全實景系列《香檳大厦 1:55 am 行人止步》重製版 (已完結): 第四章：【頸椎折斷的人】
20:45 – 香檳大廈B座8樓
「呯」一聲，電視機跌落地下，阿Ken定一定神。Fiona同史提芬畀阿Ken突如其來嘅舉動嚇到彈起，擰過嚟望住佢異口同聲講：「做乜嘢呀？」
「無事，我唔小心撞跌咗部電視。對唔住呀Na姐，我會賠返畀你。」阿Ken個心仍然「怦通怦通」咁亂跳，腦海入面嗰張慘白嘅面孔揮之不去。
阿Ken一直自以為大膽，無乜嘢可以嚇到佢，無理由一個咁嘅鬼樣就可以令到佢毛骨悚然，尤其係透過閉路電視嚟睇，塊塊面都係白白地㗎啦。
稍稍冷靜落嚟之後，佢先意識到成個畫有咩唔妥。
螢幕入面嘅黑衣人拖住個醉酒佬，背住鏡頭一直向前行，然後去到爛門前突然停低，擰轉頭，直接望上嚟個鏡頭度。阿Ken只係再諗多一陣，恐怖感就再次襲擊全身。
畫面入面嘅黑衣人只係擰轉個頭，但個身係無郁過。只有頸椎折斷嘅人先有可能咁樣做。
而頸椎折斷嘅人應該早就死咗……
「喂，你無事嘛，流咁多汗嘅？」史提芬走過嚟拍阿Ken，嚇到阿Ken成個人又再彈起。此時，Fiona都一齊走過嚟，仲遞咗張紙巾畀佢：「你無事丫嘛？係咪唔舒服呀？」
「咳咳……」阿Ken大力地咳咗兩聲，清一清喉嚨，掩蓋住發抖嘅聲線：「無事，真係無事，呢度有少少焗，Na姐我哋走先啦。」佢含糊地帶過，順便執走地下套錄影系統：「我去鴨寮街配返副畀你。」
阿Ken唔想Fiona知道佢發現咗啲乜嘢。Fiona平時好細膽，見到房入面有蜘蛛都會大叫一餐，有次仲唔顧得無著上身衫，得返個Bra咁撲出嚟搵外展員佢地入去打蜘蛛，攪到佢地勁老尷，打又唔係唔打又唔係。如果今次畀Fiona知道佢地條走廊有污糟嘢，阿Ken估計Fiona應該都唔會再返嚟開工。
前提係，阿Ken覺得未完全搞清楚到底自己真係見到乜嘢之前，好似唔應該多講。
「如果係惡作劇，咁我咪瘀爆？」佢心諗。
但要搵個人喺一星期前凌晨拍一段咁嘅嘢，但又預計唔到係咪有人會咁無聊睇返，整蠱嘅可能性根本係零。
阿Ken夾硬拉走史提芬，喺八樓後樓梯一直行到落二樓先轉返去前梯落地下大堂。接近晚上九點，香檳大廈仍然充斥住男人同埋男人嘅汗臭味，樓下嘅看更叔叔同另一個阿伯吹緊水，用奇怪嘅眼神望住佢哋喺正門衝落嚟。佢地兩個一直去到相機鋪頭門口先停低喘氣。
「喂﹗你究竟攪乜鬼嘢呀Ken，無啦啦拉住我咁快走做咩啫？你搵到我哋要睇嘅嘢未呀？」史提芬好似有啲嬲阿Ken破壞咗佢同Fiona打機嘅機會。
阿Ken仍然答唔到咀，繼續喘氣。
「阿Ken，你話我知你見到乜嘢？」史提芬好慢咁問。
「我．好．似．見．到．鬼…」阿Ken逐個字回答。
「Shit！」史提芬爆了一句，全身毛孔一下子豎起來。
兩個人沉默了好一會。
「你講多次？咩有鬼呀？」史提芬故作鎮定，但阿Ken感覺到佢其實係有啲騰雞：「你唔好嚇我呀，我唔嚇得㗎！」
「唔止……有鬼，仲死咗人……」阿Ken嘅氣喘開始平伏下來。
其實阿Ken都唔百份之百肯定，但頭先見到史提芬同Fiona玩得咁開心，又唔抵得想講得誇張啲嚇鬼佢一次。
「你喺裡面睇到？」史提芬指一指部錄影系統問。
「嗯。」阿Ken用手掌拍拍部機。
史提芬再次露出一副驚恐又難以置信嘅表情：「唔係咁邪呀？香檳有鬼？」
一聽到個「鬼」字，阿Ken即刻掩住佢個口。看更、阿伯、連門口收緊檔嘅賣報紙阿姐都擰轉頭望住佢哋。
阿Ken再次扯住史提芬衝出香檳大廈，一直衝返去佐敦辦公室。
*************************************************************************
21:10 - 佐敦測試中心辦公室
「咁遲返嘅你哋？嗱﹗過咗嗰一個鐘無得claim返㗎！」黃經理見到阿Ken同史提芬返嚟嘅第一句說話。
阿Ken無理到黃經理，捉咗史提芬入活動室，閂埋門。
阿Ken四圍望下，確定無人之後，好快又好鄭重咁同史提芬講：「我喺閉路電視片段入面見到係乜嘢清走我地啲擺設，唔止係清嘢咁簡單，仲見到有個醉酒佬畀個唔知係咩嘅咩嘢殺咗，嗰隻咩嘢仲好陰森咁厲住我！」
「喂，究竟係咩嘢嘅咩嘢呀？你講清楚啲好唔好？」史提芬好緊張咁問。
阿Ken停咗兩秒，深呼吸一下，然後原原本本，一五一十咁將頭先喺Fiona房內發生嘅事全部話晒畀史提芬知。
史提芬聽完之後，成個人靜晒。佢哋兩個無再出聲，大家都dead air咗一段時間。
「會唔會係你睇錯呀，拍戲咋？」沉寂完一輪，史提芬首先開口，第一句就質疑阿Ken。
但史提芬自己都未睇過條片，都唔敢肯定。
阿Ken二話不說拉開個已經變咗形嘅機頂，望一望部錄影系統裡面嘅結構: 「主要hard disk無砸爛。我就試吓拆咗個hard disk，駁入部電腦睇下有無壞，希望有機會睇返段錄影。」然後一支箭咁走咗出活動室，喺出面攪咗一大輪，然後又衝返入活動室拆機。
史提芬全程就喺度邊玩電話邊等阿Ken，一粒聲都無出過。
「喂！你唔好同Fiona講住呀，我哋而家都唔肯定係咪睇錯，無謂嚇親人哋先啦。」阿Ken一路拆機一路同史提芬講。
「我唔係話佢知呀，我search緊新聞睇下呢個星期有無失踨人口或者同香檳有關嘅新聞呀。」史提芬答。
阿Ken無再理佢，腦裡面諗緊第二個問題：「如果要插個hard disk，係需要一部電腦，但佢屋企只得notebook，而且拆咗又無保養，得返公司呢度有desktop可以拆，但佢只係個part time仔，又無權限自己用電腦……」
對於係咪咁想睇返段片，阿Ken有認真咁諗過。其實個恐怖感過咗一個鐘之後已經無咁强烈，取而代之嘅係阿Ken想搞清楚自己到底睇到啲乜。
轉眼間，阿Ken決定走出活動室。
「黃經理，我諗我知道係邊個搣咗我地擺喺香檳嘅宣傳品。」佢向黃經理個位行過去。
黃經理抬頭望住阿Ken，皺一皺眉：「係個看更？」
「唔係，你睇下呢個就知㗎喇。」阿Ken舉起個hard disk，然後話俾黃經理知睇Fiona閉路電視錄影嘅經過。
黃經理聽完之後，即刻熄咗部電腦，幾乎喺阿Ken手上搶走個hard disk，一手一腳駁入自己部主機。
已經差唔多晚上十點，早就過咗阿Ken同史提芬收工時間接近兩個鐘。阿Ken覺得好攰，但佢成個腦都係呢件事，揮之不去，甚至連肚餓嘅感覺都消失埋，而且個頭仲開始有啲痛。
「Ken，你快啲過嚟睇下。」史提芬喺活動室大叫。
阿Ken下意識認為佢應該係搵到啲資料，即刻飛奔入房，點知走得太快，踢到放喺走廊一箱箱貼好宣傳貼紙嘅安全套，掉到一地都係。但佢完全無諗過走去執，快步直接走入房睇下史提芬搵到乜。
「點？係咪有發現？」阿Ken緊張地問。
「喂，原來香檳曾經死過人㗎。」史提芬出奇地鎮定。
「死咩人？點死？」阿Ken越嚟越心急。腦海裏面除咗出現被拖出血痕嘅醉酒佬，仲仍然覺得疑惑：「越諗就越想知道件事係咪真。如果唔係，我咪白驚？好柒喎。」
「2011年4月29日，一中年男子被發現倒斃於其中一名鳳姐單位的浴室，懷疑心臟病發，由鳳姐報警，警方調查後無可疑……」史提芬慢慢地讀出嚟。
「5年前啦喎，有無啲近排㗎？有無搵過失蹤新聞？」阿Ken即刻追問。
「呢兩個星期只有三宗失蹤報導，兩個阿婆一個學生妹……無男人失蹤喎。」史提芬邊睇邊答：「個hard disk睇得返啲記錄未？」
「我交咗畀黃經理整緊。」其實阿Ken都唔知佢要整幾耐，但既然黃經理肯幫手整，咁佢就放心。
「…如果無失蹤記錄，又已經過咗成個星期，條片都應該都唔係堅嘢掛…」阿Ken心諗。
「失蹤人口最早都要48小時先可以立案，一個大男人西裝骨骨咁應該都係要返工㗎啦，要返工就會放工，如果放工無返到屋企，屋企人都應該會擔心掛，咁係咪應該會報警呢？但如果佢係一個嚟公幹嘅單身男人呢？喺香港無人無物，啲人又以為佢走咗，咁咪唔發覺其實係失蹤？如果真係咁，無人報警都有可能㗎噃。」阿Ken似乎諗得太多，頭又開始痛。
「最近都無任何特別新聞，我諗應該都唔會係堅掛。」史提芬補咗一句，仍然繼續搜尋。
「呯！」辦公室正門係一道鋼門，每次開門閂門都會發出巨響。阿Ken走出活動室外面，想睇下黃經理整唔整到個hard disk。
赫然發現，唔見黃經理喺個位，甚至連佢個背囊都唔見埋。
呢個時候史提芬都跟埋出嚟，睇吓發生乜事。
黃經理部電腦無熄，正確啲嚟講，佢撳停咗睇緊嘅畫面，而呢個畫面就係hard disk裡面嘅錄影片段。
黃經理似乎走得好急，枱面上留低咗張紙，上面草草記低咗兩組數字，一組係201606100437，第二組係201606120200，睇排列應該係錄影片段嘅時序。兩組時間都係大半個月前。
阿Ken直接拉去第一組時間，然後按「Play」鍵，四格片段同頭先喺Fiona房睇嘅一模一樣。幾秒之後，一個不可思議嘅畫面喺阿Ken同史提芬眼前出現。
一隻喼喺八樓走廊「行」過，但無人拉住。
個喼大概「行」咗六秒左右，應該由中間樓梯開始出嚟，一直「行」入去爛門嗰間房。由於鏡頭有死角位，所以捕捉唔到確實出現嘅位置
「喼？」阿Ken突然記得自己下晝由門罅望入去走廊尾見到嘅嗰隻喼，佢即刻起晒雞皮。
佢再拉去第二組時間睇，見到有一件紅色嘅Tee喺嗰間爛房門口嘅地下，佢望住件Tee，再望望自己著緊件衫，無論係嘅款式、顏色定係印花，同佢宜家著住嘅嗰件衫都係一樣。
「啊……」突然間，阿Ken好似諗到啲嘢。
(待續)