［愛情甜故前傳--無糖純愛］曾經嘅我地，都係兩條平行線⋯: 05. 說上話了
「今日就到此為止啦，番到去好好溫書啦，同埋預習定下一課嘅內容。」教歷史嘅老師Mr.Wu講道，「咁大家可以執嘢走啦～」
班止嘅同學紛紛執書包，然後離開課室
我將啲嘢放入書包，唉～我都想番屋企呀！但係要幫Miss Yiu做嘢就冇辦法啦
我放好啲嘢之後就出咗課室，要落一樓Miss Yiu嘅簿櫃拎佢交帶落嘅工作
「咁大疊嘅…」我行到簿櫃前面，心中有啲無奈咁望住嗰一大疊好似有四本字典疊埋咁厚嘅筆記，但我都係小心翼翼咁將筆記喺簿櫃中拎出嚟，然後行上樓梯番課室
好重呀…拎住四本字典咁…唔係細細本嗰啲，係好重好大本嗰啲…
我感覺我拎完呢疊嘢之後都可以練到二頭肌…
我好小心咁捧住疊筆記，除咗係因為跌咗就大件事之外，係因為喺疊紙上面放咗個釘書機，如果跌咗嘅話我都冇手執
疊筆記真係好重，我小心翼翼咁一步一步行，行到上四樓
上到四樓嗰陣我都己經喘晒氣，拖着沉重嘅步伐行番課室，我耷低頭望住地下周留意住個釘書機，我怕佢會跌
「行多兩步就到課室啦！」我喺心中鼓勵自己
課室就喺前面咋！我嘅雙眼望住地下，小心翼翼咁轉彎行向課室嘅門口，見到課室在前心中有啲小興奮，因為好快就可以放低疊嘢啦！
我加快咗腳步，正要邁步踏入課室嘅時候，突然有一個人喺課室行出嚟，我都冇留意到亦比唔切反應
我比喺課室出嚟嘅葉除朗嚇咗一跳，自然反應的向後踏咗一步，但因為個人冇企穩，成個人連手都搖咗一下
釘書機呀！
我望住厚重嘅筆記紙同釘書機一同向左側，釘書機喺筆記紙頂向左滑，但係我已經冇手扶住紙同釘書機
喺筆記同釘書機要跌嘅時候，「啪」的一聲，嗰一下突如其來嘅聲音將快要嚇到魂飛魄散嘅我拉番番嚟
葉子朗嘅右手托住傾斜嘅筆記，左手迅速地㩒住咗釘書機，我驚魂未定咁抬頭望向佢
「唔、唔該…」見到個釘書機要跌嗰下，我差啲嚇到個心都要跳出嚟，幸好葉子朗伸手扶住咗，我禮貌地講咗一聲
「唔洗。」葉子朗將筆記推番好，將釘書機再次放好喺紙上，然後就行向右邊喺我嘅身邊經過行咗出課室
我即刻邁步踏入課室，行到番自己嘅座位前，然後小心翼翼咁放低筆記同釘書機
「嚇死我啦…」放低啲嘢之後嘅第一件事係拍一拍自己心口，然後坐低飲咗啖水定一定驚，「真係嚇到心臟都要跳出嚟…」
葉子朗又會喺度嘅？呀…Miss Yiu要佢今日補交番份功課比佢
我望到佢放喺枱面上嘅作文紙，雖然有啲驚訝佢真係會留低，不過佢嘅事唔重要，畢竟我有任務在身，就係要釘好啲筆記
過咗一陣傳嚟腳步聲，我自然就抬頭望，葉子朗行番嚟課室，然後又坐番低，我繼續自己手上嘅工作，數夠25頁紙之後疊齊然後拎起釘書機釘好
「我想問…」突然聽到有人同我講嘢，好似係葉子朗同我講嘢，我便抬頭望向佢，「英文writing要寫啲咩…」
「寫咩？」我聽到之後有啲愕然，因為喺guide lines張紙上面有寫，「寫Letter to the Editor。」
「你有冇嗰張紙…？」葉子朗一臉唔好意思咁開口問，「我嗰張唔見咗…」
「有，等等…」我放低手上嘅嘢，喺書包入面拎咗個文件夾出嚟，喺入面搵到嗰張guide lines，然後遞比葉子朗，「嗱。」
「唔該。」葉子朗接過張紙，愣住了一秒，可能係因為望到喺guide lines上面係密密麻麻嘅字跡，全部都係我寫落嚟嘅筆記同埋Miss Yiu講嘅寫作重點
我又再次拎起釘書機同筆記，啱啱好似係第一次聽到葉子朗同我講唔該，之前都唔會聽到佢講
課室中好安靜，只有釘書機釘嘢嘅聲音、筆喺紙上寫嘢嘅聲音同埋時鐘滴答滴答嘅聲音
我都唔知過咗幾耐啦，但已經到咗黃昏，我釘好最後一份筆記
嘻…搞掂～做好啦～可以番屋企啦～
我企起身準備孭起書包行番落一樓放低已經釘好晒嘅筆記，葉子朗孭住書包向我行過嚟，手上拎住作文紙同我借比佢嘅guide lines
「唔該。」葉子朗行到我面前，將張紙遞比我
「唔洗。」我接過張紙之後放番入書包入面
葉子朗便轉身走，邁步離開課室
我都要走啦！落去一樓放番低就走得啦～唔知係咪因為做好晒啲嘢，我心情特別好啦！
我捧住又重又厚，不過已經釘好晒嘅筆記落一樓，我落到一樓，行到簿櫃前時，見到放喺Miss Yiu簿櫃入面嘅一份作文
我小心翼翼地將作文紙拎起，因為簿櫃好細，如果照放筆記入去將作文紙壓喺底嘅話，Miss Yiu未必見到
所以先將作文紙抽起，然後將疊筆記放入簿櫃，再將葉子朗嘅功課放喺旁邊
「咁樣應該得啦～」我心諗
IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link