因為EX 我成為左一個禿頭嘅毒撚 然後遇到一隻猫: 47. 感情玩家

「點解? 我地唔係一直好好地咩?」我完全諗唔到分手嘅原因。
 
「因為我感受到你已經投入左衣段感情真係鍾意左我。」Jessica帶住笑意咁講。
 
「咁對我地唔係應該係好事黎?」佢嘅答案令我更摸不著頭腦。
 
「其實點解你比個ex咁傷害完，你都仲會相信愛情? 你唔驚再被傷害多次?」佢無答我而係反問返我。
 
「我曾經都有懷疑過，因為果種感覺實在太痛苦… 但係係你令我選擇再次相信…」我如實作答，確實係Jessica嘅出現我先會咁快又墮入左愛情衣個漩渦。
 




「咁証明我都幾成功~ 不過我就無你咁傻，我唔會再比機會自己受傷…」講到一半Jessica突然收起左個笑容。
 
「所以你一開始就諗住係玩我?」而我亦終於明白佢背後嘅動機同用意。
 
「又唔好用個玩字… 衣半年大家都開心呀唔係咩? 我都有幫你出過唔少火? 所以我唔覺我有負於你，對你亦唔會有任何虧欠嘅感覺，只係我同自己講過唔會再對任何一段感情認真，咁我就唔會受到傷害。反正每段愛情過左某過時限就會變，你應該都好深體會格? 咁點解唔係佢變前就離場，咁咪既開心過又唔會受傷囉? 唔通好傻咁等過多一兩年後到你變嘅時候自己又要喊餐慒?」Jessica緩緩解釋。
 
「點解你可以做到咁收放自如? 始終人係有感情嘅動物…」我明佢講嘅道理，但我唔明佢點可以做到。
 
「初初係唔得架，不過練習多幾次你慢慢就會麻木，然後就會知道條線應該點掌握，始終人係有自我保護機制，愛過受傷過，慢慢就會失去左愛人嘅能力。當然，有d係人係例外傷極都仲死要去愛嘅，咁果d就佢自己抵死啦。」Jessica恥笑著。
 




「咁你可唔可以老實答我… 你有無真係鍾意過我?」我問左個好老土，但又真係好想知答案嘅問題。
 
「有呀，唔投入邊有意思架? 我唔付出亦唔會可以令到你真係鍾意左我啦。我咁答你係咪會舒服d? 不過比起鍾意你，我鍾意自己多好多，所以我知去到某個位就要停。自從果次傷害後，我就同自己講過，無一個人會比自己更值得鍾意。」Jessica好似無任何感覺咁講。
 
「但咁樣，人生真係會快樂?」我問佢，亦係問我自己。
 
「未必好快樂，但至少唔會再係傷心絕望… 就好似你有筆錢係手，你會拎去賭一鋪搏可以贏左就做有錢佬但輸左會變乞兒，定安全d踏踏實實放返係自己戶口慢慢洗?咁係做唔到有錢人，但至少唔駛捱窮。而最重要係愛情衣方便，輸嘅機會實在太大。」Jessica好快就答得出，証明佢都有諗過衣個問題。
 
「我明你受過傷點解會有咁嘅諗法，但點解你明知我都係受害者仲要咁傷害我?」
 




Jessica:「學曹操話齋，寧我負天下人，莫天下人負我，頭先我咪話左比起鍾意你，我鍾意自己多好多囉。而且我都希望我可以教識你衣個道理，咁你受埋衣次傷，就以後都唔會再被傷害。」
 
「所以我做咩都唔會留到你?」我無力地問。
 
「調返轉講，繼續同你一齊，你可唔可以確保到我永遠唔會受傷?」Jessica望實我問。
 
「…」我確實承諾唔到d咩，因為我知感覺係一時，就算衣刻幾愛都好，將來一樣可以話變就變，就好似我同Grace咁。
 
「所以成熟d啦Joe，我知我傷害到你，不過成長從來都要付出代價，將來有日話唔定你會多謝返我呢~」見我答唔出，Jessica好快閃過一絲嘅失望然後又無事咁講道。
 
「你個roommate知你係咁?」我醒起佢roommate Michelle於是問。
 
「當然啦，佢都係配合我演下戲咁去呃你地d純情男啫~間中其實我地都會交換下角色架。」Jessica如實答道。
 
對於Jessica嘅灑脫，我感到好驚訝，對我黎講，衣半年突然間就好似發左場夢咁。但對佢黎講衣半年又係屬於d咩呢? 不過見佢咁灑脫，我都不得不認同佢講嘅野可能係無錯。愛情就好似賭搏咁，無話必贏而且被動，因為始終都要兩個人目標一致先可以有成果，一隻手係拍唔響。你可以好努力咁令大家目標一致，但就唔會保証任何野。而當你付出左好多後最後都係失敗收場時，你受嘅傷害同打擊都會更大，所以話投入愛情就等於賭搏係無錯。而要唔受傷害唔做輸家，唯一方法一就係你永遠唔投身其中去賭，又或者出千一早決定去做傷害人果個庄，咁你就永遠唔會受到傷害。




 
估唔到諗住終於可以認真投入一段感情忘記以前傷害嘅時候，結局最後偏偏就係咁。雖然今次嘅傷害無Grace咁大，但亦令我開始諗如其將主動權留比別人，倒不如真係自己永遠拎住個主動權? 於是我同自己講，以後我都吾會再認真投入一段感情，然後我真真正正成為左一個player。
 
之後我開始跟Byran成日流連夜場，由於單身我可以亳無壓力咁瘋狂溝女食女。而如果遇著d真係有feel嘅，我同佢地都會一齊一段短時間然後再飛左佢地。初初其實都有d唔慣同唔捨得，不過正如Jessica所講，只要你決心試多幾次，慢慢你就會駕輕就熟然後完全變成左麻木。
 
(今日令你受傷係為左令你將來唔會受更重嘅傷…) 每一次我都咁同自己講。好快，我就說服左自己其實係做緊一件好事。
 
「衣個情節令我諗返起第一個平行時空，比人飛同自己飛人感覺係好唔同。」望住一個又一個比我整喊嘅女仔，天空上嘅我突然有所感悟。
 
「兩者都係有d唔同。第一個世界其實我想比你睇嘅係你可能一直以為自己真係好鍾意Grace，無左佢唔得所以咁痛苦。但其實原來有時人嘅感覺係會呃人，只係換左少少設定，同一件事如果係由你提出分手你嘅感受可以完全唔同。所以你可以深思下其實自己係咪真係咁鍾意Grace?定只係自己硬頸唔肯接受現實接受唔到命運唔係自己掌控? 
 
至於衣個世界衣家嘅你，只係單純想保護自己唔受傷害啫。」貓仙人難得解釋道。
 
當我見住下面嘅自己食完一個又一個女仔嘅時候，我發覺衣個世界真係咩女仔都有。有求安慰，有貪玩，有想搵刺激，有open relationship，有自己都唔知自己想做乜。而只要你肯，自己條件又唔差，要溝女真係一件好易嘅事。所以如果無食過其他女人係我人生其中一個遺憾，咁其實真係只係我自己白白咁浪費左自己之前10年嘅黃金歲月。