關於少女的故事: 18-一吻

食完野，又係玩集體遊戲既時間啦。

半班人係沙灘度玩閃避球。而我地呢班唔想玩既，就係度玩true or dare。

我地將一枝空既5L汽水樽放係熄左爐既燒烤網上面，然後就轉。

我地順時針咁轉，玩既人有鄭熙龍、陳汝州、譚越其、劉曉晴、李永輝、杜學禮、于夏君同我，八個。

原本諗住食下花生就算，點知第一局，就轉中我。





鄭熙龍第一個就問：「True or Dare？」

我：「True。」

佢繼續問：「你鍾意既人係唔係呢個圈入面？」

我：「係度。」我講完，圍內旋即起哄：「Wow！」

我答完，到我轉汽水樽，點知又轉中自己，真係好無奈。





我：「True。」

鄭熙龍：「你今日著咩色底褲？」

我尷尬地說：「白色。」

鄭熙龍：「正喎，白色代表純潔呀。」

轉下一個啦，汽水樽轉呀轉，最尾轉左向鄭熙龍。







鄭熙龍揀左True，劉曉晴第一時間就問：「咁你鍾意既人係唔係呢個圈入面呀？」

鄭熙龍：「係度呀。」

死啦，除非佢係gay既姐，如果唔係，劉曉晴又拍緊拖，咁咪得返我同于夏君？

圍內聽到之後紛紛拍掌助興，好，下一局啦。

轉呀轉，轉左向宇宙個方向，宇宙揀左True。

鄭熙龍又問啦：「你同幾多個人Kiss過呀？」哇，呢條問題好呀，我都好想知。

眾人都忍唔住：「Wow！」





宇宙尷尷尬尬咁答：「兩個囉。」照計應該就係Emma同Tiffany喇。

好，再下一回合。

轉呀轉，汽水樽轉到令人眼花，卻又令人心大心細。

汽水樽既轉速愈黎愈慢，隨時會停落黎。

三，二，一，轉中左譚越其，佢揀左Dare。

鄭熙龍：「係依度Kiss一個人既額頭，除左你既劉曉晴。」

譚越其行左過黎，Kiss左我額頭一啖。





我呆左，嗯，劉曉晴都呆左。除左我地，成圈人又再起哄：「Wow！」



我呆左，點解會錫我？我個心七上八落，小鹿亂撞。

情況同上次做佢一日女朋友一樣，但我今次無打佢。

劉曉晴望一望我，然後黑臉，再起身同大家講：「我唔玩啦。」

「我都唔玩啦。」我緊隨其後。

之後，成個Game樹倒猢猻散，都無人玩啦。

我挽住劉曉晴隻手，但係俾佢fing開左。死啦，佢會唔會係嬲左我？





旅行日去到尾聲，要搭旅遊巴返學校解散，劉曉晴全程都黑臉。

佢似乎真係嬲左我。早知就唔玩True or Dare啦，而家玩大左真係唔知點收科喇。

而譚越其就想氹返劉曉晴啦，遞左D零食俾佢，但佢都唔食。

譚越其：「我知錯啦，早知就唔錫黃寶靈啦。」

劉曉晴：「你有錯咩？你都係玩遊戲咋嘛。」

譚越其：「咁你唔好嬲啦。」

劉曉晴：「我無嬲喎。」





身為女仔，我知道「我無嬲喎」呢四隻字並唔係咁簡單。

而「咁你唔好嬲啦」呢六個字更加係火上加油。