那些年，我最愛的兩個女孩子: 28

暑假每一日，我星期一班五都會去自修室溫書備課，而星期三晚同星期六就成班一齊去打波，所以詩敏星期五晚會同我兩個人去射下波，然後佢就去我到瞓，到星期日晚我地就返契媽到食飯
 
詩敏係我屋企時，永遠都係同我孖鋪，家姐講過幾次，同詩敏講佢大個女架啦，不過都係冇用，所以索性唔理我地，可能家姐認為咁樣仲好，有個人可以看實我
 
 除左打波之外，我地成班都會去踢波，不過好難搵夠10條友，所以踢波次數係比打波少，但係都係淋唔熄我地踢波嘅一團火架!!!係足球場上，我係一個守門員
 
今晚，我溫完書之後，成班去左球場踢波
 
「喂踢波啦!!!」
 




一班升F.4嘅學生，大家都踢得好開心。佢地覺得好奇怪，今晚詩敏冇黎陪我，食飯果時，佢地都係到問我
 
「阿風，詩敏係唔係你女朋友?佢升F.1咋喎」
 
我係到淥緊牛肉，係肥牛
 
「詩敏呀?唔…可以話係，又可以話唔係，我地兩個關係好迷離下」
 
「即係點呀?」
 




「我媽咪臨走之前，想我娶詩敏做老婆」熱辣辣嘅牛肉進入我口，正
 
「點解呀?」
 
「因為當年媽咪係契媽手上搶左爸爸過黎，媽咪想贖罪，咁佢又知詩敏由細開始鍾意我，所以好想我娶詩敏」
 
「但係恐怖雞有冇反對?」
 
「契媽話由得我地兩個自己發展」
 




「但阿風你自己呢?」
 
突然俾佢地咁問一問…我都諗左好耐
 
「我呀…唔….小學果陣鍾意過一個女仔嘅」
 
「好靚架?」
 
「幾啦，佢心地好好嘅」
 
「你仲有冇同佢聯絡?」
 
「冇呀，我只係知佢入左間好勁嘅女校，到而家我仲搵緊佢」
 
「好勁?DGS?協恩?」




 
「佢一定係揀返西區或者港島嘅學校，要佢過海佢會想死，佢可以幾年唔過海都得」
 
「咁即係….西區….聖嘉勒?英華?鴨真同港真?」
 
「聖嘉勒一定唔係，家姐幫我問過」
 
「即係…英華女校喎，好大機會」
 
「所以」我吞埋舊牛肉
 
「可能叫詩敏幫我搵搵啦」
 
「佢入左英華呀?」
 




「你地有咩好驚訝?佢讀書一向全級頭五名，而且契媽又係英華畢業又教書，詩敏入英華好正常者」
 
「咁佢會唔會公開同恐怖雞關係?」
 
「唔會啦，佢應該想低調D」
 
「不過你叫詩敏幫你搵人，佢未必肯喎」
 
「點解呀?」
 
「我地成班都睇得出佢好鍾意你啦」
 
「咁冇辦法架啦」
 
「不過呢…你有冇發現…阿熙好似對詩敏有D野喎」




 
「下?佢對詩敏?」
 
「少少啦」
 
「咁我係咪要退出?」
 
「佢以為你兩個拍緊拖，或者你鍾意人，所以唔郁手囉」
 
估唔到…詩敏咁細個已經吸引到男仔