［愛情甜故前傳--無糖純愛］曾經嘅我地，都係兩條平行線⋯: 41. 尷尬

我身上仍然著住校服，我衫都冇換就伏喺書枱瞓著咗，或者係因為喊到用晒所有力氣啦…我換咗對襪，喺身上噴咗兩下淡淡嘅香味就算，我諗校服應該唔會真係好臭掛

整好晒所有嘢之後我先慢慢咁行去廁所梳洗，我望到鏡中嘅自己，雙眼紅紅腫腫的

「琴日嘅事，果然唔係發夢…」我望住鏡中嘅自己講道 

我用暖水濕咗條面巾用嚟敷一敷眼，希望陣間出門口嘅時候雙眼冇咁明顯地紅腫

方芷諾，冇問題㗎！既然葉子朗係唔中意你嘅話，咁你咪放低佢囉～反正又唔係冇試過放低一個人…





我入房拎番個書包，孭起書包行去玄關位打開鞋櫃，將放喺最高嗰層嘅皮鞋拎出嚟，穿好之後就出門口

我一邊睇電話一邊行，差唔多行到番學校嘅時候我先將電話收入裙袋

番到課室嘅時候，見到靜愉已經坐咗喺課室，今日靜愉竟然仲早過我番到學校？

「你今日咁早嘅？」我同平日一樣行番埋位，同靜愉講嘢

「哦係呀，今日…」靜愉抬頭望我嘅時候一臉愕然，「你隻眼做咩紅紅腫腫咁嘅？你喊過嚟呀？」





「嗯…」我苦笑着回答道

「做咩喊呀？發生咩事啦？」靜愉第一反應係關心我，我心裏頓時覺得暖暖的

「我—」

正當我想講嘅時候，我比課室嘅開門聲所打斷，我稍稍抬眼望向門口，我瞬間移開視線，笑容都收起咗少許

靜愉見到我咁嘅表情，便轉頭望向門口，見到係葉子朗之後靜愉又望向我笑了笑





「人地番嚟啦～」靜愉細聲咁同我講道

「嗯…」我擠出笑容然後點一點頭，咩都冇再講就行去Locker嗰邊

靜愉嘅視線跟住我郁，然後靜愉都起身跟上我嘅步伐，跟我一齊行去Locker嗰邊

我蹲低開Locker，靜愉企喺我隔望一臉疑惑咁望住我

「做咩呀你今日？咁奇怪嘅？」靜愉就好似平日同我講嘢一樣問道，以靜愉嗯個日常聲線，我都幾肯定葉子朗一定聽到靜愉咁樣問我，「係咪發生咗啲咩事係我唔知㗎？」

我聽到靜愉咁講嘅時候愣了一下，然後望向靜愉，但又有啲心虛咁移開視線，微微轉頭望向葉子朗

「冇事呀～」我嘅視線再次移向靜愉

「咁好啦。」我感覺到靜愉對我講嘅嘢有啲懷疑，但係靜愉冇多問，只係微微一笑





加油呀方芷諾，你得㗎！

我今日一整日都冇望向葉子朗，我一直都控制住自己唔好望過去，所以我真係冇望過去

放飯嘅鐘聲響起，終於上完地理堂，我伸一個懶腰拉一拉筋

「芷諾你食咩呀？」靜愉問我，「你好似好攰咁，我落去幫你買飯啦。」

「哦好呀，你幫我揀啦～」我對靜愉微笑講道，「你知我口味㗎啦～」

「你唔夠瞓就恰陣啦！隻眼腫晒咁…」靜愉囉嗦咗我兩句，然後就行出咗課室落去幫我買飯

我抬起頭嘅時候，發現課室入面嘅人走晒，但最尷尬嘅係課室入面得番我同葉子朗兩個人…！





「尷尬啦…」我喺心中講道，「方芷諾唔好望過去呀！控制住！」

我控制住自己唔好望過去葉子朗嗰邊，我喺櫃桶入面拎咗一疊今朝未點嘅功課出嚟，我仲未點啲人交齊未

我拎埋點名紙出嚟，然後一邊逐張逐張咁睇下啲人嘅名，一邊喺點名紙上面剔名

「悠悠…」我望到悠悠個名，然後就喺點名紙上剔一剔，然後掀下一份，「呢份我嘅…」

呢個時候有人行近我，靜愉又會咁快番到嚟嘅？呢個時候應該好多人排隊

「靜愉你咁快買密飯嘅？我點埋呢度就…」

點知我一抬頭嘅時候，見到係葉子朗企喺我隔離，佢將份功課遞比我

本來以為係靜愉，所以笑了笑，但抬頭見到係葉子朗嘅時候，我臉上嘅笑容又慢慢地消失





葉子朗企喺度耷低頭望我，又係一副欲言又止嘅表情，但感覺上比起琴日佢好似冇咁冷淡

我抬頭望住葉子朗，我嘅內心仍然會有啲怦然心動嘅感覺

「芷諾，我幫你買咗…」

我突然聽到靜愉嘅聲音，但靜愉把聲愈嚟愈細，佢應該比呢一幕嚇親

「唔該。」我瞬間從葉子朗手上接咗份嘢，然後耷低頭拎起筆喺點名紙上剔咗葉子朗個名

葉子朗咩都冇講就轉身行番去自己個位，我眼見靜愉行緊過嚟，便將疊功課疊番好，陣間落去交

「你兩個啱啱…」靜愉望住我笑了笑，將兩個飯盒放喺我枱面上，佢坐低喺我前面個位度





「咩事都冇。」我果斷地回答道，靜愉聽到之後愕一愕然，「食飯啦～」

葉子朗企起身行出課室，我冇抬頭望向佢，企我知道靜愉見到之後佢望咗葉子朗一眼，然後又望一望我

「你今日到底做咩啦？」靜愉已經問我第三次




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link