【愛情】如地下情一樣嘅癮，係我對你嘅定義: 14. 極端
宋楚妍同黎昕淇喺小食部同陸修然擦身而過，陸修然同佢嘅朋友一齊坐喺一邊嘅枱櫈食嘢
兩個人又變番好似陌生人一樣嘅狀態，餘光望到對方嘅時候面不紅心不跳，各有各忙
陸修然拎住紙包嘅朱古力奶，聽莫淮禮佢地幾個傾計嘅內容，偶爾笑一下答一句附和佢地，佢本來喺朋友入面都唔係中意發言嘅人
「唉～唔知今日會唔會派番默書呢⋯唔合格要抄書㗎⋯」宋楚妍一臉擔心咁對黎昕淇講道
「應該冇咁快啦，佢點會咁快改完⋯」黎昕淇靠住小食部邊緣嘅一條柱，拎住一包兩塊嘅薯餅一啖一啖咁食
「會長好有反差感，佢睇起嚟似係會飲咖啡嘅人，但佢居然飲緊朱古力奶⋯！」
兩個初中師妹喺經過嘅時候有少少激動咁討論，咁啱比企喺一邊嘅黎昕淇聽到，陸修然都隱約咁聽到佢地提起自己
「你唔好咁大聲啦⋯！會長聽到啦⋯！」企喺右邊比較近陸修然嗰邊嘅師妹拉住佢嘅朋友道
兩個師妹望向陸修然嘅方向，陸修然望到佢地，視線同佢地對上；兩個師妹有啲膽怯咁對陸修然微微點一下頭，陸修然出於禮貌咁微微點一下頭作回應
「見唔見到呀⋯？係同我地點頭係唔係！？」兩個師妹更激動，耳根紅一截，腳快都加快咗
「真係大反應⋯」喺一邊目睹一切嘅黎昕淇喺心入面默默道，「佢嘅反差應該都唔止喺咖啡同朱古力奶上面⋯？」
「你兩個喺度呀？」江清懿落咗嚟小食部，行近宋楚妍同黎昕淇，「食嘢呀？」
「瞓覺呀⋯」宋楚妍無奈回答，「好明顯係食嘢啦，你落嚟買嘢食？」
「錯啦，我係買嘢飲。」江清懿聳聳肩，伸手搭喺黎昕淇嘅膊頭上，「星期六番工見啦黎昕。」
「你聽日唔番學？」黎昕淇轉頭望江清懿一眼
「番。」江清懿反咗個白眼講道，「點會唔番學？」
「你嗰日個英文默書有冇溫？」宋楚妍略帶點緊張同好奇問道
「有呀，點解冇？」江清懿爽快利落嘅回答令宋楚妍有啲想喊
「連江清懿都有溫書，我陣間唔合格，炒咗點算？」宋楚妍托住額焦慮咁問道
「我知，請我飲嘢，為你點咗個讚～多謝定先啦～」江清懿豎起手指公比咗個like
「讚你個頭！」宋楚妍將江清懿嘅手㩒番落去
黎昕淇聽住兩人冇養分嘅對話不禁搖頭，望向江清懿嘅時候眼睛嘅餘光留意到陸修然，黎昕淇將視線落到離佢有少少距離嘅陸修然身上
陸修然唔知同朋友講緊咩而笑一笑，鍾安而行咗過去搵佢，喺佢抬頭同鍾安而講嘢嘅時候，佢嘅朋友都自然咁望住兩個人
「係你感興趣嘅副會長。」宋楚妍拉一拉黎昕淇，用下巴示意黎昕淇望過去
「你又感興趣？」江清懿微微側着頭，有少少好奇咁問道，「邊種感興趣先～」
「唔係你諗嗰種感興趣⋯」黎昕淇瞄江清懿一眼，聽佢語氣就知唔解釋嘅話會引嚟誤會，「就係同其他人嘅感興趣一樣。」
「咁會長呢？」江清懿低聲問，黎昕淇冇咩反應
「佢冇㗎，好極端。」宋楚妍代答道，「不過佢同會長成日都喺會室，見得多冇興趣掛？」
「你唔係要買嘢飲咩？」黎昕淇察覺到形勢唔啱即刻轉移話題問江清懿
「係喎，講講下都唔記得咗。」江清懿縮起搭喺黎昕淇膊頭上嘅手，直行到嘢飲機前面
黎昕淇同宋楚妍等埋江清懿，喺轉身要走嘅時候，黎昕淇默默咁同陸修然對望一眼，然後又將視線移開
⋯
「會唔會貼太高？」黎昕淇問拎起poster貼到牆上嘅鍾安而
「好高？」鍾安而貼咗左上角同右上角之後行後咗兩步，自己都忍唔住笑咗，「好似真係有啲高⋯」
「貼太高大家睇唔方便。」黎昕淇望住鍾安而將poster摵落嚟然後痴低啲
「呢度高唔高？」鍾安而問黎昕淇
「Okay呀。」黎昕淇微微點頭，「落下一層啦。」
黎昕淇同鍾安而轉身要落樓梯嘅時候，陸修然迎面而來行上嚟
「你個妹周圍搵你。」陸修然企喺樓梯講道，「佢叫你去搵佢。」
「宜家搵佢？咁呢度⋯你同黎昕貼？」鍾安而落咗兩級樓梯，回頭望一眼拎住一疊poster嘅黎昕淇
「Okay，樂時喺前梯。」陸修然講道，「你喺呢層打橫行去前梯搵佢啦。」
「好，呢度交比你接手啦。」鍾安而上番兩級，向前梯行過去
「落下一層啦。」黎昕淇攬住poster行近陸修然，「行啦會長。」
陸修然轉身落到下一層，拎起poster貼到牆上，黎昕淇企喺陸修然嘅斜後方輕皺起眉頭
「會長，你貼得太高啦。」黎昕淇提醒道，「你同副會長都貼到咁高嘅⋯」
「咁貼低啲。」陸修然將poster摵落嚟然後痴低啲，「呢度okay啦。」
陸修然行喺前面，黎昕淇跟喺身後，落樓梯嘅時候剛好有其他人上樓，對方見到兩人嘅時候微微點一點頭，然後快步行到轉角位繼續上去
「會長同文書好似好多時都一齊～」聲音從樓上傳嚟，聽到聲但見唔到人，但應該係啱啱上前嗰兩個女仔，「比起會長同副會長一齊行，會長同文書一齊行更加好睇～」
黎昕淇同陸修然都聽到佢地講嘅嘢，陸修然擰轉頭望黎昕淇，黎昕淇有啲無奈又有啲擔心
「工作需要。」黎昕淇對陸修然講道，陸修然小幅度咁點頭，睇起嚟好似等緊佢講咩一樣，「其他另計。」
「哦，我又冇諗咩。」陸修然輕笑一下，然後收起笑容，手摸一下領結
「係咩？真係？」黎昕淇質疑道
「係。」陸修然微微頷首，帶住少許嘅唔正經笑道：「一齊落樓下啦。」
「仲話自己冇諗咩⋯」黎昕淇喺心入面抱怨一句，「一嚟開口就窒我⋯」
黎昕淇跟上陸修然嘅步伐落到下一層繼續貼poster，貼晒之後番到會室嘅時候其他人都未番嚟
「佢地未番嚟嘅？」黎昕淇將剩低嘅poster擺番入箱，然後坐低喺佢平時坐開嘅位置，「坐下先。」
「等埋佢地就收工番屋企。」陸修然靠坐喺枱邊
IG Link: https://www.instagram.com/nd_cotttoncandy/?hl=zh-tw