那一天，有女仔嚟咗男校讀書: 第十六章:暑期旅行(第二節)

check完in之後，我哋去咗食少少嘢先，因為廉航機冇嘢食。我同小倩過完關之後就直接答無人駕駛列車去登機閘口，因為廉航嘅關係，仲要搭巴士先上到機，所以要提早出發。今日係我咁大個仔第一次唔係同父母一齊去旅行，仲要同心儀嘅女仔一齊去，更加要小心得體，唔好失禮。喺閘口等咗一陣，就已經可以開始登機，上到機，我同小倩放好手提行李。
「你坐窗口位?」小倩問我
「唔使啦，你坐啦。」
「我成日都坐窗口位，你唔使專登讓俾我喎。」
「咁好啦!」
飛機好快起飛，三個幾鐘之後就到達東京成田機場，我哋乘搭成田特快列車去東京市中心。
我哋book咗一間喺新宿嘅廉價民宿，由新宿車站行大約十分鐘已經可以到達，難得交通方便，價錢又平，所以我哋冇猶豫到，即刻book咗。
「我哋一陣去邊?」我同小倩整頓好行裝之後，小倩問我
「唔話俾你聽住，一陣你就知!」我賣個關子
「咁出發啦!」小倩講完就出咗門口




「喂!等埋!」我趕緊鎖門

(待續...)