《求婚嗰日，我發現我女朋友鍾意食屎》: 六十八

就喺我粒朱古力跌咗落地大約三秒左右，向彩萍突然發出咗有啲驚訝嘅「嗯」一聲。
我俾佢嘅目光吸引咗望向地面，然後我都忍唔住「嗯」咗一聲。
因為，我見到喺向彩萍掘開嘅嗰一個窿度，爬出咗一條全身鮮紅色嘅蜈蚣。
我馬上諗到，唔通，呢一條就係向彩萍所養嘅血蠱蟲？
呢條血蠱蟲只係將個頭伸出咗洞口少少，然後用極快速度擘大口一下就咬走咗喺地下上面嘅朱古力，然後就「唰」一聲走翻入個窿入面。
 
「佢……竟然會對朱古力有興趣？」向彩萍嘅語氣充滿懷疑，睇嚟連佢自己都唔知道原來血蠱蟲會對朱古力有反應。
「既然朱古力可以引起敏敏對食屎嘅反應，而敏敏食屎又係因為身體入面嘅蠱蟲，照咁計，蠱蟲同朱古力有關係亦都符合生物學嘅邏輯。」高醫生喺側邊補充。
呢一個眼前嘅變化，加上向彩萍同高醫生嘅說話，令我腦入面即刻閃過一個想法。
 




我望住自己手上面嗰盒朱古力，除咗有戒指嘅嗰一粒之外，我仲有四粒普通嘅朱古力。
我望向八仙果師父，師父似乎已經睇透咗我想做啲咩，隨手就將一個空嘅八仙果罐拋咗俾我，同時不忘補翻一句：「空罐都要收翻十蚊㗎！」
由於我搵到新嘅方法可能幫到敏敏，所以都唔得閒同八仙果師父計錢，一手接過空罐之後，我即刻放咗一粒朱古力入去。
我將個空罐擺咗喺樹窿嘅五步之外，然後再喺樹窿同空罐之間嘅路上面放多咗三粒朱古力。
 
「唔通……你想引條蟲上嚟捉佢？」敏敏睇到我所做嘅嘢，都估到我嘅意圖，所以我點一點頭。
「方法睇落係可行嘅，但係如果一陣佢唔食哂四粒朱古力、唔入空罐就走咗去，又或者你捉唔切佢，好可能佢上咗地面就會永遠走咗去，你點都捉唔到佢。」向彩萍冷淡咁補充一句，但我聽得出佢係出於好意嘅。
「唔緊要，即使捉唔到，我都一樣會娶敏敏。」我向敏敏一笑，令佢安心。
 
就喺呢個時候，大家再一次聽到樹窿傳出好輕微嘅「唰唰」聲。




我即刻拎住空罐嘅蓋，企好喺空罐隔離Standby。
果然不出三秒，血紅色嘅蜈蚣再一次現身。
佢搖擺住瘦長嘅身體，用佢數之不盡嘅腳幫佢慢慢接近第一粒朱古力，然後一口就咬走咗。
食完第一粒之後，佢並無離開，反而慢慢向住第二粒朱古力前進。
而我哋五個在場嘅人都全神貫注，望住呢條血蠱蟲到底會點樣走。
 
好順利咁，蜈蚣走到去第二粒朱古力前面，然後又一啖吞咗落肚。
食完第二粒之後，蜈蚣同時望到前面有第三粒朱古力，所以又順理成章咁慢慢向前爬行。
眼見計劃非常順利，我內心當然係非常激動，但係我又唔敢大叫出聲，擔心一叫就會嚇走條蟲，所以只可以好緊張咁握緊拳頭，希望條蟲生生性性爬到最後一粒朱古力。
 




血蠱蟲爬得好慢，但係方向依然正確咁向住第三粒朱古力進發。
當佢走到第三粒朱古力前面嘅時候，佢再次毫不猶豫咁吞咗粒朱古力。
跟住落嚟，就係關鍵嘅第四粒朱古力。
 
血蠱蟲食咗第三粒之後，好似有啲意猶未盡，個頭左搖右擺，似乎係搵緊仲有冇下一粒嘅朱古力。
搖下搖下，佢個頭就停低咗，雙眼向住八仙果罐嘅方向望去。
無錯，佢已經發現咗罐入面有第四粒朱古力啦！
我心入面不斷叫住「入去！入去！」，希望可以用吸引力法則將血蠱蟲引入去。
估唔到，宇宙又真係聽到我嘅心聲，血蠱蟲喺望向八仙果罐兩秒之後，就開始緩慢咁爬向個罐。
事前，我已經將粒朱古力塞到入去罐嘅最深處，只要條血蠱蟲成條走到入個罐度，我就會即刻用個蓋合埋罐。
 
血蠱蟲，一步一步咁走向佢嘅誘餌。
在場嘅大家都滿心期待咁望實佢，好似啲年輕父母望住BB向前爬咁，希望佢快啲爬到目的地。
而皇天不負有心人，血蠱蟲，終於都嚟到八仙果罐嘅入口。
而我，已經企定喺罐嘅側邊，等待時機一到，馬上行動。




 
血蠱蟲試探咁聞一聞個罐，感受下有冇咩危險性。
當佢停咗兩秒，就開始慢慢入去個罐度。
睇住條蟲一寸一寸咁移入去個罐，我亦都慢慢烏低身準備我嘅行動。
 
佢入一寸。
我低一啲。
佢再入一寸。
我雙手已經扶住咗個罐。
 
當條血蠱蟲爬到得翻條尾喺罐外面嘅時候，向彩萍好細聲叫咗一句：「係機會喇！」
同時之間，八仙果師父亦都講咗一聲：「打直個罐，合蓋！」
一聽佢兩個嘅指示，我毫不猶豫咁將個八仙果罐打直，成條血蠱蟲即刻垂直跌咗入去罐入面。
當我已經好快手準備合蓋嘅時候，意想不到，條蟲竟然生命力超級頑強，佢竟然嘗試對抗地深吸力咁向上爬。
由於佢身體好長，所以佢一伸展，竟然又俾佢個頭衝到上嚟罐口嘅位置。