只想和你愛一次: 9. 生日禮物
轉眼間Ada已回英國差不多一個月，而這天Rachel正在房裏苦惱著，因為下星期便是Daniel的生日，她正沉思自己該送他一份怎樣的生日禮物。
「Susan，救我呀!」
Susan:「仲未諗到送咩?」
Rachel:「係呀，毫無頭緒... 」
Susan:「你識咗佢咁耐都唔知佢咩喜好㗎咩?」
Rachel:「大概都知嘅...你覺得送啲實用嘢好定奢侈嘢好?」
Susan:「我覺得...可能搵返個男仔比意見會好啲...」
「你唔係又打Elven主意呀?」Rachel霎時便猜到Susan心思。
Susan:「所以我不嬲話你最醒目~」
Rachel:「你記唔記得上次自己講過啲咩?」
Susan:「記得呀... 放心啦，今次我純粹係為你好，唔係為自己㗎，男仔始終會了解返男仔想收啲咩禮物多啲嘛~ 定你想我搵Peter呀?」
「呀... 你贏...」聽到Peter這名字Rachel無奈答道。
Susan:「咁交比我約佢啦~」
三天後
「Susan咁耐都未到嘅?」Elven和Rachel已在相約的地點等了一段時間後Elven問道。
Rachel:「係囉，都過咗十五分鐘，佢好少遲咁多㗎喎...咦，佢打嚟喇， 喂 你去到邊呀?下?哦...咁好啦。」
「佢做咩?」見Rachel收線Elven便問。
「佢話佢大學突然有嘢攪嚟唔到叫我地行住先喎...」憑自己對Susan的了解加上上次的對話，Rachel對這原因的真實性抱有懷疑，但她當然不能對Elven坦白。
「哦...咁我地照行啦，你初步有無咩諗法?」Elven倒是沒想太多完全沒有懷疑。
「我都係諗緊佢鍾意嘅玩具定係實用性比較高嘅嘢咋，例如遊戲game模型類或者係手錶銀包類，因為見佢用緊嘅哩兩樣嘢好似都舊舊地喇。」Rachel亦接受了現況不再想太多。
「唔好遊戲摸型嗰啲喇，唔夠touching，錶同銀包幾好呀，又貼身可以日日見到就會諗起你~你諗下每次佢拎銀包出嚟比錢嗰陣都會諗起你，或者每次睇錶都諗起你提醒自己唔可以遲到，你暗地裏控制晒佢嘅財政同時間，都幾呀好~」Elven提議道。
「哈哈哈，咁都比你諗到，仲幾有道理喎！」聽到Elven的解釋Rachel忍不住笑道。
Elven:「咁有目標就出發lu~」
接著Elven和Rachel便在油尖旺區不同的店鋪穿梳，而逛街途中，Rachel發現Elven好像有個習慣永遠都會故意企在二人較近馬路那邊。
可惜行了大半日後，Rachel還是沒有看中的禮物，望著天色已開始轉暗，她便對Elven說
「睇嚟今日都未必搵到了...你夜晚有無嘢做?食唔食埋飯?」
「可以呀~」Ada之前的說話讓Elven理性上覺得應該拒絕，只是感性輕易戰勝了理性。
Rachel:「咁你陪咗我成個晏晝，我請你食飯啦~」
Elven:「又你請?唔得~我好大男人㗎，點可以要你連請我兩次呀，今次我請啦!」
Rachel:「睇唔出你係大男人喎~但咁到我會唔好意思...」
Elven:「覺得唔好意思你就當差我一個人情或者一陣講個大秘密我聽啦~」
「咁都得?又好~」知Elven主意已決Rachel亦不再推辭。
這次他們到了一間日式串燒店晚餐。
「得返一星期你份禮物點算好呀...」點了食物後Elven又問。
Rachel:「唔知呀，睇唔啱都無計...」
「嗯...有計！現成睇唔啱咁不如自己造一個?我見依家有啲 班可以教人自己整銀包，咁咪又啱你心水又夠晒心意囉！」Elven突然想到這提議。
「聽落幾好喎!.係唔知趕唔趕得切...」Rachel聽後亦覺得這提議很不錯。
Elven:「等等，我有朋友可能幫到手。」
接著Elven撥了個電話後，然後又面向Rachel問
「你明天得唔得閒?我個fd話明天咁啱有班，快嘅應該一兩日攪得掂㗎喇~」
「好呀，返完教會後我ok呀。」Rachel很快答道。
「好，攪掂~我send咗時間同地址比你喇。」過了一會Elven和對方收了線不久便對Rachel說。
Rachel:「收到，唔該晒~」
第二天，完了教會後Rachel便趕到Elven給的那地址開始學習製作銀包，不過在到達現場時卻看見Elven也在那裏。
「點解你喺度嘅?今朝又唔返教會!」
「為左晏晝嚟哩度所以朝早有啲嘢要做咗先呀... 諗諗下我都想整個銀包送比Ada當禮物所以咪索性同你一齊整囉~」Elven帶點尷尬地解釋。
Rachel:「廿四孝男朋友呀~ 不過有人陪一齊整都幾好~」
接著兩人都很專心開始製作自己的銀包並順利在晚上完成。
Rachel:「攪掂~」
Elven:「我都攪掂lu~ 睇下你嗰個先... 嘩，好靚喎!」
Rachel:「你嗰個都好靚呀!」
(Daniel/ Ada真係幸福呀...)
看完對方的的製成品，雙方好像都更喜歡對方的銀包多於自己所製造的。
由於已經到晚上較夜的時間，Rachel和Elven很快一起吃了個M 記後Elven便送Rachel到巴士站。
「係喎，你幾時講你同Ada嘅故仔我聽呀?」途中Rachel突然問。
Elven:「你無聽Susan講過咩?」
Rachel:「肯定無你親身講咁好聽嘛!」
Elven:「有機會先啦，而且你唔好唔記得明明係你仲差我一個秘密喎~」
「係喎..你唔講我都真係唔記得添~」Rachel一副忘記了的樣子。
Elven:「所以依家咪專登提....」
Elven說不下去是因為他突然看見旁邊馬路上有架私家車不知是司機睡著了還是甚麼原因正向行人路上的他們高速衝過來。霎眼間他判斷出自己若拉著Rachel躲避必定閃避不及，沒經思考他立刻把Rachel抱在懷內然後用自己背部面向私家車希望自己的身體能盡量給對方作出遮擋和保護。而當Rachel被抱在懷內時亦看見了私家車正高速駛向他們，腦袋已經不能思考的她只能認命般地閉上眼睛﹐這刻她終於明白為何Elven總是企在近馬路的一邊，因為這就是Elven的細心...
就在汽車快要觸碰到Elven背部的一刻，幸好司機好像及時清醒過來並立刻轉彎走回上馬路然後繼續向前行。
從鬼門關走回出來，心貼緊心的Elven和Rachel都能清晰聽見對方和自己的心跳聲。
「你無事嘛?」過了數秒鐘還是Elven首先從驚嚇中清醒過來把Rachel從懷中放回出來緊張問道
「無...」不過Rachel卻不願出來並反抱著Elven回應道。
「無事喇唔駛驚，架車走咗我地安全喇… 哈，我地啱啱係咪都算叫一齊經歷過生死?」Elven以為Rachel還在驚嚇中未回神過來便繼續抱著她並輕輕拍打著她的背部安慰道。
「你仲笑得出！你係咪傻㗎，頭先做咩自己唔走仲用個身保護我呀！」而Rachel終於忍不住責備Elven。
聽到Rachel的責備，Elven才突然醒悟自己剛剛的舉動好似有點偉大。
「我無諗咁多呀...頭先下意識淨係諗點都唔可以比你受傷咋...」Elven緩緩答道。
世上沒有多少女人能對願意捨身保護自己的男人無動於衷，Rachel亦不例外，這刻心臟強烈的跳動讓她知道自己對眼前的男人心動了。
「傻佬!」她把Elven抱得更緊，因為她知道這次後可能這一世也不會再有機會能這樣抱著Elven。
被Rachel抱著，Elven腦海突然又有一種好滿足和感動的情緒，他很想用力反抱Rachel但理智卻極力控制著自己...
「最緊要依家大家都無事~」他只能邊繼續輕輕拍打對方的背部安撫著她邊說道。