[喪屍][人性?][政治?]在喪屍橫行的年代裏，我只想做一個人: 54 拯救人類 下

天已經完全亮了，街上空蕩蕩，沒有喪屍。駐紮石崗的軍人顯然沒有使用這條道路，因為颱風造成的塌樹，附近吹來的雜物之類完全沒有收拾，車輛基本上不能通過。透過旁邊的鐵絲網仍然可看到軍營內的情況，只見在遠方軍人整齊地站好，似乎整裝待發，我小心翼翼地前進，生怕被發現。走到盡頭有一條伸延到外頭的小徑，盡頭就是來時經過的公路。到了這邊，基本上就找到路回黑沙圍。

雖然路上一隻喪屍也沒有，在街上遊蕩的他們似乎大部分都被喪屍控制者吸收，壯大勢力，這意味先前在荃錦公路遇到的情況，完全有可能隨時發生。我可沒甚麼所謂，只希望到達黑沙圍之前，不會遇上他們。

杜嵐的屍體已經放了整整一個月，可能已經腐化。喪屍們距離爆發已經過了數個月，然而他們腐化的程度卻不太嚴重，可能她的情況不會太差。一想到她的身體放在一處，無人看管，就像之前搜索時看過的無數情景一樣，我就渾身難受。

我知道人已死，埋葬不過是種儀式，然而......

「喂！企喺度！」





我陡然止步，從沉思中抬起頭來，只見道路上零落地站了十多隻喪屍，神情呆滯，看到我也不攻擊。說話的是一位應該只有十多歲的青年，他戒懼地瞪著我，又道：「你......你係解放軍係咪？」

我搖頭：「......我要去黑沙圍。」

「你去嗰到做咩？」

「私人理由。」

「你......你係想探路？搵條村喺邊然後叫軍隊過嚟殺人？」





我鼻子噴氣，淡淡一笑，說出了黑沙圍的地址，然後冷冷地看著他。

青年狐疑地上下打量著我，在對講機中說了幾句後，看著我的眼神顯得更為不解。他讓我站著等，過了一會，一名女性喪屍到來，劈頭一句就向我道：「你叫咩名？」

「駱輝。」

對方靜靜的看著我，似乎在盤算甚麼。良久才說：「我叫郭伊絲。你跟我嚟。」

青年不解的問道：「家姐，點解——」





「之後我會解釋。」

名叫郭伊絲的女子，看來二十歲上下的年紀，雖然竭力裝出冷若冰霜的樣子，但她血紅的兩目卻隱含一股迫切的，似乎隨時準備為了甚麼而獻身的熱情......上次有這種感覺，是最初遇到神父的時候。

郭伊絲見我看她看呆了，臉上露出一絲笑意：「唔使咁樣望住我喎，我唔會食咗你。」

「......咁做之前，問過我把槍先。」

郭伊絲微微一笑，沒有回話。她把我領到村口前，鐵閂後的看守，同樣是喪屍，沒多說就打開了鐵閂。

「入去之前，交出你嘅武器。」

我冷冷的瞪著郭伊絲，沒有行動。

「唔肯？呢個係入村最低要求。」





我聳聳背，交出步槍。

「你嚟呢到係為咩？」

「我要去埋葬一位......一位對我好重要嘅人。」

「女朋友？」

「......如果佢冇死嘅話。」

郭伊絲若有所思的點點頭：「我哋嚟到呢到之後，用咗成個星期去收拾殘局，到而家都有地方未整頓......你要有心理準備，佢條屍可能已經被人搬走咗。」

我點頭，同時表示辦完事就會離開，然而她說自己必須要在場監視。我也沒所謂，就讓她跟著。





村子的積水早已退去，地方打理得乾乾淨淨，看不出之前發生的事。出人意料地，此處的居民居然是沒感染的人類，當我們經過時，不論男女老幼也停下手上的事，目不轉睛的看著我們。

我不禁問道：「呢到啲人，到底係......」

「普通市民。我哋提供保護。雖然係咁，但我哋都好少就咁行入市民之中，怕引起恐慌，平時都係靠人類自己維持秩序......我哋嘅作用類似軍隊，正常情況下唔會出現喺市民眼前。」

我冷冷一笑：「人類終於墜落到要靠喪屍。正常情況下唔會出現喺人類面前？屠夫都係喺畜牲生命最後一刻先出現。」

她只是淡淡一笑：「冇話墜落唔墜落，情況唔係好似你講咁簡單。」

我們來到一零七號大屋。來到這邊，那段痛苦的回憶又再次在腦海浮現。木門虛掩著，大屋內部滿是亂七八糟，濕漉漉的雜物，本來的傢俱浸得發霉發脹，在屋子角落還有退不了的，一團漆黑的積水。

「17洪水氾濫在地上四十天，水往上長，把方舟從地上漂起。

　18水勢浩大，在地上大大地往上長，方舟在水面上漂來漂去......」





「你企喺到做咩？」

見我出神，郭伊絲忽然這樣問。我扔掉原本攤在地上打開了，只有一部分沒被洪水化掉字跡的聖經，信步上樓。

我到底在害怕甚麼？

我們來到二樓，杜嵐屍體所在的房間前。我深呼吸一下，毅然打開了門——

「......」

房間的佈置和原先一模一樣，甚至連床舖也整理得整整齊齊，但她的屍身呢？

莫非我弄錯了？我衝到旁邊的房間，但也沒有任何發現。我甚至檢查了全屋所有房間，卻完全沒有發現。我回到本來的房間，郭伊絲一直站著，看到我回來，低聲道：「睇嚟條屍已經搬走咗——」





我猛然抓著她衣領，把她推到牆上，死死的瞪著她那赤紅的雙眼，一字一句從因為憤怒而咬緊上下顎之間流出：「你哋係咪食咗佢！」

她森然地回視著我：「你想變成喪屍？」

「好呀。反正對我嚟講。做人同做喪屍都冇分別！」

她沉默不語，依然一幅毫不畏懼的樣子。然而，過了約十數秒的僵持後，她卻輕輕地嘆了口氣，低聲道：「我哋冇食佢......就算真係被喪屍食咗，你而家咁嬲咁質問我又有咩意義？」

「我只不過係想同佢做最後道別！......」

她平靜的看著我，慢慢說道：「清理條村嘅時候，為咗防止傳染病，我哋將所有屍體，包括行動唔到嘅喪屍送哂去火化，我諗你女朋友己經一早就火化咗喇。」

「你講我就信？」

「你可以選擇唔信。」

我低頭不語，鬆開了手。

「......你哋係幾時嚟到呢到？」

「大約兩三個星期前。」

所以就差不多是我們離開不久，他們就來了。

「你哋同嗰個女仔有咩關係？」

「邊個女仔？」

「唔好扮嘢。就係睇落得十一二歲，講嘢好囂張嗰個。如果你唔識佢，你點會識嚟呢條村？」

當初看見她的時候就有種似曾相識之感，但一直也想不出到底在甚麼時候見過她，直至剛才把她推到牆上，近距離之下才倏地憶起，她就是那時和女孩喪屍一起的喪屍女。

郭伊絲歪著頭，稍為遲疑後，意會地回道：「......我知道你講邊個喇。雖然佢對你哋做過好過離譜嘅事，但我已經好耐冇見過佢，自從佢決定要幫佢呀妹——」

「咪住先！」我打斷了她，「你知道我哋嘅事？你到底......」

「我當然知道。如果唔係事先知道佢嘅底細，我會放一個拎住槍，著住軍服，擺明係敵人嘅人入村咩？你講嗰個女仔，佢一早脫離我哋呢個群體，為咗幫佢個妹搵喪屍病毒嘅解藥。」

我默然無語，良久才道：「你哋呢啲有自己意識，仲可以控制其他喪屍嘅喪屍，到底係咩來頭？」

她甫張開口打算回答時，卻馬上又閉上嘴巴，若有所思的看了窗外一眼後，才回答道：「你知唔知道喪屍到底係點嚟？」

「......就係類似生物電腦嘅嘢。」之前在電腦聽的那段解釋充斥專業術語，鬼才明白那是在說甚麼。

郭伊絲點點頭：「所謂喪屍病毒本身係類似電腦嘅神經控制裝置。但你知唔知點解呢種病毒會出現？」

「唔好賣關子。」

她擺一擺手：「呢樣病毒由中國研發，目的係為咗實行一套叫做『生物天網系統』嘅大型監控系統。本來嘅天網系統透過到處都有嘅閉路電視，加上人臉識別系統嚟實施監控，而生物天網，你可以想像係將閉路電視直接塞入你個腦入面，再將你嘅思想直接上傳。」

「荒謬......」

「的確，極度荒謬，跟住嘅事更荒謬。塔克拉瑪干沙漠有個面積橫跨數百公里嘅天線站，用嚟發射波長有成千公里嘅超低頻訊號，用嚟控制喪屍病毒嘅行動......喪屍病毒會喺人腦入面生成類似微型天線嘅結構，而每一個中國研發嘅手機apps，例如微信，支付寶等等，都有隱藏程序，處理由感染者大腦發出嘅訊號，再傳送去位於塔克拉瑪干沙漠嘅電腦中心，分析喺全中國收集到嘅人嘅思想。呢一切喺病毒爆發前，仲有水有電嘅時候可以實現到。」

因為她所說的太過荒謬，我不禁乾笑道：「你變喪屍之前係咪做緊電台，主持陰謀論節目？」

郭伊絲只是微微一笑，繼續道：「後來，發生咗中共意想唔到嘅事......喺電腦中心，原先根據收集得嚟嘅大數據，作出控制喪屍病毒嘅人工智能系統，產生咗自我意識......我哋呢班有自我意識嘅喪屍都稱佢為『終端』。佢發出訊號，控制人腦神經突觸，提高咗攻擊性，而且因為意識產生額外嘅能量消耗，導致喪屍嘅食欲極強。」

「所以，喪屍之所以襲擊人，係因為被控制？」

「冇錯。問題係，後來情況失控，大範圍地區失去電力供應，雖然新彊電腦中心嘅電力供應因為被終端用喪屍控制，所以冇出問題。然而，散落喺其他地方嘅喪屍，佢哋大腦嘅思想就冇辦法上傳到終端，因為手機用唔到。情況就好似你打電話，只可以聽到對方講咩，而對方聽唔到你講嘢。你覺得有咩方法可以解決呢個問題呢？」

「我點知道......」

「答案就係，喺本地建立另一套具有同新彊母體相近運算能力嘅電腦，根據終端傳嚟嘅訊號，重新建構意識。喪屍病毒喺人腦構建另一套類似微波訊號收接器嘅系統，咁樣唔同嘅喪屍個體之間喺一定距離內可以達到資訊互通......每一隻喪屍嘅大腦有一定程度嘅運算力，當有相當數量嘅喪屍聚集一齊，透過分散運算，整個喪屍群嘅運算力就可以媲美位於新彊嘅超級電腦。而我哋呢啲有意識嘅喪屍，存在嘅目的就係去周圍搵落單嘅喪屍，將佢哋聚集起嚟。當我嚟到呢條村，見到喪屍嘅數量不合理地多嘅時候，我就決定要讀取喪屍腦入面嘅資訊，睇吓到底呢到發生過咩事......所以就知道你嘅事。」

我沉默不語。她所說太過超現實，我要思考她說的事而感到頭昏頭脹。她說的是真的嗎？她似乎沒有騙我的動機，而且那段說話怎也不像一時三刻就能編出來。

我喉嚨乾涸，隨口的問道：「就連意識......意識都可以複製？」

「人工智能嘅意識只不過係演算法。只要有一部功能相當嘅電腦，如果同樣演算法可能喺某一部電腦嘅運算中產生意識，就可以喺其他電腦上實現重複同樣嘅事。」

「照......照你咁講，你哋出現嘅原因係要聚集喪屍，但點解要襲擊人類？你哋喺呢條村想做啲咩？」

郭伊絲走到窗前，眺望窗外的景色，和在街道上追逐嬉戲的孩子，「你唔好誤會，我哋的確係想保護人類.....呢個亦都係終端目前為止嘅行動方針。」

「哈哈哈......」我不禁大笑，「保護人類！喪屍保護人類！呢個係咪畜牧場嚟？」

郭伊絲只是平靜的看著我，「呢一個月以嚟，我哋並冇傷害過任何一個村民。」

「咁又點？之前喺荃錦公路嘅襲擊呢？佢哋唔係人類？」

郭伊絲臉色一沉：「我哋會喺解放軍同叛軍戰鬥嘅時候介入，目的係削弱兩者嘅力量，等兩邊開戰之前會更加深思熟慮。」

「放屁，呢個只係你哋食人嘅藉口。」

郭伊絲點頭：「我唔會否認呢一點，畢竟喪屍要活動，要運算就必須要能量......但你諗吓，如果冇咗喪屍嘅侵擾，解放軍同叛軍之間嘅衝突只會比更多更激烈。況且呢一個月嚟，你有冇聽過喪屍主動襲擊你哋任何據點？」

據我所知，的確是沒有，但那又如何？

「你哋點解要保護呢班村民？有咩目的？」

郭伊絲微笑：「因為拯救人類等同於拯救喪屍呀。如果人類滅亡，喪屍可以獨善其身咩？每一隻喪屍以前都係人類......喪屍同人類，只有合作共存，呢個世界先會有希望，就好似終端所講咁，喪屍同人類事實已經係命運共同體，而人類終有一日會發現，我哋其實係手足同胞。」

我冷笑道：「你搞錯咗一點：或者喪屍需要人類，但人類並唔需要喪屍。」

「真係咩？人類真係唔需要喪屍？」郭伊絲微笑的看著我：「我諗你之後就會知道。」

我凝視她那通紅的眼睛，低聲問道：「你認為人類同喪屍真係可以和平共存？」

「有啲事你唔試就永遠唔會知道......我只不過係做自己呢刻認為最正確嘅事。」

我和她對視著。這隻喪屍沒有迴避我的目光，反而眼神中有種真誠，一種完全相信自己所做的是某種偉大事業的人才有的眼神。

「嗰班平民又會心甘情願被你哋統治？」

「點解唔會呢？佢哋喺呢到既唔會被外面喪屍騷擾，又唔會被捲入戰爭。根本談唔上咩墮落唔墮落，只不過係亂世之中一種生存方式......喪屍同人類和平共存嘅一種嘗試。」

我滿不在乎的聳聳背，站了起來，「......我要走喇。」

我們回到村口時，已是中午時分。我拿回槍枝離開，回頭看見郭伊絲站在村口，目送我離開，既不揮手，也不說話，只是這樣靜靜看著。

郭伊絲的理念與神父非常接近，然而她沒有與神父一樣用宗教作晃子。其實兩者的作法有利有弊，倒不能說神父的方向是錯，只不過他最後無可避免地被極權利用。那麼，郭伊絲的領導會變成極權嗎？可能會。既然她知道我的事，那麼之前在黑沙圍的事她想必也知道。另外有一點她應該心知肚明，她現在的統治很大程度上建基於外界威脅，即戰爭，人民不得不依靠她，加上喪屍的食糧來自敵人，假如喪失外部威脅，她概很難維持現有統治。

最糟糕的是，這傢伙是理想主義者。

我沿路離開，遇上守在村口的青年。他瞧見我，冷冷的問道：「要走喇？」

「嗯。」

我離村子愈來愈遠，青年一直在那邊目不轉睛地看著。我回望青年和其他喪屍漸漸縮小的身影，和村子的輪廓，開始分不清這是末日，或是未來。