《無啦啦多左幾個家姐同細妹Season 3》: 異常

「你到底想點。」
 
事隔兩日，我起身發現電話收到一個唔識既號碼所發黎既訊息。
 
我當然馬上就知道號碼既主人就係阿日，因為除左佢之外都唔會有第二個人會send d咁既msg黎。
 
「無，想為呢段時間發生既野做個了斷啫，出黎見個面喇。」
 
隨手覆完呢句之後我就放低返電話，繼續訓係泳池旁邊既沙灘椅，仰望遙遠又刺眼既太陽。
 


晏啲先搵晨哥佢地啦 ，而家仲早人地可能仲未訓醒。
 
會點樣收尾呢…可以既話我唔想見血，但諗到阿日衝動同好勝既性格就…
 
就係呢個時候，Sarah就出現係我面前 ，仲好成功擋住左太陽，成為我另一個太陽。
 
Sarah：「你係度做咩啊？」
 
我：「無 ，只係諗緊件事啫 ，岩岩覆左佢既whatsapp，晏啲就聯絡晨哥。」
 


Sarah：「吓佢搵左你嗱？講左d咩？」
 
我：「都係問我想點啫，預左佢會咁覆，冇乜特別。」
 
Sarah：「哦…但我睇你好似有心事咁既？早餐你都無乜點食，嗱飲杯橙汁先喇。」
 
果然知我者莫若Sarah啊…我仲以為今次自己已經收得好埋添，都係比佢睇穿。
 
我無否認亦無承認，只係伸手作勢要接佢手上既橙汁，但一手攬住佢條腰扶佢坐低係我旁邊。
 


好彩阿叔我身手敏捷，杯橙汁先無倒瀉，不過都係嚇到佢花容失色，結果就係比佢打左一鎚。
 
Sarah：「你嚇親我啦！件衫新買架好彩無倒瀉咋！污糟左你賠過件比我呀？」
 
我：「呵呵，買囉有咩所謂啫，買件更加靚既！如果有機會的話之後我同你去買好多好多衫！」
 
明明係想氹佢開心，講完之後佢居然無開心既反應，而係呆住左。
 
我 ：「Sarah？Sarah！」
 
係我再三呼叫之下 ，佢既魂魄總算重新歸位，但佢一黎就捉住我塊臉。
 
Sarah：「你唔好嚇我啊阿明…做乜突然之間咁奇怪…」
 
小姐，而家係你嚇親我啊…


 
我當然無講出口啦，只係默默摸佢隻手，因為我知道佢諗緊咩。
 
我：「我都唔知，或者真係會變成你諗既咁，但如果咁可以令到大家開心我其實無咩所謂。」
 
「畢竟我一直都係想你地開開心心吖嘛。」
 
「啪！」
 
無錯，呢下係Sarah掌摑我既聲音。
 
痛楚並未馬上退散，而係伴隨住熾熱既感覺係我右邊臉龐無限擴張。
 
Sarah：「如果無左你既話，我仲點樣開心！你呢個白癡傻人！」
 


佢講得無錯。
 
我的確做好會死既準備。