［愛情甜故前傳--無糖純愛］曾經嘅我地，都係兩條平行線⋯: 11. 他的背影

行多咗兩個街口之後，我同靜愉就分開行，我行左邊，靜愉行右邊

「聽日見啦～」我同靜愉講咗聲拜拜之後就分道揚鑣

我望一望手錶，唉…今日我爸媽又唔喺屋企食，又話要開OT

反正宜家都唔係好晏，都係5點幾，我都係去一轉麵包店之後再去行一行超市，買啲乾糧番屋企，咁聽日又有早餐食啦～

我行咗一段路去咗超市先，因為麵包店喺我屋企附近，所以去完超市之後再行番轉頭去麵包店之後再番屋企就順路啦





我去到超市，喺入口處拎咗個購物籃，然後自然地行到去放住各種薯片、糖果嘅零食貨架前

行到去六層高嘅貨架前，我熟練地將手伸向第四層，拎咗我最中意食嘅某P字頭牌子嘅薯片，拎咗一筒淺綠色嘅Sour cream味同一筒白色嘅Pizza味放入籃中

Sour cream口味應該係大家都愛嘅味道嚟，我諗應該好多人都同我一樣中意食呢個口味

然後又揀咗啲一大包嘅糖果，然後就行咗去隔離嗰行睇杯麵，我揀咗幾個出前一丁嘅杯麵放入購物籃，然後就行去收銀處

收銀員將我買嘅嘢放入膠袋遞比我，我拎住膠袋行出超市，然後就行番轉頭去麵包店買麵包





我將膠袋用手臂挽住，方便我嘅雙手可以騰空出嚟拎麵包夾同麵包盤，我喺麵包櫃隔離拎咗個夾同一個圓盤，稍微彎着腰掃視着放喺麵包櫃入面嘅麵包

「唔…喺邊呢？」我搵緊吞拿魚包嘅位置，因為麵包櫃中放麵包嘅位置成日都轉嚟轉去，所以好難記住放喺邊

我一直微微彎着腰，眼睛一直望住麵包櫃入面嘅麵包，淨係雙腳默默咁向左邊小步行，因為我係唔可以放過任何一個睇到吞拿魚包嘅機會

「唔通今日冇？」我細聲地喃喃自語道

突然眼尾瞄到一個夾咗寫住「吞拿魚包」嘅小膠牌，我頓時推開麵包櫃嘅膠板，伸隻夾入去夾個包





點知我隻夾差少少就夾到落個包到嘅時候，有人捷足先登用白色嘅麵包夾夾住咗個包，我個夾只係可以夾到佢隻夾

「我個吞拿魚包呀！」我當下嘅反應係喺心中吶喊道，然後抬起頭望向嗰隻「捷足先登夾」嘅主人

我抬頭望佢，碰巧同佢對上視線，睇嚟佢都想知道邊個同佢搶包

本來我仲偷偷扁着嘴，但望到對方嘅時候，我不禁瞪大了眼，心臟嘅跳動頓時加快了，我不禁吞咗一啖口水

對方着住同我同一間學校嘅校服，我抬頭望佢同時佢稍稍低頭有啲愕然咁望住我，但果然佢身上嘅氣場令人不禁有啲壓力，我都不禁屏住了呼吸

「你要。」葉子朗鬆開咗個麵包夾，然後望一望我，「你個夾。」

「哦！對唔住…」我猛然反應過嚟，有啲尷尬咁笑咗一笑，然後鬆開咗將佢個夾夾住嘅我個夾

我將個包夾出嚟放喺我個圓盤上，葉子朗又夾咗一個放到自己個盤上，我抬手拎放喺麵包櫃頂上嘅袋裝方包





葉子朗喺我身邊行過，行到去收銀處排隊比錢，我排喺葉子朗後面

望住葉子朗嘅背影，心完全冇辦法平靜落嚟，我微微地將頭耷低，連望佢嘅背影都唔敢

「好想開口同佢講嘢呀…！」我喺心中講道，好想再一次同佢講嘢，「但我唔敢…」

我唔敢開口同佢講嘢，我連企喺佢嘅身後都會不禁屏住呼吸，但即使只係企喺佢身後，心中都有種莫名其妙嘅滿足感

葉子朗比完錢，就轉身朝住麵包店嘅門口行去

望住佢離去嘅身影，雖然有啲失落，但係我都有啲滿足，今日我冇同佢搭到話，希望下次我會有勇氣啦

我拎住袋麵包行出麵包店，然後踏上回家嘅路





今日雖然真係有啲攰，又遲咗番屋企，不過原楚偶爾遲走都算係小確幸

我行到番屋企，出咗升降機，喺裙袋中拎咗鎖匙

喺打開門嘅瞬間，我有啲愕然，因為屋企著咗燈，而且有人喺廚房洗緊嘢

「我番嚟啦…」我細聲咁講咗句，然後企喺門口將皮鞋除落嚟，換上拖鞋之後再行入屋

「番嚟啦？陣間飲碗湯啦～」媽媽知道我番咗嚟便講道

「嗯…」我淡淡地回答咗一句，然後就行咗入房

我見到我媽之後，第一句想講嘅嘢係：今日又會咁早番嚟嘅…？唔洗開OT咩？

我同爸媽嘅關係，可以用矛盾咁講一句…既親密又疏離…








IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link