【愛情】如地下情一樣嘅癮，係我對你嘅定義: 62. 偷情？

黎昕淇拎住學生證轉身，行咗一步之後見到嗰兩個女仔直線行咗過去職員面前排隊，黎昕淇一秒轉身拉住陸修然行去隊尾

「我地坐邊？」黎昕淇嘅手搭喺陸修然拎住戲飛嘅手上

「最後，應該唔會見到，除非佢咁好眼力，咁黑都認到。」陸修然接過黎昕淇嘅學生證，連同自己嘅學生證一齊遞比職員

黎昕淇行入1號院之後連忙行到最後排坐低，順便望一眼嗰兩個女仔坐邊

「佢地坐前面，隔咗幾行。」黎昕淇拉住行嚟坐低嘅陸修然細聲講道





「唔怕見到。」陸修然將cap帽嘅帽檐稍微推高少少

兩個女仔忽然望向門口嘅方向，黎昕淇即刻用手擋喺額前耷低頭，陸修然嘅手輕拉住帽檐

「睇個戲搞到好似偷情咁⋯」陸修然無語咁笑道

「唔可以比人睇到嘛，陣間比人傳我地地下情⋯」黎昕淇靠近陸修然嗰邊坐

「宜家睇起嚟唔係同地下情一模一樣⋯？」陸修然拉住帽檐問道





兩人一直維持住呢個姿勢直至院內閂燈；睇戲嘅時候一直都相安無事，直到完場開晒燈之後

「好光呀⋯」黎昕淇耷低頭雙手掩住臉，喺黑暗嘅環境之下兩個鐘，開燈之後雙眼都唔太適應燈光

陸修然望住兩個同校嘅女仔企起身準備走，陸修然即刻將推咗上去嘅帽檐拉番落嚟壓到最低，坐出半張櫈轉身過去望黎昕淇，避開同校生嘅視線

餘光見到兩個女仔已經行咗出去，陸修然鬆一口氣，從來都未試過睇戲睇到咁緊張

「行啦，佢地走咗啦。」陸修然企起身，伸手將黎昕淇拉起身





黎昕淇跟喺陸修然身後行出1號院，行出去之後再四周望清楚確定兩個女仔已經走咗

「戲唔錯，你要唔要食嘢？」陸修然問道

「好呀，食咩？」黎昕淇將手放喺肚上，佢都有啲餓，「呢個鐘數食老麥好唔好？」

「好，買番去食？」陸修然爽快答應，「唔怕撞到人。」

陸修然喺老麥點餐嘅時候，黎昕淇企喺佢隔離拎住手機睇，睇起嚟好似只有陸修然一個人食嘢，仲要食好多嘢一樣

陸修然一隻手拎餐，另一隻手拎住嘢飲，黎昕淇只係雙手空空咁跟喺陸修然身旁

「我幫你拎嘢飲呀。」黎昕淇喺入𨋢之後伸手接過喺陸修然手中嘅透明膠袋

「多謝你嘅幫忙。」陸修然微微點頭，語氣聽起嚟完全係諷刺緊黎昕淇





黎昕淇跟喺陸修然身後出𨋢，陸修然拎鎖匙開門，黎昕淇行到玄關之後順手閂門

「番嚟啦？」陸媽媽喺睡房行出嚟，「套戲好唔好睇呀？」

「好睇～」黎昕淇點點頭，然後將汽水放低喺枱上，「阿然，汽水冇飲管。」

「洗手先，我轉頭去拎。」陸修然輕推黎昕淇一下後轉身行去廚房洗手

「你地慢慢食啦，我好攰啦今日，番房休息啦。」陸媽媽拍一拍黎昕淇嘅膊頭講道，「晚安啦你地都。」

「阿姨晚安。」黎昕淇微笑道，然後就跟喺陸修然身後行去廚房洗手

陸修然打開櫥櫃拎咗兩支飲管落嚟，黎昕淇洗完手，調皮咁提起濕漉漉嘅手朝陸修然彈咗一下





陸修然向後避咗一避，然後輕力喺黎昕淇嘅額頭上拍咗一下；黎昕淇伸手拎走陸修然手中嘅飲管就行出廚房

黎昕淇撕開紙袋，將薯條倒出嚟，拎起茄汁擠喺薯條盒中；陸修然拎起一條薯條放入口，然後又拎起一條遞到黎昕淇嘅嘴邊

「呀。」黎昕淇微微張開口，但陸修然嘅手郁都唔郁，「薯條。」

陸修然望住黎昕淇，但完全冇將薯條放入佢口中嘅打算，直到黎昕淇主動伸前咬住薯條

兩個人安靜咁坐喺餐枱前拎住手機食嘢，一切又好似同平時一樣

食完嘢之後兩個人一齊執好枱面，拎起垃圾行入廚房，黎昕淇將空嘅汽水樽掉入垃圾桶，然後行去洗手

陸修然掉完裝住紙盒嘅紙袋就逼去黎昕淇隔離同佢爭水洗手

「好逼呀⋯」黎昕淇甩一甩手上嘅水，然後拎起一旁嘅抹手布抹手，再將抹手布遞比陸修然





黎昕淇企喺陸修然隔離等佢，望一望手錶時間，先差唔多9點半，都未到好晏嘅時間

「做咩仲企喺度？」陸修然將抹手布掛番好同時問企喺一旁嘅黎昕淇

黎昕淇冇回答，兩人對上視線，最近嘅默契唔錯，黎昕淇行近一步嘅同時陸修然伸手將佢抱喺懷中

「香水味⋯」黎昕淇一貼近陸修然就聞到本來唔屬於佢嘅氣味，心裏低聲道：「咁樣一比較⋯香水味好似冇咁好聞⋯」

如果兩種香水味混合一齊，會變成咩味道⋯？

陸修然提手將擋喺黎昕淇臉頰前嘅髮絲撥開，手放喺佢下巴後捏一捏佢嘅臉頰，黎昕淇嘅手放喺陸修然嘅腰間，伸手拉一下陸修然嘅衫角

陸修然習慣性彎腰，黎昕淇微微踮起腳尖，喺嘴角嘅位置輕吻一下；黎昕淇一錫落去，陸修然就感覺到明顯嘅質感差





陸修然望向黎昕淇嘅唇，佢今日搽咗唇膏，仲係嗰種搽完之後會有啲反光、水潤感嘅唇膏

喺陸修然提手想抹一下唇邊嘅唇膏嘅時候，黎昕淇故意㩒住佢嘅手，喺佢嘅唇上嘅錫咗一啖，水潤感同反光都分咗一半比陸修然

喺兩人錫第二次嘅時候，陸修然聽到開房門嘅聲音，直覺覺得媽媽或者爸爸出咗房

「好似，有開門聲。」陸修然低聲對黎昕淇講道

黎昕淇擰轉頭望向廚房門口，暫時未有人行到過嚟，黎昕淇拉住陸修然嘅衫角冇放手，陸修然望向門外

陸修然嘅位置已經見到疑似係爸爸嘅衫角，但黎昕淇又一次拉住佢嘅衫角，微微踮起腳尖

「你地喺度做咩呀？」陸爸爸行到廚房

黎昕淇仍然企喺洗手盆前面，陸修然拎住張濕漉漉嘅紙巾抹緊嘴，好似咩都冇發生過一樣

「出去廳坐啦，企喺廚房做咩？」陸爸爸酙咗杯水一飲而盡，將杯洗番乾淨放回杯架上，留意到陸修然手上嘅紙巾，「你拎張咁濕嘅紙巾抹嘴嘅？食完好油嘅嘢咩？」

陸修然望咗黎昕淇一眼，黎昕淇抿住唇定睛對望，兩人用眼神對話

「嗯。」陸修然微微點頭回答，將抹完嘴嘅濕紙巾掉入垃圾桶，然後又拎咗張乾紙巾抹番乾

陸爸爸行出廚房，兩人企喺洗手盆前對望咗一秒，陸修然伸手捏住黎昕淇嘅臉頰，彎腰喺黎昕淇嘅唇上錫咗一啖




IG Link: https://www.instagram.com/nd_cotttoncandy/?hl=zh-tw