【愛情】如地下情一樣嘅癮，係我對你嘅定義: 31. 傳言
陸修然沉默不語，兩人靜靜地對望，黎昕淇心入面有種莫名嘅緊張，空氣好似凝固咗一樣，黎昕淇感覺到自己嘅唔自在
「佢仲可以咁平靜⋯」黎昕淇望住陸修然嘅雙眸，佢感覺到自己因為緊張而強烈嘅心跳，但陸修然睇起嚟卻意外淡然
屋企冇開電視所以特別安靜，喺兩人都安靜落嚟，貓都灘低休息嘅時候，成個空間只有呼吸聲迴盪
陸修然睇起嚟愈平靜，黎昕淇嘅內心就愈唔自在，就算同佢四目交投，黎昕淇都好難睇清陸修然心中所想
就算係一齊長大嘅朋友、每一日都可以見到嘅人都好，原來都冇想像中咁了解對方所思所想
好多人都以為只要係青梅竹馬就一定好了解對方，但事實上唔係，黎昕淇都會唔明陸修然諗咩，陸修然都會睇唔穿黎昕淇
係唔係因為比起普通嘅關係有深一層嘅秘密，所以先顯得更唔了解？向來當局者迷⋯
「做咩唔出聲？」黎昕淇一下子將上身前傾，湊近陸修然問
知道黎昕淇向來都唔會撒個嬌、嗲下人嘅陸修然，知道呢個前傾嘅湊近已經係佢清醒嘅時候最明顯嘅撒嬌
小辣椒一樣嘅人，點可能會可以好可愛咁嗲人？如果會嘅話，陸修然都要懷疑佢係唔係佢識嘅黎昕淇
「冇咩想講。」陸修然輕嘆一口氣，鬆咗手
黎昕淇摸一摸自己嘅臉，感覺自己都要由冇酒窩變有酒窩；陸修然企起身，黎昕淇嘅視線跟住陸修然移動
「去邊呀？」黎昕淇擰轉身望
「廁所。」陸修然道
「哦⋯」黎昕淇微微點一下頭，有一刻佢喺度諗陸修然係咪打算番去，不過見到陸修然略過咗大門，又莫名咁鬆一口氣，「奇奇怪怪⋯」
黎昕淇呢句好似係講緊陸修然，但又好似講緊自己
⋯
星期六夜晚
「多謝晒～」黎昕淇帶住番工專用嘅微笑對客人點點頭，將找嘅錢同單遞到客人手中
客人一轉身行出門口，黎昕淇即刻收起笑容，江清懿拎住抹枱布行到收銀處
「職業假笑。」江清懿望住行咗出去嘅客人，然後又望向黎昕淇
「當然，專業㗎嘛。」黎昕淇頷首，行出收銀處嘅時候轉頭望咗時間一眼，「放工未⋯」
「番工等放工，咁快就變成社畜嘅日常？」江清懿企喺一邊扮工
江清懿拎住手機睇，樓面嘅客人都只係得番一台，等佢地走咗之後就可以打掃收工
「點解你要番part time？」黎昕淇好奇咁問，反正都係等緊收工
「我？冇呀，就係想賺下零用錢。」江清懿道，「我成日都出去玩，開銷比較大，唔似佢地兩兄妹，中意留喺屋企。」
江清懿所指嘅兩兄妹，就係鍾安而同鍾樂時
「之前聽人講，你同副會長嘅關係唔太好。」黎昕淇回想起好耐之前聽過嘅傳言又道，「但睇起嚟又唔似。」
「冇關係唔好，啲人中意亂咁講。」江清懿無奈道，佢都唔係第一次聽人咁講，「同佢地兄妹關係都唔錯。」
江清懿都習慣咗其他人嘅猜測，佢同鍾安而、鍾樂時嘅關係好多人都知，所以其他人先會猜測佢同鍾安而嘅關係好唔好
「好麻煩，啲人知道咗我地係異父異母嘅兄弟之後，就會成日估嚟估去。」江清懿嘅手放到後尾枕撥一下頭髮，「個個都好似食飽飯冇嘢做一樣，有少少風吹草動就估嚟估去⋯」
「冇辦法⋯」黎昕淇搖搖頭苦笑道，佢都有同樣嘅感覺，「有神秘感嘅嘢一向最吸引，所以人就係要靠呢啲搵唔到答案、要做下估下嘅嘢令日子變得有樂趣少少，只係當事人覺得無聊啫⋯」
「你最近應該好深感受，大家講緊你同會長。」江清懿嘅目光有啲放空，不過腦袋仍然郁緊，耳仔仍然聽緊
「有咩好講，就算有一齊又好，冇一齊都好，都係會有一堆人羨慕妒忌恨，估嚟有咩意思⋯」黎昕淇垂眸，呢番說話夾雜住佢真實嘅感受，「不過如果結果出咗嚟，大家就冇嘢好講啦⋯」
傳聞左傳右傳，最後總會有啲滲到當事人嘅耳中，而且有宋楚妍話佢知，傳聞更加唔可能傳唔到佢耳中
「傳聞嘅嘢真係咩都講得出⋯」江清懿嘆氣道
等到放工嘅時間，兩人一如既往會一齊收工去搭車；黎昕淇落車行番屋企，行到馬路口嘅時候忽然見到陸修然嘅身影
「佢咁夜仲喺度嘅⋯？」黎昕淇特登探頭望清楚
但宜家巴士就停喺馬路前，黎昕淇擔心有比江清懿見到嘅風險，所以直到過咗馬路到轉角位嘅時候，黎昕淇先影咗張相send比陸修然
手機嘅螢幕忽然間彈咗一個air drop通知，陸修然見到自己背影嘅相嘅時候嚇咗一跳，即時擰轉頭望
「你做咩咁驚？做咗咩虧心事？」黎昕淇見陸修然停低好似等緊佢，於是急步行上去
「夜麻麻突然有人drop張你嘅背影相過嚟，冇做虧心事都驚。」陸修然等黎昕淇行到佢隔離先再繼續行
「你咁夜番去嘅？」黎昕淇拎起手機望一眼時間，已經11點幾
「啱啱出咗去同莫淮禮佢地食飯。」陸修然道，「聽日又唔洗番學，所以玩咗陣先番嚟。」
屋企樓下嘅鋪頭都已經閂晒門，成條街比起平時又靜又暗，如朝早嘅時候係完全唔一樣嘅景象
「呀。」黎昕淇行行下比前面有少少凹凸不平嘅地面絆咗一下，佢下意識一樣提手捉住陸修然嘅手踭
陸修然回頭望一眼，佢感覺到黎昕淇挽住咗佢嘅手臂，不過佢挽住佢嘅方式似係捉住佢嘅手臂多啲
「你噴咗香水？」黎昕淇走近陸修然嘅時候，聞到一陣平時冇嘅香味
「嗯，最近新買。」陸修然微微點頭
「你平時出去會噴香水？」黎昕淇臉上寫住懷疑，夾雜住好奇心開玩笑咁問出後半句：「有女仔一齊食飯？」
IG Link: https://www.instagram.com/nd_cotttoncandy/?hl=zh-tw