【愛情】如地下情一樣嘅癮，係我對你嘅定義: 21. 工作夥伴
「你點解揀幼稚園⋯？我以為你會揀老人院⋯」黎昕淇喺瞓著前嘅半迷糊狀態問道，「你都唔中意小朋友⋯」
「唔知，比起老人院想去幼稚園多啲掛。」陸修然平靜回答，黎昕淇微微點頭，喺陸修然嘅膊頭上蹭咗一下
到咗夜晚嘅時候，陸清茹嘅爸爸嚟接佢走，陸修然即刻鬆一口氣，佢真係唔擅長對住小朋友
「陸修然，你係唔係應該請我食飯呢？」黎昕淇喺大門閂上之後即刻收起笑容問陸修然，「我幫咗你一個大忙。」
「你想食咩？」陸修然默默答應，「太貴請唔起。」
「諗下先～」黎昕淇見自己得逞，笑意都忍唔住
⋯
星期四朝早
鍾樂時拉咗張詩楠同鍾安而陪佢做宣傳，雖然鍾安而睇起嚟唔太情願
「好緊張呀⋯陣間要上去宣傳⋯！」鍾樂時一隻手翹住黎昕淇，另一隻手同張詩楠手拖手
「加油加油⋯！」張詩楠雙手捉住鍾樂時嘅手，兩個人喺上台宣傳前為對方再打氣
本來喺台上嘅同學落咗嚟，鍾樂時先踏上台階上台，張詩楠亦已經準備好，就等緊適當嘅時候上台，一切同彩排嘅時候一樣
「好攰⋯」黎昕淇雙手放喺身後，左手捉住右手嘅手踭企喺鍾樂時佢地背住嘅地方
「又攰，你先啱啱番到嚟學校一陣，都未開始上堂。」陸修然插住褲袋企喺黎昕淇身旁，黎昕淇睇起嚟好似已經好似上咗一日堂一樣，「瞓少陣啦。」
「幾時學到咁霸道，連瞓都唔可以？」黎昕淇耷低頭打咗個喊露，順便拉恆雙手拉一拉筋
「日日都掛住瞓好咩？日子有意義咩？」陸修然低聲道
「我做晒功課先瞓㗎。」黎昕淇挺直腰企好，「唔好同我講嘢，好多人喺度。」
「幾時學到咁霸道，連講嘢都唔可以？」陸修然將黎昕淇啱啱同佢講完嘅嘢又原句奉還
「嘖⋯」黎昕淇下意識想瞪佢一眼，但呢度唔係得佢兩個人，佢只好默默咁鼓起兩泡腮，「你真係好無聊。」
台下嘅人都唔係真係個個都咁認真聽緊宣傳，自然有啲人會留意到陸修然同黎昕淇
「睇下，會長同文書又一齊出現。」其中一個女仔擰轉身對佢嘅朋友講道，「佢兩個真係好似成日都一齊。」
「雖然想話佢地喺同一個學生會會成日一齊好正常，但係兩個人都好好睇，企埋一齊唔係好襯咩？」另一個女仔低聲咁講嘅同時，視線一直落喺陸修然同黎昕淇身上
陸修然同黎昕淇一同轉身，將報名表夾喺每班嘅點名簿入面，等班主任拎番課室嘅時候就可以拎埋番去比同學填名
「一個沉穩可靠，一個溫柔細心，呢個組合簡直係無敵⋯！」企喺前面嘅女仔嘅語氣略帶點激動，「佢地快啲熟啲啦⋯！明明成日一齊都咁唔熟點得㗎⋯！」
當事人冇聽到佢地嘅請求，不過私下有完成佢地嘅訴求，不過大概聽到人地話佢地好襯嘅時候會忍唔住反個白眼
「希望大家踴躍報名啦～」鍾樂時講完佢嘅宣傳台詞之後向大家鞠躬然後轉身行落台
「搞掂啦⋯！我好叻女呀⋯！」鍾樂時拍拍自己嘅心口安慰緊張嘅自己，「鍾安而，我仲好緊張！」
「番去飲水定驚。」鍾安而依舊淡定咁講道
佢地兩兄妹嘅性格就真係同佢地嘅名一樣，隨遇而安、及時行樂，鍾安而好多時都係比較冷靜、處變不驚，鍾樂時反而係開朗派，有時會有啲手忙腳亂
「報名表夾好啦？」鍾安而問道
「夾晒啦，喺點名簿入面。」陸修然轉身指一指喺佢身後嘅枱上嘅點名簿
各人番到自己班嘅隊伍準備好陣間又番課室上堂
⋯
宋楚妍同黎昕淇行到餐廳門口，今日同平時一樣都係佢地兩個人一齊食飯
「江清懿！」宋楚妍一眼見到排喺佢地前面嘅江清懿同鍾安而，仲有周晟祐，「你地一齊食飯呀？」
「宋小姐，你嘅眼係唔係唔太好？唔係食飯嚟餐廳做咩⋯？」江清懿反咗個白眼，又望一眼宋楚妍同黎昕淇，「搭枱？」
「好呀！」宋楚妍一秒就爽快答應，拉住黎昕淇嘅手揮一揮
五個人啱啱喺餐廳坐低，宋楚妍忽然拉咗黎昕淇一下，黎昕淇一望過去就見到宋楚妍笑盈盈
「今日係行咩大運？會長都嚟呢度食飯！」宋楚妍湊近黎昕淇嘅耳邊道
黎昕淇望向餐廳門口嘅方向，真係陸修然，陸修然同莫淮禮，加上另外兩個男仔一齊嚟食飯
兩人嘅視線交匯，喺人前嘅兩人見到對方嘅時候一如既往平靜，表現出佢地只係工作上嘅拍檔一樣
「你報唔報班際？」宋楚妍問江清懿，本來睇緊餐牌嘅黎昕淇同鍾安而都抬頭望向江清懿
「你咁樣問會唔會令人有啲大壓力⋯？」江清懿露出尷尬而不失禮貌嘅微笑，攤開手心示意有學生會嘅同學喺度，「佢地都望住我啦。」
「所以你報唔報？」宋楚妍又問一次
「報呀報呀！我報你記得嚟睇。」江清懿怕咗宋楚妍，不過就算宋楚妍唔問，佢本來都打算報，「鍾安而你報唔報？」
「唔報。」鍾安而冇任何猶疑或思考，直接拒絕
「都係，你唔係會去參加體育項目嘅人，除咗陸運會。」江清懿拎起水杯飲一啖水，一次過喺手機落單
「陸運會係強制，冇辦法。」鍾安而講道，「我地班要打籃球叻嘅有好多。」
「你失去咗一個表現嘅好機會，佢實嚟睇⋯」江清懿嘆氣道，拍一拍鍾安而嘅膊頭搖搖頭道，「唉～」
「安靜，飲水啦。」鍾安而連忙阻止江清懿繼續講落去，將水杯放到江清懿面前
黎昕淇微微耷低頭，自然咁擰轉頭望向陸修然佢地坐嘅位置；陸修然有啲慵懶咁靠住櫈背坐，莫淮禮講嘅嘢令陸修然露出笑容，佢不經意側目一瞥，頭小幅度咁擰咗少少，留意到來自黎昕淇嘅目光
陸修然若無其事一樣將注意力放番去莫淮禮身上，黎昕淇都當冇同任何人對視，只係偶然咁回頭望一眼一樣收回視線
IG Link: https://www.instagram.com/nd_cotttoncandy/?hl=zh-tw