［愛情純愛］我地之間嘅友誼純度絕對等於零！！！: 98. 牽手
「自戀⋯！邊個要望你？」李逸彤不禁笑起嚟講道
李逸彤嘅臉上掛着甜美嘅笑容，邱旻顥嘅心跳瞬間漏一拍似的
李逸彤面向前面坐好，從裙袋裏拎出手機打開相機嘅前置鏡頭，將手機稍微調整一下位置，由淨係影到自己到影到自己同邱旻顥
邱旻顥見到後又真係好好配合李逸彤，影相嘅時候比咗個yeah
「喂呀唔要yeah呀！」李逸彤伸手去拍邱旻顥嘅手，「擺個靚仔樣嚟睇下先啦～」
「咩樣都咁靚仔點算？」邱旻顥回答，然後佢默默地伸手托坐下巴，頭微微仰起
「高冷。」李逸彤微微側身坐，左手拎住手機，左手托住下巴同邱旻顥做出一樣嘅動作，但相機只影到李逸彤自己半邊臉
「我唔行高冷路線。」邱旻顥笑了笑，然後默默地拎出手機等李逸彤send番啲相比佢
明明佢同李逸彤都唔係真係情侶，但喺兩人嘅手機相簿內有大量只有佢地嘅合照或者對方嘅單人照
「潘景諭先行高冷路線。」李逸彤將相send番比邱旻顥，仲要特登回頭望一望邱旻顥嘅手機睇下佢收唔收到，「你行小太陽路線啦～」
「小太陽路線？邊個嘅小太陽？」邱旻顥不禁笑起嚟，明明李逸彤係佢嘅小太陽先真
「點知你係邊個嘅小太陽。」李逸彤微微聳肩示意自己唔知道，轉身坐好後卻喺心裏甜絲絲地講道：「係我嘅小太陽～」
「小太陽⋯嘻⋯」邱旻顥喺心中默念道，「李逸彤你係我嘅小太陽就真⋯」
邱旻顥托着腮耷低頭睇手機，卻偶爾不自覺地抬眼望向李逸彤嘅背影，伸手摸一下李逸彤嘅頭髮
李逸彤以為邱旻顥叫佢便回頭望，但見到邱旻顥伏咗枱上，啱啱偷摸李逸彤頭髮嘅右手伸咗出嚟
「做咩偷摸我啲頭髮？」李逸彤伸手輕輕地拍咗邱旻顥嘅手一下
李逸彤嘅手一直輕拍咗邱旻顥嘅手，喺李逸彤嘅指尖掂到邱旻顥嘅手心時，邱旻顥嘅手輕捉一下，但卻捉唔到李逸彤嘅手
「嘻嘻⋯」李逸彤意識到邱旻顥想捉佢，於是又小心地輕拍兩下，邱旻顥嘅手又輕捉兩下，「捉唔到～」
李逸彤觀察邱旻顥嘅手輕捉一下嘅時機，稍微計算咗一下之後又伸手輕拍邱旻顥嘅手
今次邱旻顥一下子就捉住咗李逸彤嘅手，李逸彤有啲愕然，邱旻顥今次都唔跟之前收手嘅時機
「你好茅呀邱旻顥⋯！」李逸彤輕輕晃兩下手，想示意邱旻顥鬆手，但又唔係真係想邱旻顥鬆手
「冇呀⋯」邱旻顥仍然伏着，微微搖頭
李逸彤同邱旻顥嘅手輕輕地牽着，臉頰忽然間有啲熱、心跳忽然間有啲快
兩個人特別有默契，大家都寧願輕輕地拖住手都唔鬆手，微微觸電嘅感覺由指尖傳到心臟
邱旻顥一直伏喺枱上，其實佢嘅臉早就紅了；李逸彤微微耷低頭背住門口嘅方向坐，輕輕地回握着邱旻顥嘅手
「我咁樣會唔會太明顯？」李逸彤不禁喺心裏問道，「但我唔想鬆手住⋯」
邱旻顥嘅手冇郁，畢竟佢已經輕輕地將李逸彤嘅手握住，佢冇難為李逸彤，李逸彤想要鬆手嘅話只要抽手就可以
「如果佢想鬆手嘅話，我都唔會阻止佢⋯」邱旻顥喺心裏道，但與此同時，邱旻顥嘅手卻不自覺地用地握一下李逸彤嘅手
李逸彤望一望邱旻顥，佢唔知邱旻顥呢一下係咩意思
「彤彤！」沈心怡從座位起身同時叫咗李逸彤一聲，「差唔多啦～」
李逸彤聽到沈心怡叫自己，連忙抽手起身；邱旻顥緩緩地坐起身發兩秒呆後起身
佢地行到課室外面嘅走廊，李逸彤同沈心怡行喺前面，李逸彤回頭朝身後嘅邱旻顥望一眼，邱旻顥對佢笑一笑，李逸彤頓時露出笑容
喺對上視線嘅一刻，蜜糖一樣甜嘅感覺喺兩人嘅心裏滲出，滲到每一個角落，啱啱就當成係兩個人之間嘅秘密
「其實明明⋯我地可以一齊呀⋯」呢個想法忽然間喺李逸彤嘅腦海中閃過，「我係唔係應該先打破呢層紙⋯？」
⋯
「拜拜～」李逸彤同沈心怡對兩個落車嘅男仔揮一揮手，待車門閂上後，李逸彤笑了笑講道：「今日撇甩佢兩個去食嘢～」
「嘻嘻⋯咁我地都好耐冇一齊單獨兩個人去食嘢嘅～」沈心怡望住李逸彤講道，明顯地係有弦外之意
「今日就同你去食嘢！唔理邱旻顥㗎啦！」李逸彤一臉堅決地講道
「你講呀？你點會忍心唔理佢呀～」沈心怡嘅聲線裏係滿滿嘅不信任，忍唔住偷偷一笑
「佢又唔係我嘅一切，點會唔忍心⋯」李逸彤無奈地講道，不過確實地佢又真係唔會忍心唔理佢
兩個少女去到一間環境好好嘅cafe，坐低喺窗邊嘅位置，光亮度令人舒服又放鬆
「食咩好⋯」沈心怡拎住餐牌細聲地喃喃自語，「我應該飲呢個，白桃特飲。」
「哦好呀～」李逸彤抬頭望一眼沈心怡微微點一點頭
諗咗好一陣之後，佢地終於決定好食咩，喺等待嘢飲到嚟嘅時間，自然而然會傾下計、講下日常事
「你同邱旻顥最近係唔係進展良好？」沈心怡先開口問道
「Okay啦，都冇咩良唔良好嘅⋯」李逸彤有啲遲疑地講道，「我喺度諗緊，我係唔係應該主動啲開口，但又覺得如果我做表白先嗰個好似唔係幾好⋯」
「其實又冇咩所謂嘅我覺得⋯」沈心怡飲咗一細啖蜜桃特飲，「只要係中意嘅話，邊個先開口表白都唔緊要嘅⋯」
沈心怡嘅手輕輕地扶着玻璃杯，唇輕輕地掂着飲管邊，腦海中浮出一個人嘅身影
IG Link: https://www.instagram.com/nd_cotttoncandy/?hl=zh-tw