[喪屍][人性?][政治?]在喪屍橫行的年代裏，我只想做一個人: 29 喪屍戰爭 (一)
站在窗邊的權叔凝視著窗外景色，左手指間的香煙只剩下一小截。他徐徐的吐了一口氣，頓時煙霧彌漫，又長嘆一聲，神色黯然。距離上次見到權叔抽煙，已經是在呀禮家的事。後來因為我們當中有小孩，而且香煙算是有價值的交易品，也就再不見他抽煙了。
杜嵐輕輕叫了一聲：「權叔。」
「......噢。」權叔連忙掉下煙頭，踩熄，「你哋返嚟喇......你哋有冇見過sam呀？」
我呆道：「佢冇返嚟咩？」
權叔搖頭：「我頭先出咗去搵佢，但搵唔到。」
杜嵐低聲道：「佢可以去得邊到呢......佢應該唔會去做傻事掛......？」
我回道：「我唔知道......不過喺咁嘅山上面要自殺都唔係話做就做到。」
「一個人真係想死嘅，咁冇嘢可以阻到佢。」權叔站了起來，「但我相信好似佢咁理性嘅人，唔會去自殺。我哋再等一等，如果到下午佢都未返，我哋就再去搵佢啦。」
雖然mk妹剛去世，大家又因為種種原因幾乎沒好好的睡過，但日常勞動，例如看顧農地，檢查和修補陷阱，狩獵，抓魚，採集野果之類始終要做。當了一晚守夜人的我睡了一整個上午，醒來時剛好遇上在農地回來的權叔和呀禮。我望向外頭，天色昏暗，大概即將要下雨。兩人脫下膠水鞋，把鐮刀和斧頭放在石屋的一角，杜嵐端出在早上前往森林摘的芭蕉，大家簡單的吃了一頓。
「我哋啲煙燻肉要盡快食哂佢喇，我留意到有似有少少變壞生蟲嘅跡象。」
「啲肉保存喺個鐵罐入面，照計唔會生蟲架。」
白詠欣聳聳肩，「我都唔知。仲有，我計過，我哋而家嘅糧食藏量，最盡只夠我哋食一個星期......我諗係時候要再出去搵物資喇。」
權叔點點頭，「我都打算最快聽日開始就再出去搜索物資。詳細計劃今晚先再傾。照舊，大家觀察下有咩資源係唔夠或者覺得有用嘅就今晚提出啦。」
呀禮問道：「sam佢仲未返嚟？你哋有冇頭緒佢去咗邊到？」
眾人默然。權叔回道：「我諗佢應該去咗村嗰到。我一陣打算過去嗰邊——」
我馬上說：「我去啦。」
權叔沉吟半响，才道:「嗯。等我諗下先......我要去田到做嘢，呀嵐要去檢查陷阱，呀禮又行動不便......白詠欣，你可唔可以陪一陪駱輝去村嗰到？」
「可以係可以，但呀妹佢......」
呀禮馬上答道：「我同權叔都喺出面塊田到，有咩事白詩婷大叫，我哋就會即刻返去。」
「......好啦。」
我帶上了手槍，而白詠欣則帶了小刀，用作旁身之用。我們之前沒到訪過村子，但之前他們來到石屋討論劃界事務後，留下了地圖的副本，我們根據這份地圖可以大致得到村落的正確位置。
「白詩婷佢食咗藥之後，情況有冇好啲？」
「情況都係同之前差唔多......都係咁肚屙，不過啲燒已經退咗，我諗佢會慢慢咁好返。」
「白詩婷一定可以大步檻過架。」
她默默地點點頭，沒有回話。
不經不覺我們我們來到道旁一座小小的土地廟前。寺廟的雕像已經損毀不堪，外面的瓦頂也已經有大半脫落。如果再往前走就即將進入村的私有地範圍。在這邊已經可以看到村落的輪廓：一道低矮的方型圍牆包圍著整個村落，圍牆的四個角落是更樓，上面似乎有人在看守。圍牆門前有一塊稱作禾堂的空地，更內部則是一排排櫛比鱗次的民房。村中大約中央的位置有一座特別顯眼的紅頂民房，因為其他房子與這座房子有一定距離，像是被孤立起來似的，大概就是村的祠堂。
由土地廟再走到村的門前需要約半個小時，途經的都是林中的小徑或者公路，所以沒有遇到喪屍。村門前頂上刻有村子的名稱：黑沙圍。大門只有兩人並排的寬度，此時鎖上了鐵閂，一名男子在鐵閂內目光炯炯的瞪著我倆：「有何貴幹？」
「我哋係山上石屋嗰邊過嚟嘅，想搵一個人。」
面對守衛遲疑的目光，我繼續說：「我哋想搵呢個男仔：廿歲左右，黑色短頭髮，上身著黑色t-shirt，下身著灰色短褲。大約凌晨四五點嘅時候，佢......佢就離開咗石屋。你哋有冇見過佢？」
守衛冷冷的盯著我，對我所說的毫無反應。到我不耐煩，打算再重複一遍時，他才緩緩說道：「你等等啦。」
五分鐘後，sam和另一個穿著全黑修士袍的男子來到鐵閂前。白詠欣喃喃自語：「sam，原來你真係喺到。」
「sam，我哋返去石屋啦，權叔佢哋等緊你架。」
sam目無表情地直視前方，全程與我倆毫無眼神接觸，就像他眼前壓根沒有人。
「德馨佢已經加入咗我哋最後聖殿。」
那名男子聲音低沉而且嘶啞，只是聽他說話就令人怪不舒服。黑色兜帽之下露出慘白而且佈皺紋的下半臉，和說話期間一隱一現的一排白得發亮的牙齒。
「你咁講係咩意思？你係咪想禁錮sam？」
「冇任何人強迫過我做任何事。我唔會跟你哋返去。」sam望向我，眼光冰冷像是在看陌生人，而不是曾經度過接近三個月，一同生活一同戰鬥的伙伴。
「你喺度講咩呀？」白詠欣一臉不信的搖搖頭，「我哋......我哋一齊經歷咗咁多，你而家竟然......」
神父輕輕嘆了口氣：「德馨佢加入咗最後聖殿，發誓要同過去嘅自己同過去嘅生活告別，用全新嘅自己去接近上帝。拋棄一切，令上帝去填滿你嘅內心，咁樣先可以得到真正嘅救贖。」
「邪教......」我咬牙道，「反正你哋就係用模稜兩可嘅教義，趁人心靈虛弱嘅時候趁虛而入......根本就係邪教所為。」
神父抬起了頭，這是我首次看到神父的樣子：那是一張滿佈皺紋，比想像中祥和，卻令人猜不透他真實年齡的面龐。你說年老那是必然的，但你猜不到他到底是年近耄耋或只達花甲之年。雖然擁有西方人的面孔但卻說著流利的廣東話。他那漆黑如墨的眼珠直視著我，就似在翻找我心中深處最深沉，最不為人知的思想或秘密，令我不得不迴避他的目光。只聽到他輕聲說道：「所有嘅宗教都係邪教。亞伯拉罕諸教，大、小乘佛教，神道教，印度教，錫克教......一神論又好，多神論又好，泛靈論又好，甚至無神論都好，全部都係邪教。當然，最後聖殿都係邪教。」
我呆住了。想不到他竟然如此乾脆的承認自己的宗教是邪教，甚至把其他宗教拖下水，更意想不到的是他在sam面前這樣說。
「你聽到啦sam，」白詠欣指著神父，對sam說，「佢自己都話最後聖殿係邪教。你仲咩仲要留喺到？」
sam含笑的搖搖頭，「呢點神父喺一開始已經同我講過。講過唔止一次添。」
「咁點解你仲——」
sam看著我：「但宗教同信仰係兩回事。」
神父點點頭，「我都話，只要心中有信仰，根本就唔需要拘泥於形式。」神父顫抖的雙手打開了鐵閂，「德馨，既然你嘅同伴咁擔心你，你就返去啦。我哋呢到隨時歡迎你——因為信仰嘅大門，從未關上過。」
「你唔好喺到玩語言藝術喇。」我抓起sam的手，「我哋返去啦——」
sam哀傷的搖一搖頭，看著我：「放手，駱輝。」
「......你真係決定咗留喺到？」
「你唔明白。正如神父所講，我隨時都可以離開，但我唔想走。」
白詠欣急問：「咁你點解唔肯返去呀？」
「時機到咗我自然會走，但而家，我仲有太多問題要向神父請教。」
「唉，可憐，可憐。」神父仰天長嘆一聲，「我哋返去再繼續傾啦。」神父轉而看著我倆：「如果你哋有興趣嘅，可以一齊嚟聽。」
「我唔想畀你洗腦。」我冷冷說道，拉著白詠欣轉身就走。
「但係sam佢......」
「你聽唔到咩？佢自己都話唔想走，咁我哋仲有咩好講？」
「年輕人！」神父叫住我倆：「信仰之門隨時為你哋而開！」
「......癡撚線。」
我們沿路回去，天開始打雷，未幾大雨傾瀉，我們頂著雨勢和泥濘回到石屋，其他人已經在石屋等著。
聽罷我們對情況的轉述，呀禮聳肩說道：「如果sam佢自己都唔想返嚟，咁我哋都冇咩好講。」
杜嵐嚅囁道：「但係，小剛講過佢哋係邪教，就連佢哋自己都承認呢點......sam佢會唔會有危險架？」
「其實，sam佢啱啱失去咗呀穎，佢而家需要一啲心靈上嘅慰藉，我可以理解...... 」我緩緩說道，「我諗暫時佢都係聽唔落我哋講嘅嘢。」
權叔摸著下巴，「咁你認為我哋而家有咩辦法？」
「我諗再過多兩三日，等佢諗清楚，再去搵佢傾下。」
白詠欣反駁：「到時佢已經被人洗哂腦，再聽唔入我哋講，咁又點好？」
「咁我哋又有咩辦法？入村強行捉佢返嚟？」
「我諗，我哋最好都係按兵不動。」權叔坐在沙發上，叉著手，「sam喺嗰邊應該冇咩生命危險——」
「咚咚咚！」
眾人望向大門，以為是外頭強風吹動大門的聲音，豈料門聲稍一停止，接著就響過不停。杜嵐趕去應門，赫然發現渾身濕透的小剛，敲門的手仍然停滯在半空。
「小剛......？」
「我可唔可以入嚟？」
杜嵐馬上讓他進來。小剛入屋之後就站在門邊，不慌不忙的說道：「我知道我上次話過唔會再嚟，但今次情況非同小可。」
他接過白詠欣遞來的毛巾，直視她雙眼道：「sam入咗去黑沙圍嗰到......你哋可唔可以講吓件事嘅來龍去脈係點？」
權叔回道：「因為呀穎佢變成咗喪屍，冇辦法之下，呀嵐開槍殺死咗佢。之後sam就粒聲唔出走咗去。我哋都係去到先知佢原來去咗村嗰到。」
小剛點一點頭，黯然道：「原來如此，咁都好難怪sam。失去咗最重要嘅人，只要任何人畀到少少心靈慰藉畀佢，佢就會聽哂嗰個人講。」
杜嵐低聲說道：「呀穎佢係喺醫院，為咗救我，先至會畀喪屍咬到......」
小剛搖搖頭：「你哋去醫院，係為咗幫白詩婷拎藥？」
「嗯。」
「但係你哋點知道邊啲藥先有效？」
杜嵐遲疑道：「係神父嗰日幫白詩婷睇病之後，開咗藥單，就連拎藥嗰間醫院都係神父話畀我哋聽......你係咪懷疑，神父咁做係另有所圖，sam出走都係關佢事？」
「我唔敢肯定......神父呢個人我到而家都仲睇唔透。可能呢一切係劉居，嗰個同神父合作奪權嘅男人，暗中策劃，但呢個都只係我嘅猜測。只不過，我可以肯定，如果你哋唔及時拉返sam出嚟，佢就只會被最後聖殿洗腦，你哋唔會再見到佢返嚟。如果佢會返嚟嘅話，咁佢只會係嚟傳教，因為教會迫佢咁做。」
呀禮叉著手，「或者你講得啱，但係我哋而家可以做到啲咩？」
「......你哋有冇聽過，識得講嘢嘅喪屍？」
小剛此話一出，我們各自看著對方，滿臉驚疑。
「你哋唔信都唔出奇——」
呀禮回道：「我哋見過，識講嘢嘅喪屍。如果冇估錯嘅話，佢哋應該仲識控制其他喪屍。」
看著呀禮複雜的表情，小剛輕輕嘆了口氣，「睇嚟你哋真係經歷過唔少事。」他頓一頓，「......我懷疑神父佢哋同喪屍暗中勾結。」
「勾結嘅意思係......」
「我之前咪講過，村入面反對劉居，同埋神父嘅人，接連咁失蹤......我懷疑劉居同神父將反對佢哋嘅人貢獻畀喪屍，換取喪屍唔入侵。」
聽罷小剛的猜測，眾人面面相覷，顯然對他所說感到難以置信。我率先打破沉默：「小剛，唔係話唔信你，但你所講嘅到底有冇證據？」
「如果我有證據，我早就向村民揭發咗。但係呢一切真係好唔尋常。神父嚟之前，條村經常受喪屍攻擊，雖然數量唔多，而且攻勢唔算猛烈，但不斷都有人死傷。喺幾乎日日都有人死，食物又唔夠嘅情況下，村民開始互相怪責，甚至互相攻擊。神父嚟到嗰日開始，喪屍就冇再出現。神父同因為擁護佢而扶搖直上嘅劉居聲稱係神蹟，但我相信當中一定係有秘密。」小剛吸了一口氣，「而家我呀爸......村長都失蹤埋，我唔可以再忍落去喇。」
「村長都......」杜嵐輕聲道：「唔通就冇人察覺到當中有事唔妥？」
「冇人夠膽反抗......一部分係因為祟敬神父，另一部分係因為怕指出問題就會『被消失』。」小剛嘆了口氣，「我唔肯定村長係咪已經遇害，如果情況真係咁差，咁我起碼都要得到佢哋陷害村民嘅證據。我已經有計劃去突襲神父同劉居，但呢個計劃只靠我，阿奇同誠哥係冇可能成功......我而家好需要你哋嘅幫助。」
「我同之前嘅睇法一樣。」呀禮馬上回答，「其他事上面我諗我哋一定會幫你，但喺呢件事上面，幫你就等於係同班村民作對，而且我唔知道咁樣會有幾危險。」
白詠欣搖一搖頭，「呀禮......」
「你唔知道會有咩事發生。好似野豬嗰次咁，佢哋失驚無神帶十幾兜友上嚟，個個兇神惡煞咁款，如果佢哋真係不懷好意既話，你早就畀人溶咗喇，而且根本連劃界都冇必要，直接殺死哂我哋就得。好似而家咁，大家河水不犯井水，各自生活就好，冇啦啦去理人哋嘅事咪即係要置自己於險境？」
白詠欣頓時啞口無言。杜嵐看似有話要說，但她卻像想到甚麼，把要說的吞回肚子，低頭不語。
「我都同意呀禮所講。」我低聲說道：「雖然咁樣做好無情，但我哋呢到又有女人又有小朋友，實在唔適合冒險。」
小剛望回權叔，只見他垂首，長嘆一聲，「......如果只係得我一個，我幫你都唔緊要，但而家我哋要照顧嘅唔單止係自己。我希望你明白。」
小剛沉重的點點頭，站了起來，「......唔好意思，麻煩到你哋。」
在他將步出石屋之際，杜嵐叫住了他：「小剛！......對唔住呀。」
他臉上浮起一個哀傷的微笑：「唔緊要。」
外面雨勢直到入夜才漸漸收細。晚上我們討論到外搜索的安排。因為mk剛去世，而sam又恐怕暫時不會回來，所有工作也要重新分配，每人分擔的工作量也勢必增加。最後的決定是，呀禮負責務農，杜嵐和白詠欣去檢查陷阱和捕魚，我和權叔去外出搜索。擬定好去那一處搜索物質，所需物的清單之後，距離入夜已經過了好一段時間。權叔在外頭忙著把下雨造成積水排除掉，守夜的呀禮在微弱而溫暖的營火旁打瞌睡。我走出石屋，在月色之下，權叔正在挖掘一條溝渠，把積水疏導出去。
「駱輝，你嚟得啱喇，過嚟幫幫我手。」
我接過他遞過來的鋤頭，「權叔，呢啲你等聽日呀禮做咪得囉。」
「梗係唔得啦，啲菜先啱啱開始發芽冇耐，一浸就死，咁就前功盡廢架喇。」
我笑了笑，「你真係事事都咁親力親為。」
「既然我係年紀最大嗰個，自然要負最多責任......你哋個個都睇我頭，我就更加要做好榜樣。」
「今日你拒絕咗小剛嘅要求，都係因為咁樣嘅原因？」
「......呀穎佢嘅死，重新提醒咗我，其實我哋而家有咁樣嘅生活唔係必然。如果係以前，我會因為睇唔過眼而去抱打不平，但而家，我事事都會考慮埋其他人嘅安危。」他苦笑一下，「雖然我冇人冇物，單身寡佬一個，但可能有兒有女，有頭家嘅人，就會好似我諗。」
我和權叔在田中默默工作，當溝渠快要挖好時，呀禮由石屋跑了出來：「權叔，駱輝，大件事喇！白詩婷佢好似好唔妥呀！」