［愛情純愛］我地之間嘅友誼純度絕對等於零！！！: 142. 難以開口
「如果你拍拖，但仲有人同你表白嘅話⋯」沈心怡又問，佢要確定潘景諭嘅答案，因為中意，所以先要認真考慮
「冇點，就係拒絕然後話有女朋友。」潘景諭望向沈心怡，眼神中係一份藏着真心嘅真誠
沈心怡又安靜落嚟，然後認真地望住潘景諭；因為係認真嘅中意，所以沈心怡先要更認真去考慮，畢竟，潘景諭太多女仔中意⋯佢要確定自己喺潘景諭心中嘅地位同重要性，要確定潘景諭對自己嘅中意
「你睇下食咩⋯幫佢地叫埋啦⋯」潘景諭將目光放喺枱上嘅餐牌想將注意力分散
「嗯，好呀⋯」沈心怡點一點頭，然後又朝潘景諭望咗一眼，心裏道：「我仲未ready好比個答覆佢⋯但其實我又想同佢講我嘅想法⋯」
沈心怡自己嘅心都好矛盾，佢想講同時又唔知點同潘景諭講好，但係佢又唔忍心要潘景諭等佢太耐⋯沈心怡好怕見到潘景諭露出失望嘅表情，感覺就好似自己成為咗千古罪人一樣
「我都應該係時候要面對自己啦⋯」沈心怡法微微低頭，喺心裏對自己輕輕地講道
呢句說話，大概係佢用嚟鼓勵自己⋯
⋯
「彤彤⋯你話我應該點呀⋯」沈心怡一臉苦惱地問李逸彤，佢對愛情事，真係唔太了解
「冇點呀～你想唔想同佢一齊先？」李逸彤聳肩，視線從手機嘅螢幕上移開一秒望沈心怡一眼，「你想同佢一齊嘅話，勇敢咁同佢講你嘅心意呀～你都錫咗佢啦～」
「兩件事都唔一樣！」沈心怡一聽到李逸彤提起嗰件事，頓時紅了臉頰，慌張地講道
「點唔一樣？你有勇氣錫佢但冇勇氣同佢講？」李逸彤輕皺起眉頭一臉不解，「定你仲未肯定潘景諭嘅心意呀～」
「我知佢中意我⋯」沈心怡講道
「佢都比你拿捏到實一實啦～心都比埋你啦～」李逸彤笑道，佢仲要配合埋握拳嘅動作，「我肯定你只要答佢一句好，佢即刻咩都唔理同你一齊～」
沈心怡半信半疑地望向李逸彤，但聽到李逸彤嘅說話，沈心怡又暗自高興；李逸彤眼尾瞄到沈心怡臉上淺淺嘅笑容
「你明明就係想同佢一齊，做咩要逼自己否認？」李逸彤無奈一笑問沈心怡，「既然中意，就應該好好咁把握啦～」
「知你好有把握啦～」沈心怡笑着將話題引到李逸彤嘅身上，「同人地又一齊咗啦～」
「所以，你都要加油～」李逸彤以輕鬆嘅語氣講道，「既然中意，就去馬啦！」
沈心怡無奈地笑了笑，其實佢自己都知，佢應該要回答，畢竟佢嘅一個Kiss唔可以代表佢嘅回答，只可以表達出一部分嘅心意
「潘景諭都主動咗咁多啦，連先開口嘅都係佢，你都只係要比個答案佢啫～」李逸彤見沈心怡沉默不語時又緩緩開口道，「只要係中意嘅話，邊個先開口表白都唔緊要。」
「你⋯你做咩抄我講嘢⋯？」沈心怡苦笑道，呢句說話係當日李逸彤糾結緊表唔表白嘅時候沈心怡同佢講，宜家李逸彤就將呢句原封不動地還留比佢
「你都記得自己講過呀？」李逸彤笑道，「潘景諭都做好比你拒絕嘅心理準備啦～你一係拒絕，一係答應㗎啫～」
「我知⋯我應承咗佢會比一個答覆佢，我知佢等緊我⋯」沈心句微微垂低頭，一講起潘景諭，沈心怡就有啲唔自在，「我會比個答案佢⋯」
「如果你係擔心嘅話，直接將你嘅想法講比佢聽就係啦，你唔講佢又唔知，錯過唔係一件好事。」李逸彤拍一拍沈心怡嘅膊頭
沈心怡沉默不語，李逸彤講嘅說話，佢都係認同，佢亦知道，自己係時候要鼓起勇氣⋯但問題在於，佢要點樣開口同潘景諭講⋯
畢竟，「我中意你」呢四個字，唔係輕易可以講出口嘅說話
⋯
「行未呀？」邱旻顥同李逸彤孭住書包行到去潘景諭同沈心怡嘅座位
「我今日留堂。」潘景諭無奈聳肩，「但可以同你地一齊落到一樓。」
「叫咗你唔好欠咁多功課㗎啦。」邱旻顥用力地拍咗潘景諭嘅膊頭一下
四個人一齊行出課室，剩低三人番屋企，潘景諭就去留堂；李逸彤行喺邱旻顥嘅身旁，同邱旻顥自然地傾計；沈心怡行喺潘景諭嘅旁邊，佢悄悄地望潘景諭一眼
「嗯？」潘景諭因為眼睛餘光望到沈心怡望佢，便低頭望向沈心怡，「做咩？」
「冇⋯」沈心怡微笑道，「你記得帶地理書番去做功課～」
「哦，喺書包，帶咗啦。」潘景諭指一指書包，「冇嘅話問你會咪得。」
「嗰度咁多頁，我先唔會影比你⋯」沈心怡無奈地講道，「你自己記得帶書啦⋯」
「知啦知啦⋯」潘景諭微笑着點頭
眼見已經去到一樓，潘景諭同大家講聲拜拜之後就行去留堂室留堂，冇辦法，佢今個星期欠太多次功課⋯
「阿諭去留堂⋯」沈心怡喺潘景諭行開後，回頭若有所思地望向潘景諭嘅背影
⋯
潘景諭望向掛喺黑板旁嘅時鐘，已經到可以離開嘅時間
潘景諭執好嘢孭起書包行出留堂室，從最近留堂室嘅前梯打算落去地面離開學校，行到去樓梯前正要邁步嘅時候，潘景諭忽然記起沈心怡喺佢去留堂前提佢要拎地理書番屋企做功課
「係喎⋯地理書⋯」潘景諭喃喃自語着，然後將書包從後背轉到面前拉開拉鍊打算double check，「唉⋯放咗喺locker⋯」
潘景諭眼見書包入面冇地理書嘅蹤影，無奈地將書包拉鍊拉上，但佢冇即時番課室拎
IG Link: https://www.instagram.com/nd_cotttoncandy/?hl=zh-tw