【懸疑】《連登連環殺人事件》: —-最終章—-

「陳Sir！陳Sir！」
 
重案組裡幾個穿起墨綠色西裝的男人，甫見蘋果陳走進來便直奔過去，隨行的還有胡文軒和影姨。
 
「做乜啊？晨早流流喺度大嗌。」蘋果陳不耐煩的瞧往他們。
 
「唔係啊，你快啲睇下先！」其中一個西裝男拿出電話展示於蘋果陳眼前。
 
胡文軒和影姨也在後方偷偷瞥看。
 




電話屏幕上只見一篇數字圖表，蘋果陳眉頭一皺，他根本不知道是什麼來的。
 
「咩嚟架？」
 
「係最新既網上民意調查，調查係關於警方既表現，你睇下！」他指著數表：「我地有六成市民都好滿意我地表現！」
 
蘋果陳接過他手上的電話，仔細一看，納悶的問：「得果六成，有咩要咁開心？」
 
「唔係吖，幾值得慶賀喎。」身後的胡文軒笑道：「我地香港警方民望一向都唔過四成架啦，今次算係個突破。」
 




「但係點解會忽然升咁多既？」蘋果陳問。
 
「應該係因為我地近排全力追捕日本黑幫餘黨，而且啲連登仔喺破案後，開始吹奏我地所致啦。」影姨解答他。
 
「咁都算係個好消息既。」
 
「阿陳，仲有另一個好消息啊。」胡文軒把手肘放在他的膊頭，笑咪咪的說：「我決定辭職，比機會你喺重案組獨大喇。」
 
「下，認真咩？」蘋果陳驚大過喜。
 




「係啊，我今日返嚟都係諗住宣佈呢件事，同埋執番好野走咋嘛。」
 
蘋果陳一怔，續問：「不過點解呢？」
 
「無啊......」胡文軒掃視重案組一圈，子熹和MK晴已經不再在了，而康仔和芊芊也請了假：「我想休息一下，搵番以前既自己。」
 
「以前既自己？」
 
他點點頭，望著玻璃窗外被陽光照得藍藍白白的天空：「嗯嗯，唔知由幾時開始，我因為名利而失去左原本既真我，所以我打算辭職去個旅行，順便尋覓一下自己既內心。」
 
蘋果陳聽後一臉胡塗，影姨卻在咯咯的笑。
 
「需唔需要一位旅伴陪你？」她問。
 
「無任歡迎。」







*



坪洲這天陽光普照，金澤光芒揮灑在綠油油的叢葉，驕嫩的鮮黃色花朵處處盛開。
 
海面上可見幾隻海鷗，無拘無束的享受著飛翔。
 
春意盎然，冬天終於過去了。康仔坐在涼亭下，拿著白紙咬著筆，專心地思索著。
 
每想到要寫的字句，他馬上用筆在紙上記下來，然後抱著愉快的心情繼續空想。
 




回憶，趣事，約定......點點滴滴他通通記錄下來。
 
康仔浸泡在回憶的日光浴，放肆地享受著寫作。儘管旁邊有人來過或走過，他也沒有留意。
 
不經不覺，他已經寫好了。他掏出一個雪白的信封，小心翼翼的把填滿文字的紙張放進去。
 
「諗咩諗得咁入神啊？」
 
突然有把聲音喚醒了他，他轉個頭一瞧，原來芊芊坐了在他的旁邊。
 
「芊芊？你幾時嚟左架？」
 
「嚟左都有十分鐘啦。」芊芊說：「我記得你同我提過呢度係散心既好地方，所以咪嚟囉，估唔到咁啱撞到你。」
 
「哈哈。」康仔對著汪藍海洋，吸了一鮮口的空氣：「呢度真係個好地方。」




 
「我頭先見你一路好專心咁寫信啵，諗住寄比邊個？」
 
「呢封？」康仔拿高手上的信：「比我最重視既人。」
 
「寫好嗱？」
 
「啱啱寫好。」
 
他然後走向涼亭的一邊支柱，蹲下來把信攝進支柱的罅隙中。
 
「你將封信擺呢度，唔怕比人攞左，結果你寫比既人收唔到咩？」芊芊好奇的問。
 
「放心啦唔會。」康仔莞爾一笑：「佢一定會收到。」
 




「嘻嘻，好啦。」芊芊淺笑。
 
一陣涼快的海風吹拂而來，仿佛回應了康仔的話。



-----全文完-----