是咁的，照顧過我嘅護士死咗: 三百六十七、暗湧
喺救護車上面，我發現醫護人員個個神色凝重，問咗先知原來佢地今日已經走咗幾轉，由凌晨到朝早不停送老人家同小朋友，甚至一啲成年人入院。
個個病人都咳到出哂血，而且鎖骨至胸口嘅範圍發哂黑。
我無深究發生咩事，淨係同幾位救護員講咗句辛苦哂，之後就乖乖地被人送入廣華。
入到醫院，今日比平時多人。即係平時都已經夠多人，今日係再多一堆。多人到病床唔夠瞓，加開床位搞到水洩不通，男女病人仲要共處同一間病房，有病人無床瞓要坐凳療養。
我送咗去骨科之後，醫生同護士好快就幫我處理好。
醫生話我嘅情況唔嚴重，所以我唔需要留院觀察。其實大家都心知肚明，係因為今日醫院太多人，所以我依啲輕症自然要快快返屋企。
結果我無得喺病房等林林嚟，依家醫院嘅情況亦無辦法容許浪漫同驚喜。
我都知林林今日一定超忙，甚至可能OT到無得慶祝生日，既然係咁我唯有依家就送幅畫畀佢。
我去平時林林負責嘅骨科病房逐間望下，一間，無。兩間，無。三間，無。
奇怪，唔通去咗廁所？