《屍河明居鑽石山》（是咁的，我發現打喪屍有得升呢）: 408

008




……

「唉！我連秘密武器都俾埋你喇！」

阿伯喺床褥下面，拎咗支大長木棍出嚟。





「棒球棍？」我都係第一次親手拎住一支棒球棍，「喺邊度得嚟？」

「樓下運動鋪。」

我見到上面仲有球星簽名……好似叫鈴木一朗？

唔識。

我估呢支應該係鎮店之寶嚟，老闆純哂嘢唔賣嘅，否則就係假嘢。





我見枝棍上無血跡，但癡住啲玻璃碎……

「其實我上嚟之前，仲順手爆格咗隔離兩間鋪頭……」佢有啲唔好意思，「錢你要唔要啲？攞幾千蚊責吓袋。金鏈我都收起咗幾條，係啲院友留低嘅……」

「……」

「望撚住我做咩？我點知呢單嘢會搞到咁大鑊啊？嗰時俾著你都會擸錢啦！老婆唔使食啊？」

又想喊啦又想喊啦，一提起老婆就……





呢條廢老真係經典。

甚至有啲唔捨得同佢永別……

我試揮咗幾吓支長棍，FartFart聲，我唔識打棒球標準動作，但我膊頭同手踭有力，而家雙手又握得實，夾硬亂扑都應該有啲殺傷力。

「其實我都唔係好Fart得郁支嘢，俾咗你！」阿伯話，「走啦！帶住條女返落嚟嗰時，路過記得抬頭同阿伯打聲招呼！」

「係喎阿伯，我都未知你叫咩名？」

「你哋啲後生仔唔係好鍾意『廢老廢老』咁嗌響口㗎咩？嗌我廢老得啦！」佢甩甩手，「我個細仔都係咁嗌開我，慣哂。」

又抹眼淚……





我後來先知，原來佢真係姓『費』。

「哦，廢老。」我拍拍佢膊頭，「我叫程朗天。」

轉身起程。

——————————————

廢老其實搞錯咗，呢幢大樓對面，並唔係警察局。

而係仲大鑊嘅……

消防局。

消防局後面仲有紀律部隊宿舍，過埋呢個宿舍，就係聖母醫院所在嘅沙田坳道。





考慮到喪屍好可能唔識開槍，屍變嘅消防員，應該比差佬更可怕。

同埋呢半條街完全係冇遮冇掩，要硬闖……一俾喪屍包圍就死得。

「……」

我拎住支棒球棍，喺老人院可以直望到消防局嘅方向，輕輕打開窗，爬出騎樓，再關好個窗……

一如之前幾次觀察所見，呢邊條橫街冇咩喪屍，似乎都集中落哂去龍翔道？

我可以裝到少少消防局入面……

「嘩，唔得掂，一個個好似裘錦龍咁……」





剩係排球場，就有成十幾個赤裸上身，勁大隻嘅喪屍喺度遊緊。

而且局門係大開，似乎有消防車出咗車，就再冇關過閘。

即係話，如果我喺度過馬路，就係直向住一間打開門嘅消防局走過去……

太癲！

我冇就咁跳落馬路。

而係沿住騎樓簷篷，貓身走過去老人院隔離……廢老話嗰度係寫字樓。

佢上嚟時話見到嗰度已疏散，但係佢呢幾晚都聽到隔離有屍叫聲，大約有兩、三把聲倒，都係女聲嚟……

我需要多啲點素儲備（註：點素個「素」字，係有類似維生素個「素」咁嘅意思。大家可能會睇唔慣，抱歉）。





我就踎喺騎樓，喺排窗下面，再逐隻窗伸手上去試開……有啦，第三個窗就冇鎖實。

呢個時候WD40就有用。

我噴一噴個窗骹，輕輕力就拉開咗個窗，完全無聲。

裝入去，寫字樓有七、八張檯，一眼睇哂……見唔到喪屍？我特別向牆後瞄落去……冇縮埋喺度。

我輕手輕腳咁爬入個寫字樓。

好靜。

「但係廢老冇咩理由呃我……唔通走哂出去？」

但我見到大門係關埋同落咗鐵閘……

「唔通匿咗喺啲辦公檯底？係夜晚活性高時先走出嚟？」

喺我靠窗呢行就見唔到，我正想行出去睇吓前面嗰兩行……

YRRRRRRRRRRA！

突然間一陣好響好響嘅喪叫，帶哂回音咁轟炸我左邊耳仔！我嚇到仆咗落隔離張辦公枱度，只係嚟得切抽起支球棒擋架！

而且唔知點解，伴隨住叫聲，仲傳嚟冧嘢咁嘅乒鈴嘭唥，好多塵飛出嚟！

……

只係有越嚟越兇悍嘅叫聲，但係未有攻擊？

我睇真，鬆咗口氣。

似乎係士多房，裏面放哂啲Filing檔案之類……

有三隻癡埋一舊，坐咗喺士多房最裏面。因為佢哋係咁郁，而且應該係屍變後第一次見活人，所以啲File先全部跌哂落嚟……

因為啲櫃都俾佢哋搖到歪哂位。

我睇真啲……

「索帶？」

三隻OL喪屍，都係俾索帶綁住雙手，所以先撲唔到出嚟。

我好自然催動杏仁核，提升咗觀察能力……我留意到其中一個OL手上嘅索帶，竟然仲攝住隻門牙。

而呢個OL隻門牙係甩咗嘅。

「即係話，佢地三個係自綁，然後第三個人要用口嚟扯索帶，甚至扯斷咗隻牙……」

由出事之後到而家，我相信差唔多有成個禮拜，但係佢哋個姿勢，仲大致係保持住三個人緊緊攬住對方，係見到我先慢慢走樣。

而且地上，我見到有條十字架頸鏈，同埋聖經。

但係呢幢大樓，好似係吝色園旗下設施……

理人咁多做咩？