《我喺連「興趣」都冇嘅極權國家生活咗廿年，直到遇見妳》: 第十三章

「好啦咁多位，依家等我大約講下呢兩年專校生活會係點樣，其實主要上堂都係教下你哋歷史同埋寫新聞嘅技巧，根住會以小組形式寫幾篇新聞做功課。我諗大家入得黎新聞專校都係諗住入新聞局做架啦，成班三十人正常會有十幾個可以入到新聞局，但大部份都只係做雜務工作，可能派下報紙咁，每年應該只會有三至五個同學真係可以落手寫報紙，所以大家要努力，唔好以為入左黎新聞專校就可以將來入新聞部寫新聞。而新聞部會用三樣嘢黎分咁多位同學嘅高低，有三成三嘅分數係你平時做嘅功課分，一成七分數係我對你嘅評分，剩低五成就會係你面試嘅表現，清唔清楚？有冇問題？」
「楊老師，你嗰一成七嘅分數係根據咩而比架？」其中一位同學馬上詢問。
「呢個分可以話係我對你哋嘅評價，會根據我平時對你哋日常嘅觀察，判斷你哋有冇能力勝任新聞部嘅工作。」
「楊老師，咁我想問分組係我哋自己分，定係你會幫我哋決定晒架？」這次舉手發問的是周玲。
「每次分組都會係你哋自己分，而且每完成一份功課，你哋都可以選擇維持原班人馬或者更換組員。每份功課都係四人一組，但我哋班總共有三十人，代表會剩低兩個人。而呢兩個人可以選擇自己一個人做或者兩個人一齊做。同埋下個星期會開始做第一份功課，所以呢個星期你哋最好快啲認識其他同學，揀好組員。」