我娶左個台妹做我老婆啊!: Chapter 37
「有咩咁好笑呢請問?」我問嘉欣。
「見到有個人逃避緊個Ex,但又唔知點開口啫。」嘉欣笑住咁講。
「你幫我唔到㗎啦,算啦都唔好理佢啦。」我話。
「有咩咪講出嚟囉,我同你咁老友。」嘉欣話。
「聽日佢都會喺度⋯⋯」我話。
「咁我明啦!話唔定我幫到你呢。」嘉欣奸笑。
「你幫到我?點幫我呀?」我問嘉欣。
「唔話俾你知等你心思思。」嘉欣話。
「即係點呀?」我諗極都諗唔明。
「不要問,只要信!你再問我嘅話我真係嬲㗎!Ok?俾返部電話你先!」嘉欣話,同時佢都俾返我部手機。
既然嘉欣咁講,我就無謂再勉強落去,希望佢真係可以幫到我啦。雖然嘉欣搶咗我部電話去睇我同Jane既對話,但係唔知點解我完全冇嬲到佢。反而而家仲有一種莫名其妙嘅輕鬆,好似放下左心頭大石咁樣,甚至乎好期待聽日到底嘉欣會用乜嘢方法去幫我,真係好期待呀!
見到嘉欣可愛嘅美貌,迷人嘅身材,我相信每個男人見到佢都會把持唔住。但係嘉欣最吸引我嘅就係佢有一種簡單實際、溫柔善良嘅內心。死啦死啦我真係鍾意咗嘉欣啊點算啊?
![](https://cdn2.ettoday.net/images/5174/d5174151.jpg)
「做咩咁樣望住人哋喎?」嘉欣嗲住我講。
「你好可愛啊⋯⋯溫嘉欣!」我邊講邊摸嘉欣既瀏海,搞到佢好霖。
「你望吓嗰邊先,睇吓佢哋,哈哈打到你啦!」嘉欣講完就打咗我個頭一下。
嘉欣打完我之後,我望返去客廳嗰邊,屌你老味原來Samuel佢地已經喺窗邊食緊花生望向我同嘉欣,等緊我出醜,而嘉欣就不斷喺度笑。
見到佢哋喺度食花生,我當然即刻舉中指啦!留意番,舉中指只係代表我同佢哋嘅溝通方式,並唔係真心嬲佢哋。
於是我同嘉欣開返門行返入去,見到佢哋手指指咁樣指住我哋兩個,我就知佢哋不懷好意。
見到個錶,原來已經差唔多11點幾,為免阻住Samuel呢位新郎哥休息,我同嘉欣就先行一步,揸車返屋企。
「哈哈哈你班兄弟好好笑呀!」嘉欣話。
「好笑呢?仲好笑啲都仲得呀!」我話。
「係咪啊?下次要向佢哋請教下先!你諗住聽日點着?」嘉欣話。
「咪又係老西!咁你呢諗住點樣着啊?」我話。
「未諗到啊,不如你幫我諗啦!依家要專心揸車!」嘉欣話。
「係嘅係嘅!」我話。
返到屋企,就見到爹哋、媽咪、舅父、舅母佢哋四個又喺度游緊乾嘅蛙泳(即係打麻雀)。當然佢哋見到我同嘉欣返嚟,就不斷喺度咁樣奸笑。
同佢哋打完招呼之後,嘉欣就走咗去沖涼先。得返我哋幾個人喺度。
「你兩隻野咁夜去咗邊呀?」爹地問。
「頭先去左飛機佬屋企,幫佢佈置囉!聽朝仲要陪佢去接新娘。」我話。
「佢就好啦咁快就結婚,幾時輪到你呀?」媽咪問。
「唔知呢?」我話。
「Leslie,你聽日諗住渣㗎FD2去陪Samuel接新娘啊?」舅母問。
「冇計啦,反正又唔係我做主角。但係飛機佬話要我帶埋嘉欣去,同埋可能會見到Jane。」我話。
「咁你仲唔識做?仲渣㗎FD2去?」舅父話。
聽完舅父咁講,我完全諗唔明佢講乜嘢,老老實實其實揸FD2做花車都唔係好失禮姐,我唔覺得有啲乜嘢問題喎!講返我舅父,佢係一個歐洲車死忠,好鍾意玩開舊款嘅歐洲車,唔似得我同爹哋咁只係鍾情於H車。
突然間,舅父就俾咗佢條寶馬M3車匙我。但呢一刻我都仲唔明點解佢會咁做。
「嗱,車匙!」舅父話。
「做乜會比車匙我嘅?」我問。
「你舅父叫你攞部M3車嘉欣去約會。你識做㗎啦!你記得呀除咗嘉欣之外你唔可以車其他女仔呀。」爹哋話。
「仲唔快啲多謝你舅父?」媽咪同舅母異口同聲咁講。
「多謝舅父。」我話。
呢個時候,嘉欣就出左黎。突然間媽咪同舅母就帶左嘉欣入左房,唔使問肯定幫佢扮靚靚呀。不過無論嘉欣點着都好,佢永遠都係我心目中最靚嘅女仔。