[專員≠Hugo] 我係溫文樂，奉命調查一宗垃圾站藏屍案: 四十三

"你up乜春呀...？唔好玩啦樂哥，而家點算呀..." Hugo一臉愕然咁望住我。 

"你岩岩唔係話咩Billy咩？"我問。 

"我幾時有出聲呀？而家點算呀...我唔想坐監呀... 
你係差佬，你一定有方法既！"Hugo非常焦急。 

的確，雖然我對自己行兇完全冇印象， 
但係環境證供好明顯都對我相當不利。 
而且有一點非常重要，死者係死於槍傷， 




現場又只係得我同Hugo... 

要去自首嗎？ 

唔得，我明明冇做過，點可以自首？！ 
但如果報警，我同Hugo既嫌疑實在太大。 
一不做二不休，只要我地處理好屍體， 
加上附近冇閉路電視，我地應該可以甩到身。 
解決左當前既問題，先至搵番真正既兇手都未遲。 





"Hugo，我地冇得揀，唔想坐監既就幫手處理佢..."我未等Hugo回應，就開始計劃一下。 

首先唔俾任何人出入，呢樣以我既身份絕對唔難處理， 
之後就靠Hugo去買所需既工具， 
刀，攪拌機，乾冰，腐蝕性液體等等。 
因為，我決定直接係垃圾房入面碎屍。 

"樂....點解你仲可以咁冷靜？ 
頭先見你手起刀落..."Hugo眼中露出一絲驚訝。 





點解我可以咁冷靜？我都唔知道。 
或者因為平時都要對住好多屍體， 
基本上免疫左掛... 
雖然，我手起刀落既時候， 
居然有一絲莫名既快感。 
或者係人性入面嗜血既部份發作啦。 

就係咁樣，我同Hugo夾手夾腳將屍體斬件， 
跟住攪碎內臟。 
然後用垃圾膠袋裝好，當中夾雜住乾冰，盡量避免佢發臭。 
最後，就收係多個等待運送去堆填區既垃圾膠車之中。 

完成之後，我同Hugo就係附近監察， 
直到工人將一車二車既垃圾送到垃圾車上， 
我地先至鬆一口氣。 





呢個時候，我突然聽到一把聲。 

"Billy，殺左眼前呢個男人， 
只有死人先可以保守秘密..."