【愛情】如地下情一樣嘅癮，係我對你嘅定義: 58. 早餐

「我出門口啦。」鍾安而喺開門嘅時候順口咁講一聲，平時番學出門口嘅時候佢都習慣會講一聲先出去

鍾安而行去地鐵站，一如既往咁企喺車門邊嘅位置睇手機

喺列車駛到第三個站嘅月台嘅時候，鍾安而抬頭望向車門外嘅站名，然後又低頭睇手機

「喺你正後方」手機裏傳嚟鄭洛苡嘅message，鍾安而擰轉頭一望，果然見到鄭洛苡嘅身影

「早晨」鍾安而回覆咗一句，佢同鄭洛苡企喺櫈嘅兩端嘅玻璃前





相隔嘅距離唔太遠，不過仍然用手機當作溝通嘅橋樑，隔住6、7個人嘅距離互相講早晨

「早晨～」鄭洛苡微微一笑然後回覆，「琴晚嘅最後，你有冇食到雪糕？」

「冇，爭輸咗」鍾安而望住message，嘴角不自覺咁微微上揚

琴晚嘅雪糕，最後係由鍾樂時勝出，佢地講好咗9點先可以食甜品，鍾樂時喺8點55分已經企定喺廚房

「下次早啲去拎，唔怕爭輸」鄭洛苡笑住回覆





每朝早，兩人都會搭同一班車番學，喺同一個月台位置上車，當然有時都未必會見到面

鄭洛苡側身背住車門企，望向左邊嘅時候，可以從玻璃邊嘅縫望到企喺另一邊玻璃前面嘅鍾安而嘅身影

喺列車駛列月台嘅時候，兩人企喺車門前等落車列車停定開門，兩人默契咁同時朝對方嘅方向望咗一眼

鍾安而嘅笑容唔太明顯，鄭洛苡對鍾安而調皮咁伸一伸脷，喺漂亮嘅外表下收起咗一顆調皮嘅心，不過偶爾嘅調皮感反而令佢有啲反差萌

「陣間要去買份早餐」行喺前面嘅鄭洛苡拎起手機send咗個message





「今日頭兩堂做英文reading」同鄭洛苡拉開咗一段距離嘅鍾安而回覆，「三文治？」

「諗緊食餐蛋定餐腿，另外有啲想飲豆漿，你覺得邊樣好？」「餐蛋飽啲」

「咁食餐蛋！」「喺過咗馬路嗰間買？」

「係呀，嗰間豆漿跟三文治有得平」鄭洛苡行列斑馬線前面停低

鄭洛苡回頭望一眼，鍾安而同佢相隔咗三、四個人嘅身位，鍾安而同鄭洛苡對上視視，但又將視線移開

「副會長早晨～」「早晨。」

企喺鍾安而隔離嘅幾個女仔同佢打招呼，鍾安而禮貌咁微微點頭，然後將眼鏡托番好

紅燈嘅人仔一跳變成綠燈，鄭洛苡行喺前面過馬路，然後直行到佢要買早餐嘅鋪頭前面





「餐蛋加一杯豆漿唔該～」鄭洛苡對老闆講道

呢個番學時間，三文治特別快賣晒，所以老闆直接去整一份新嘅三文治

「一份餐蛋治唔該。」鍾安而行到鄭洛苡隔離，對店員講道

「你都買早餐？」鄭洛苡抬頭望向鍾安而，嘴角帶住小幅度嘅弧度上揚

「嗯，今日冇食早餐。」鍾安而微微點頭

老闆同時出兩份單，將膠袋分別遞比兩人，兩人伸手接過膠袋，自然就一齊沿路行番學校

兩人番到課室之後，鄭洛苡坐喺位打開三文治盒，因為係即叫即整嘅關係所以摸起嚟連膠盒都係暖





鍾安而嘅餘光悄然咁留意鄭洛苡，鄭洛苡嘅注意力都落喺放喺枱面嘅手機上

「早呀。」周晟祐悠悠閒咁行到鍾安而前面嘅座位，拉開櫈坐低

「早。」鍾安而望住周晟祐微微點一點頭

「你今日番嚟先食早餐嘅？」周晟祐望住鍾安而手上嘅三文治，「今日屋企冇煮早餐比你食？」

「嗯，冇買麵包。」鍾安而微微點頭

「我去開個locker攞嘢先～」周晟祐企起身又行開咗，鍾安而嘅視線跟住佢移動

鍾安而將眼鏡除咗落嚟，畢竟都未上堂，唔戴一陣都唔緊要，而且佢覺得雙眼都有啲攰

「做咩除咗眼鏡嘅？」鄭洛苡喺鍾安而嘅眼鏡放到枱上嘅同時就開口問





「眼好攰⋯」鍾安而捏一捏鼻樑

「你除咗眼鏡望唔望到嘢㗎？見唔見到我？」鄭洛苡忽然一臉好奇咁問

「望到，只係有啲矇。」鍾安而其實都可以睇到輪廓，所以佢都係可以見到鄭洛苡側住頭望住佢，「未到除咗眼鏡就盲嘅地步。」

鄭洛苡微微點頭，臉上掛上嘅微笑都係甜甜的

前一段日子佢地調咗位，本來鍾安而同鄭洛苡坐嘅距離有啲遠，一個近窗邊一個近走廊，但調位之後做咗隔離位，距離近咗好多

鍾安而拎住三角形嘅空盒起身行去垃圾桶，周晟祐拎住兩本書走向佢，行到鍾安而身旁，鍾安而掉完垃圾準備行開嘅時候比周晟祐一手㩒住咗膊頭

「今日一齊番呀？」周晟祐低聲笑問道





「你好煩⋯」鍾安而怕咗周晟祐，撥開佢隻手就番埋位

陸修然喺C班嘅課室門前經過，佢行到自己班嘅課室門口，直接孭住書包行到locker前面

「會長早晨～」本來企喺locker前嘅女仔對陸修然講道

「早晨。」陸修然出於禮貌而回應，將本來就冇鎖實嘅鎖扭開拎咗落嚟

「食咗早餐未呀？」對方順口咁問咗一句

「食咗啦。」陸修然伸手將佢要用嘅書一次過拎晒出嚟，懶得轉頭再過嚟開locker拎

陸修然嘅回答好似睇起嚟就好似搜尋嘅關鍵字一樣簡短，唔係必要講嘅嘢佢連講都懶得講

陸修然有聽到佢再講咗啲嘢，其實佢聽唔清楚佢講咗啲咩，所以隨便就答咗句：「嗯⋯」

佢本來可以再問多一次又或者彎低少少腰就可以聽到，不過佢仍然企得畢直，似乎冇呢個打算

陸修然「呯」一聲閂咗locker門，企喺佢隔離嘅女仔嚇咗一跳，陸修然有留意到，於是敷衍咁點一點頭

陸修然拎住一疊書行番埋位放低，然後又行出課室去廁所；去完廁所打開男廁嘅門，就見到黎昕淇同宋楚妍喺外面經過

黎昕淇自然咁望咗一眼，一望過去就同陸修然對上視線，但陸修然卻當冇睇到任何嘢一樣將視線移開，加快腳步喺黎昕淇身旁經過

兩人喺對望嘅一刻同時散發出不滿嘅氣場，故意嘅冷淡令兩人都唔好受，不過冇人想做先低頭嗰個




IG Link: https://www.instagram.com/nd_cotttoncandy/?hl=zh-tw