【愛情】如地下情一樣嘅癮，係我對你嘅定義: 11. 雨天
「黎昕你今日係咪番屋企？」宋楚妍喺放學執嘢嘅時候行到黎昕淇嘅座位
「係呀，今日我唔留喺會室啦。」黎昕淇將書包拉鍊拉上
「耶～一齊走！」宋楚妍開心咁番埋位好快咁將所有嘢都放入書包，拉埋拉鍊就孭書包走
黎昕淇同宋楚妍一齊行出課室，兩人一齊搭地鐵番去，喺到某一站嘅時候，車門打開有人拎住濕漉漉嘅縮骨遮入嚟，亦有人由頭濕到腳
「出面落大雨⋯？」宋楚妍有啲不安咁打量上車嘅人，「黎昕有冇帶遮？」
「有⋯」黎昕淇即刻打開書包check一次，萬幸，長放喺書包嘅縮骨遮仍然喺同一個角落，「你冇帶呀？」
「有呀⋯今朝出門口之前睇天氣報告話有機會落雨。」宋楚妍將書包孭到前面拎咗遮出嚟先，「睇嚟好大雨，不過我把遮好細，遮多個人都唔得，咁大雨連遮自己都有啲勉強⋯」
「係喎⋯陸修然有冇帶遮⋯？」宋楚妍提起遮嘅大細就叮咗黎昕淇一聲，黎昕淇不禁諗境陸修然
黎昕淇拎出手機，即刻send個message問陸修然：「你有冇帶遮，落大雨」
拎住手機等回覆嘅黎昕淇有啲不安，陸修然又唔似啲唔睇天氣預報就出門口嘅人，畢竟陸修然好可靠，佢大概會帶定⋯？
眼睛嘅餘光瞄到向自己嘅手機螢幕一亮，黎昕淇緊張咁拎起手機睇
陸修然：「冇，琴日抽咗出嚟⋯」
「⋯」呢一刻嘅黎昕淇同佢send出去嘅message一樣無言以對，平時咁可靠嘅人，真係冇帶遮
「你上車未？」「喺車啦」
黎昕淇本來有啲繃緊嘅心又鬆一口氣，至少佢上咗車冇淋雨
陸修然：「喺地鐵站出口等我」
「好」黎昕淇喺心入面輕嘆一口氣，望住宋楚妍手上只可以遮一個人嘅遮，心入面都懷疑自己把遮可唔可以承受到為兩個人喺大雨下
黎昕淇到站落車，行到出口望住外面比平時清晰度矇咗一度嘅時候，心入面已經嘆定氣先
「陸修然到邊呢⋯」黎昕淇放空雙眼望住外面嘅雨水灑落，「到未⋯」
「到啦。」陸修然小跑上樓梯，見到黎昕淇企喺樓梯邊抬頭發呆
「好大雨。」黎昕淇回頭對陸修然平靜咁講道
陸修然接過黎昕淇手上拎住嘅縮骨遮，打開遮行出去嘅同時拉咗黎昕淇嘅手踭一下，雨遮向黎昕淇嗰邊傾
雨密密麻麻，落到地面嘅水氹之後反彈起嚟，皮鞋嘅鞋面有一粒粒水珠，黏黏笠笠嘅感覺令人唔自在又煩躁
番到屋企樓下大堂嘅時候，大堂入面一陣冷氣嘅涼風吹過，黎昕淇即刻打咗個冷震
「你有冇淋濕？」陸修然將濕漉漉嘅縮骨遮摺好遞番比黎昕淇
「鞋襪，裙濕一半。」黎昕淇將紙巾塞到陸修然嘅手中，「我番去沖涼先。」
「好。」陸修然拎紙巾抹手，不過衫同褲都濕咗一半，「你轉頭㩒鐘。」
黎昕淇番到屋企沖咗涼、洗咗頭，頭髮吹乾咗一半，換咗套衫就攬住功課搭𨋢上兩層㩒陸修然嘅屋企門鐘
陸修然出嚟開門嘅嘅時候已經換咗屋企衫，白色嘅T恤加灰色運動短褲，頭髮都已經吹乾咗
「你連頭髮都未吹乾。」陸修然嘅目光落喺黎昕淇濕漉漉嘅頭髮上
「唔吹啦，好麻煩。」黎昕淇怕麻煩，所以頭髮都係吹到半乾就算
黎昕淇將功課擺喺枱面，陸修然嘅筆袋放喺餐枱上，黎昕淇直接拎起筆袋拎自己用開嘅筆，到陸修然打開筆袋拎筆嘅時候，發現自己用開嘅筆喺黎昕淇手上
「你又拎咗我用開嗰支好用筆⋯」陸修然逼於無奈拎咗另一支黑筆
「我中意用呢支。」黎昕淇若無其事繼續打開功課
「自己買。」「我有，不過筆袋喺樓下。」
黎昕淇嘅理直氣壯，陸修然都冇辦法阻止，順佢意就好；喺同一個空間嘅時候，兩人都好安靜，但唔會令人覺得唔自在
「仲有份writing，好攰⋯」黎昕淇將功課疊齊，將筆放番喺陸修然嘅筆袋入面
黎昕淇枕住自己嘅左手，右手伸出嚟掂住陸修然嘅筆袋，將筆一支支拎出嚟望一眼㩒一㩒又放番入去
「唔好玩筆。」陸修然將黎昕淇嘅手抽番出嚟
「好眼瞓⋯」黎昕淇一臉疲倦，大概係因為外面嘅天灰濛濛，雨水打喺玻璃上嘅滴滴答答聲有啲催眠
黎昕淇額頭靠喺前臂上，陸修然嘅指尖輕碰黎昕淇嘅指尖一下，黎昕淇嘅手輕握咗一下
「阿昕？」陸修然緩緩開口試探咁輕喚一聲
「嗯⋯」黎昕淇嘅聲線開始變得含糊，用喉嚨發音低聲回答，「好攰⋯唔想做writing⋯休息一陣先⋯」
黎昕淇起身行到梳化側身瞓低，攬住放喺梳化上面嘅圓形抱枕小睡片刻；陸修然嘅視線跟住黎昕淇移動，直至佢灘低咗，先再繼續做功課
到陸修然做完手上嘅功課，佢起身伸懶腰同時行到窗前，外面嘅天比啱啱番嚟嘅時候又更灰，雨落得更大更密
「轟隆！」一個閃電一個雷聲，即刻刺激到黎昕淇嘅聽覺令佢醒過嚟
黎昕淇坐起身回一回神嘅時候，陸修然企喺窗前，望住外面嘅雨、聽住嘈吵嘅雨聲
「仲落緊大雨⋯」黎昕淇企起身，一步一步緩緩行到陸修然嘅面前
黎昕淇拉住陸修然嘅衫角稍微借力，陸修然感覺到有嘢輕輕掃過佢嘅腰間，收回望向窗外嘅視線，落喺佢面前嘅人身上
如果唔係喺咁近距離，唔會聞到咁明顯咁濃嘅洗頭水香味
如果唔係潤唇膏轉移到唇上，唔會知道佢用嘅潤唇膏係有士多啤梨味⋯
IG Link: https://www.instagram.com/nd_cotttoncandy/?hl=zh-tw