是咁的，照顧過我嘅護士死咗: 三百二十九、直視

嗌完我就話：「我都覺得係唔應該歧視佢地。其實好多大陸人嚟到香港都好有貢獻，金庸呀倪匡呀李嘉誠呀咁，我地都會認同佢地係香港人。」

就算係依家好多所謂「香港人」，亦只係早幾代落嚟香港，所以其實根都係喺大陸。

只係嗰個年代落嚟嘅人都願意學廣東話，願意融入香港嘅文化，願意喺度工作同生活，並且對香港依個地方懷有感恩嘅心。

而事實上，當年湧入香港嘅難民人數更加多，雖然為香港產生咗大量勞動力，但亦為當時唔完善嘅社會系統帶嚟好多問題，亦搞到英政府好頭痕。

由於我大學讀歷史，自然知道其實英政府同香港政府相比亦唔高尚得幾多，醫療問題要到爆發鼠疫後先正視，木屋區無大火亦唔會有公屋。





不過英國人比較好嘅地方，係至少佢地見到問題出現之後會改。

一個外來嘅民族，只想喺殖民地掠水嘅政權，都尚且知道民生問題係要解決。

但當權力返到香港人自己手中嘅時候，依家嘅高官見到問題都唔會解決，巿民嘅訴求視而不見，難怪全世界都話香港退步。

「不過就算依家每日一百五十個落嚟嘅人都係精英份子，願意建設香港而唔係攞著數都好，香港嘅各種社會負荷都一樣係會承受唔住。實在無辦法。」黃醫生又再嘆氣。

「但其實已經落咗嚟嘅人，都有唔少貢獻緊香港社會。」





我故意講依個話題，就係想講依句說話。我又偷望一下林林，我想同佢講，我會接納你。

林林嘅面上，有種終於見到夢想成真嘅笑意，嘴角上勾嘅角度，小到幾乎無可能察覺得到。

就算咁耐以嚟每日嘅一百五十個單程證都係香港嘅負擔都好，我知唯獨你唔係，咁就夠。

林林嘅視線同我對上。

嗰一刻，示威現場，整個草地都好似靜咗落嚟。





連我自己都唔發覺，原來我已經可以直視林林嘅雙眼。