二零五零年 – 我女神係暴徒: 第一章

「各位同學, 今天的課就到這, 請回家好好溫習黨領導演說的內容, 昨天外交部發言人問候美國總統的娘親、妹妹、女兒以及外孫女的言論, 威振全球, 請好好思考黨領導的說話精神, 當中每一句髒話都是經過細密鋪排, 學習後寫一篇一千字的感想下週一提交, 各位同學再見!」
 
無錯, 而家無論教書、日常生活、電視媒體, 都係用普通話, 廣東話已經成為歷史, 雖然講廣東話唔犯法但香港市內已經唔多人識講, 但由於細個果陣我阿媽唔理老豆反對, 好堅持要我學好廣東話, 所以我一直覺得自己母語係廣東話, 當然平時就好少講啦。
 
又到星期五, 收工又可以輕鬆一下, 放學後係度處理下校務, 不知不覺已經夜晚六點幾, 正準備收工, 見到黃迪儀老師都拎起手袋, 古語有云: 「機會嚟喇飛雲!」我快步行去女神面前。
 
「黃老師, 下班了嗎? 不如去看個電影吧? 今天「只有共產黨可以救地球」上映呢! 我有武警優先場的門票!」
 
「熊主任..都跟你說過很多次了, 我們只是同事, 一起看電影不方便, 對不起!」
 


「別這樣啦迪儀! 現在我是你的領導, 應酬一下我總可以吧! 看完電影還可以到我家休息一下哦!」
 
「熊主任..請不要這樣稱呼我, 也不要提這麼過分的要求…..我不可能去你家休….息呢」
 
「要不….」我都話口未完..
 
「我今天真的沒空, 先走了, 熊主任再見!」迪儀已經急急腳咁走左。
 
記憶中已經數唔到係第幾次食檸檬, 迪儀係遲我三年入職, 係教美術科既Y.M., 當日佢初黎報到, 果份獨特氣質實在吸引死人, 身材雖然細細粒但都有一對黑絲長腿, 個樣有D似我老豆既偶像陳法拉呢! 可能因為係藝術家脾氣, 否則點可能拒絕我呢? 嫁入武警家族係好多人既願望!
 


雖然今日迪儀又拒絕左我, 但我而家身為領導, 關心一下同事工餘時間既生活都係非常合理既! 我一路暗中係後面跟住迪儀, 一路跟到入黨鐵。我上年唔小心係教務處電腦偷睇過老師登記冊, 知道迪儀係住係月娥島既, 月娥島聽老豆講係以當時推行建島計劃既市長真名而命名, 但熟讀國民通識既我, 係課本中都無見過有呢位叫月娥既市長或高官, 月娥島係二十幾年前新落成既人工島, 位置偏遠加上係屬於貧民區, 所以我都無親身去過。月娥島居民一般依靠黨鐵往來市區, 而黨鐵往來人工島既服務每日只係去到夜晚八點, 八點後就只可以乘搭每小時一班既五星小輪番島, 所以迪儀經常都急住搭黨鐵番屋企。