[愛情] [校園] [足球] 我鐘意你　但係我唔可以同你一齊: 17.

練完番到去好快就訓著左，第二朝好早就起左身，約左啊婆早少少到附近買個早餐入運動場食。

晨咁早就見到啲中六係度練緊表演嘅項目，事關每年中六嘅學生都要做埋個啲傳火炬儀式，加埋啲表現，諗起自己都要做就麻煩

「喂，屌你遲啲我地係咪都要做埋啲咁戇鳩嘅野㗎」我係看台望住樓下跑道問啊婆

「唉我估都應該要㗎啦，每年成個中六都要做，除非你請假啦」啊婆答

我同啊婆一路食住早餐一路睇下電話咁，好快就夠鐘集合





點完名，校長又講完啲廢話之後，運動會嘅第二日正式開始！

因為今日上午嘅賽事我淨係要跑100米嘅複賽，最快個8名就入決賽爭冠軍，所以我都比較得閒

我就決定周圍行下，去其他班同級別嘅足球隊師弟吹下水影下相

「係喎，不如我地叫全部B grade嘅足球隊影番張大合照好唔好？」啊婆問我地

我點頭回應「好啊，我地分頭去搵人啦，之後係呢到集合」





最後我地搵齊哂唔止B Grade嘅人，就連其他A 同 C Grade嘅人都有係度，我地影完張大合照之後大家都留左係度傾計

傾左陣，聽到有個好重要嘅廣播

＂男子100米乙組複賽名單如下，林xx，李xx......＂

講左幾個名之後　＂馬子朗，林以行＂ 全部人都望向我地嘅方向，有種仰慕嘅眼神，「足球隊之光，就靠你地屌打班中四仔啦」有個C grade嘅師弟同我地講

我同啊行都對望左一下，笑左一笑，雖然我同啊行都知道要跑複賽，但係都知道入到去唔會贏





是因我地第一年上乙組，要同埋啲中四跑，所以入決賽嘅機會都好渺茫。

無辦法啦，盡力跑就算

好快我地就番左埋自己位，去番自己個班休息左陣準備一下一陣嘅複賽

後面有人拍左拍我膊頭，我向後望，係黃曉瑩，「勁喎入左複賽，係咪要入埋決賽攞多個牌呢」佢上前問

「仲以為你留意唔到添，咁都比你聽得到」我講

佢面突然紅左講　「我都係咁岩聽到㗎咋，見係乙組咪聽下囉」

我其實無乜信心入決賽，同佢講「我盡量啦，你都知今年要同埋啲中四跑，大成年可能都未必入到決賽，陣間仲要4*100，其實我己經諗緊留唔留力好」

「邊可以留力㗎！咁難得你入到去跑，就要用盡全力！你入到決賽嘅我就請你飲野啦！」黃曉瑩鼓勵我





「一言為定～唔好走數啊！」我伸手想勾佢手指尾

佢見到我伸手都伸出左佢隻手　「好！我講嘅！」我地勾左手指尾，承諾都達成左，依家睇嘅就得番我可唔可以做到

好快就有廣播集合100米嘅複賽，首先嘅係班丙組跑先，我望一望我個組，除左同我一樣中三嘅人之外，中四嘅全部都高我起碼半個頭

＂痴撚線，點撚樣跑啊，腳都長我幾折啦＂我心諗

啊行係我前面個組，佢依家就開始跑，" on your marks, set , 咇！＂

啊行一支箭就跑撚左上第一名，隨後中四嘅學生都追佢唔到，啊行可以話係足球隊入面最快嘅一個，佢快我少少，但真係無諗到佢跑第一

見到啊行係終點慶祝緊，似乎佢都知道自己有得入決賽





我都唔可以執輸，為左自己，為左承諾，"on your marks ，我慢慢跪低，做出起跑姿勢, Set ! "

"咇！！！！＂我應聲跑出，今次嘅反應好快，節奏同哨子響起嘅時間一模一樣，眼見自己係起跑後無人係我附近，我搏哂老命全力咁跑，唔敢望後面側邊，淨係不斷向前跑向前跑

最後20米，隻腳開始已經無咩力，我用我淨餘嘅意志力，依家已經唔再係力量嘅對決，聽到好多人嘅大叫聲同歡呼聲，最後我衝左線。

衝完線之後，見到電視機板出現左賽果，第二名..... 啊行都未走，佢睇到我岩岩嘅賽事，見我訓低左休息即刻過黎

「屌，差小小就第一啦，你本身由頭帶到最後，但係條友最後20米勁撚快」啊行扶我起身講

「你覺得我第二名入唔入到決賽？」我問啊行

「咁就真係唔知啦，仲有幾組係你後面，睇佢地做化啦，不過你都真係幾撚快，比啲信心自己」啊行難得唔串我

雙腳已經無哂力嘅我，慢慢行番上看台，5分鐘嘅跑程我行左15分鐘，因為真係好撚攰





上到去，同班同學見到我之後都一一過黎「嘩，你個起跑真係好快，今次仲唔入決賽？」其中班上嘅一個男同學同我講

「唔知啊，可能之後啲人仲快過我呢，你睇下啊行幾快就知啦」我指一指啊行

「無事嘅，你都唔係同啊行差好遠，其實你地都真係一樣快,五五開啦」啊柔都有睇到我嘅比賽

我即刻問啊柔，「你有無見過黃曉瑩？」

啊柔見到我問關於佢嘅事，笑意淫淫咁同我講　「人地好似去左小食部買野」

「做咩笑到咁喎，唔該哂」講完之後我就坐番低

＂唔知佢有無睇我跑呢岩岩，聽到觀眾嘅大叫聲，唔知佢有無份叫呢？＂　我自己坐低左係到諗





呢個時候，啊婆過左黎「喂，做咩諗野啊，驚入唔到決賽啊？」比佢知道左我諗緊野，好彩佢唔知我諗緊啲乜，如果唔係就好撚基了

「係啊，跑第二未必入到㗎嘛，你知啲中四跑得咁撚快」我講左個大話

佢拍拍我膊頭講，「得啦，邊會有人快得過我地xx中學法拉利朗哥」我以前小學吹自己個朵佢依家都攞番出黎講

「喂，唔好提個朵啦，依家諗番都覺得柒」我嬚棄

「你支野飲啊」黃曉瑩呢個時候突然出現左係我地面前比左支能量飲品我

我有啲驚訝同佢講，「我未入㗎喎，我跑第二啊岩岩」

「下係咩？？但係你咁快都好難唔入喎，我預左你入㗎啦哈哈所以岩岩完左就即刻去左買定先」黃曉瑩聽完我講之後都好驚訝

「咁多謝哂先啦，陣間等住聽我好消息啦！」我甜甜笑住同佢講

「好啦，我番埋位先啦，朋友叫我影相」佢講

「好啦一陣見～」「一陣見」我地大家講

估唔到佢一睇完就即刻當左我贏，佢咁樣做真係比左好大信心我，就好似覺得自己真係入左決賽一樣

正當我仲甜笑緊嘅時候，隔離啊婆大力拍一拍左我個頭

「笑撚完未啊，我都就黎比你閃死啦屌你」啊婆半嬲半搞笑咁講

「咩閃死啊，佢話我入到決賽請我飲野咋嘛」我否認

佢即刻指住我個笑容，「你咁樣甜笑法，仲話無野？你係咪當我傻仔先？」

「下真係好甜咩笑得...我地真係無野喎」我再次唔認

「你仲唔係鐘意人？之前都無見過你笑成咁」啊婆問

「唔知啊，好感掛，過多排先算啦，喂一陣食咩好」我拉開話題

「唔知喎，問下啊羊佢地囉」佢答

就係咁好快就完左呢個話題，都好快去到食飯時間