是咁的，照顧過我嘅護士死咗: 二百二十六、畫

媽媽喺廚房煮野食，察覺到十八子沖完涼，就兀個頭出嚟：「沖完喇？入房玩陣啦你兩個。」

佢係咪仲當我地好細個⋯⋯一男一女可以入房玩乜呀？

「我要玩潛烏龜！」十八子好雀躍咁衝咗入我房。

「咪住呀⋯⋯」潛烏龜喺廳玩都得啦⋯⋯

我正想阻止佢，但無奈身體唔方便，佢已經標咗入我房。





「唔？有幅畫嘅？」

我一拐一拐入到房，十八子拎住我張草圖喺度睇。

我即刻埋去搶返。

「咁緊張做咩喎？」

「都未畫好。」





十八子雙眼放出金光：「畫嚟送畀我？」

「唔係啊。」我將畫紙捲好，收入櫃筒。

十八子已經黑哂面：「⋯⋯送畀個護士？」

「係啊。」

佢眉頭深鎖咁睥住我，扁哂嘴。