【愛情】如地下情一樣嘅癮，係我對你嘅定義: 45. 入眠
黎昕淇握住手機平瞓，雙眼望住天花板，今日嘅大腦唔知咩事有啲混亂，就好似宜家，明明知道陸修然喺呢個時間應該瞓咗，但佢都係握住手機，帶住少許唔應該有嘅期待收到回覆
「好想搵個人講下⋯」黎昕淇合埋眼嘗試令自己瞓著，「但係唔可以同楚妍講⋯」
黎昕淇默默又嘆一口氣，正當佢準備將手機放番喺枱上面嘅時候，握喺手中嘅手機震咗一下
陸修然：「未瞓」
「你瞓唔著？」黎昕淇即刻拎起手機回覆，本來沉着嘅心情都回復過嚟
陸修然：「還好，睇緊電腦」
陸修然的確仲坐喺電腦枱前面，因為佢都未有睡意，所以一直睇YouTube打發下時間
陸修然：「你做咩瞓唔著？」
黎昕淇：「我又冇話我瞓唔著」
陸修然望住黎昕淇嘅回覆忍唔住輕笑一聲，平時黎昕淇唔會喺呢個時間搵佢，搵到佢仲要問番佢係唔係瞓唔著，但為咗唔拆穿佢，陸修然好普通咁回覆：「Okay」
黎昕淇：「好悶，想搵人講嘢」
「呢個鐘數搵人講嘢⋯？」陸修然無言咁笑起嚟，然後回覆一句：「我唔係同你講緊嘢？」
對話框冇再出現新嘅message出嚟，陸修然將手機放到電腦隔離，打算等一陣冇回覆先再鎖屏，喺兩秒之後手機就響起嚟
「直接打過嚟⋯」陸修然拎起手機，時間已經係1點半，但陸修然都係揀咗接聽，「直接打嚟，你都好想同人講嘢⋯」
「你唔想嘅話，我可以搵其他人⋯」黎昕淇側身瞓，將手機放喺臉頰上平衡好，聽到嘅同時又唔洗拎住手機
「我冇唔想，不過如果你想搵其他人，我都唔會阻止你。」陸修然口係咁講，不過佢其實又冇特別想喺黎昕淇揀咗打比佢之後收線
「我瞓唔著⋯」黎昕淇嘅語速比平時緩慢，逐個字講清楚，「但唔知點解瞓唔著⋯」
「合埋眼、唔好諗咁多嘢、休息。」陸修然一如既往咁平淡道
「灘咗好耐啦⋯」黎昕淇嘆氣道，緊緊咁將攬枕攬實喺懷中，「你睇緊啲咩？」
「睇緊人地講劇集解說。」陸修然托住頭望住電腦，但耳機內傳嚟嘅係黎昕淇嘅聲音
「劇？講咩㗎？」黎昕淇好奇咁問
黎昕淇一直追問接住落嚟嘅劇情，追問到陸修然喺黎昕淇開口問之前直接先一步開口，佢睇緊人地解說嘅同時，佢又解說緊比黎昕淇聽；黎昕淇攬住攬枕一直安靜咁聽陸修然講嘢，聽下聽下就瞓著咗
「昕？你瞓著啦？」陸修然聽到電話裏頭冇聲，環境寧靜，佢估黎昕淇大概瞓著咗，「你瞓咗嘅話，咁我收線㗎啦？晚安⋯」
陸修然都唔知黎昕淇幾時開始就瞓著咗，佢講咗一句晚安之後㩒咗紅色嘅收線標誌，望住手機嘅畫面跳番去鎖屏，陸修然自言自語道：「當我講故事嘅工具人⋯」
「呵～欠⋯好眼瞓，差唔多3點啦原來⋯」陸修然閂咗電腦之後，直接閂燈瞓覺
⋯
翌日朝早，黎昕淇企喺衣櫃前換上校服，大腦都算清醒，至少冇企喺度都瞓著嘅感覺
「未起身？」黎昕淇望住螢幕內嘅對話框，陸修然未回覆佢嘅早晨，「唔通琴晚好夜瞓，今日唔知醒⋯？」
黎昕淇見到咗出門口嘅時間，行到玄關著上皮鞋就出門口
「佢唔知醒嘅話會唔會遲到⋯？」黎昕淇企喺𨋢門前仍然握住手機，心入面都係有啲擔心，「但，佢係完美嘅會長呀，唔會遲到⋯」
「叮—」𨋢停喺呢一層打開門，黎昕淇喺𨋢門打開之際輕嘆一口氣
「咦？」黎昕淇喺𨋢門完全打開嘅時候，心頭嘅大石終於可以放低，「你冇覆我早晨，我仲諗緊你係唔係唔知醒。」
「冇，準時起身。」陸修然伸手㩒閂門，垂低頭打咗個喊露，「不過有啲眼瞓⋯」
「你琴晚，最後幾點瞓？」黎昕淇眼見陸修然咁眼瞓，有啲心虛咁關心道
「3點，差唔多3點先瞓⋯」陸修然講道
「哦⋯」黎昕淇撅一撅嘴，悄然抬眼留意陸修然
喺行到地鐵站嘅時候，兩人平時都係喺呢度就會分開行，今日嘅黎昕淇喺要分開行嘅時候，回頭望咗陸修然一眼
陸修然習以為常咁點頭，示意黎昕淇繼續行就可以，黎昕淇見陸修然點頭之後就收回視線、加快腳步行喺前面，同陸修然拉開咗一段距離
喺上車坐咗幾個站之後，宋楚妍上車，佢一眼就見到黎昕淇，除咗因為黎昕淇同佢最熟之外，仲係因為黎昕淇每日都會喺同一個車卡
「早晨呀～」宋楚妍每日都可以好精神咁打招呼
「早晨。」黎昕淇微微一笑，朝早仲可以笑得出算係精神唔錯
「我想食早餐，陪我去買？」宋楚妍耷低頭睇手機嘅時候問道
「好呀。」黎昕淇微微點頭，見到宋楚妍一直拎住手機打字，「同邊個講緊嘢？」
「蘇序然，佢叫我幫佢買埋三文治，要食腿蛋。」宋楚妍都冇咩顧忌，直接將手機比黎昕淇睇
「哦。」黎昕淇小幅度咁點頭，「陣間去買。」
黎昕淇嘅目光朝住前一卡嘅車卡望去，不過可能因為朝早嘅車廂多人，所以佢企呢個位見唔到陸修然
「黎昕，你有冇帶新一冊書？今日教新一課。」宋楚妍一聲將黎昕淇嘅注意力拉番嚟
「有呀，我有特登寫低提自己記得拎。」
黎昕淇下意識又向前一卡望一眼，不過諗到會比宋楚妍發現端倪，然後比佢鍥而不捨咁追問，黎昕淇都係收回視線
落車嘅時候，陸修然行喺兩人前面先一步上電梯，宋楚妍自然見到陸修然
「咦？會長喺前面～」宋楚妍指一指前方
「哦，係喎。」黎昕淇呢一刻先敢喺宋楚妍面前望向陸修然，但表面上仍然保持住陌生人一樣嘅平靜
IG Link: https://www.instagram.com/nd_cotttoncandy/?hl=zh-tw