⋯」江清懿喺心入面無奈道

另一邊廂，陸修然同黎昕淇從餐枱前起身，今日佢地屋企約咗一齊食飯，佢兩個食完又唔太想參與父母同父母間嘅對話就先行離席





陸修然推開房門，冷氣嘅涼風瞬間迎面吹嚟，黎昕淇忍唔住打咗個冷震

「好凍⋯」黎昕淇坐喺陸修然嘅床上，拎起被包住自己

佢放學後直接番咗屋企，換咗屋企衫、沖好涼先上嚟食飯

「啱啱先食完飯，又凍？」陸修然坐喺書枱前面，喺電腦中打開YouTube嘅頁面

「你房個冷氣開到好大，啱啱出去食飯又唔閂冷氣⋯！」黎昕淇指住冷氣抱怨道





陸修然默默起身，跪到床上伸手「啪」一聲閂咗冷氣，黎昕淇訝異咁望住陸修然

「閂咗啦，等一陣啦。」陸修然道，然後坐番喺櫈上面

黎昕淇用被包裹住自己，睇起嚟好似呢度係北極一樣凍，陸修然喺YouTube隨便㩒咗一個合輯隨機播放

黎昕淇望住螢幕裏開始播放嘅片，忽然吞一吞口水，影片令黎昕淇有啲唔自在，腦海中浮現嘅都係當日嘅畫面

「做咩重睇呢個⋯」黎昕淇問耷低頭睇手機嘅陸修然，佢完全冇發現電腦播緊電影嘅剪輯片段

「吓？」陸修然聽到之後先抬起頭望，見到電影嘅片段內容後淡定咁回頭望黎昕淇，「佢隨機播放，唔係我揀。」

「哦。」黎昕淇移開視線，唔想望到影片嘅內容

當初正因為呢套電影先令佢同陸修然之間嘅關係變到咁奇怪，佢宜家望到都覺得自己心跳加速





「你諗緊咩？」陸修然定睛望住黎昕淇，黎昕淇嘅微表情都比佢睇喺眼內

「冇諗咩。」黎昕淇望住門口嘅方向，就係唔望陸修然，佢連餘光都想避開電腦螢幕，但眼唔睇，耳會聽到

「真係？」陸修然連人帶櫈移到黎昕淇嘅面前，托住下巴明知故問道

「咩、都、冇、諗⋯！」黎昕淇伸手喺陸修然嘅手臂上用力摵咗一下

單靠影片嘅聲音都可以令黎昕淇面紅耳熱、心跳加速，佢一世都唔會唔記得呢個電影情節為佢帶嚟一個麻煩嘅癮

「你快啲轉另一條片⋯！」黎昕淇已經覺得自己單憑聽聲都要癮起，陸修然仲要喺佢面前

陸修然一直不為所動，面向住黎昕淇嘅佢仍然一臉悠然咁托住下巴，好似完全同佢冇關係、佢冇呢個癮嘅存在一樣





實際上喺抬頭望到呢個片段嘅瞬間，陸修然嘅喉核已經上下滾動咗一下，移到黎昕淇嘅面前單純想避開畫面

「你仲唔去！？」黎昕淇有啲焦急咁伸手推一下櫈嘅扶手

「好好奇，你係唔係同我諗到同一樣嘢。」陸修然嘅嘴角露出一抹笑意

黎昕淇嘅抬眼望向陸修然，佢嘅眼神已經代替佢開口回答呢個問題

「我冇心情去轉片，好可惜。」陸修然用慵懶嘅語氣講道，但黎昕淇已經知道佢要做咩，下意識向後縮

陸修然起身離開電腦椅，右腳跪到床上面， 右手經黎昕淇嘅腰間到佢嘅後腰，輕易咁將黎昕淇推近到自己面前

「等、等陣⋯！」黎昕淇嘅手抵喺陸修然嘅膊頭前面，「好尷尬⋯！我唔得⋯！」

「同平時有咩大分別⋯？」陸修然不解





「宜家係夜晚⋯！」黎昕淇一臉羞澀

「所以呢？」陸修然更不解當中尷尬嘅原因

「太、太光啦⋯！」黎昕淇道

陸修然起身行到門邊閂咗睡房內嘅大燈，留番書枱上嘅枱燈作為房間唯一嘅光線來源

「咁樣可以未？」陸修然坐回床邊問將被披喺背上嘅黎昕淇

「嗯⋯如果陣間佢地入嚟點算⋯」黎昕淇坐前咗少少，位置更加靠近陸修然

「唔會，佢地會敲門，夠時間。」陸修然道，「你要問到你番去？解藥唔要啦？」





「要⋯」黎昕淇嘅手拉住陸修然嘅衫袖

得到黎昕淇嘅「批准」之後，陸修然直接就錫落去，就算佢背住光、擋住咗光嘅來源都好，佢嘅吻都可以準確無誤咁吻喺黎昕淇嘅唇上

「唔⋯！」黎昕淇比突如其來嘅吻嚇一嚇，佢未準備好就比陸修然突襲一樣，從喉嚨發出微弱嘅聲音

「噓⋯」陸修然喺同黎昕淇嘅鼻尖只有0.1cm嘅距離嘅位置壓低聲線道，「陣間比出面聽到就麻煩啦⋯」

「最衰都係你⋯」黎昕淇低聲抱怨咗一句後主動咁微微坐起吻喺陸修然嘅唇上

黎昕淇伸手拉住陸修然嘅衫袖，跪坐喺床上嘅佢上身前傾；陸修然嘅雙手放喺佢嘅後腰，稍微一用力就將黎昕淇推到自己面前

喺昏暗嘅房間裏更加容易陷入癮嘅漩渦之中，胸口起伏嘅速度逐漸變得頻密，黎昕淇嘅手搭喺陸修然嘅膊頭上面，陸修然嘅雙手將黎昕淇抱喺懷中

喺昏暗嘅環境之下聽到微弱嘅親吻嘅聲音令人不禁面紅耳熱，可以退縮但唔會退縮，唇上傳嚟嘅柔軟觸感先係令人心跳加速嘅來源，明明應該早就習慣

呼吸聲都會變得格外明顯，但為咗維持呢個秘密嘅狀態而要將微喘嘅呼吸壓制住，吸每一口氣、喘每一口氣都要抑制住聲量嘅大小

放喺枱上嘅手機忽然震起嚟，黎昕淇即刻下意識縮咗一下，但陸修然完全冇理會嘅打算，放喺枱上嘅手機一直震，手機震動嘅聲音有啲破壞氣氛




IG Link: https://www.instagram.com/nd_cotttoncandy/?hl=zh-tw