【慎入.無厘頭重口味痴線故】好對唔住，我哋醫院嘅報告已經證實咗你。。。。。: 截查

「喂！！！！！你想點呀！！！！！」

我＿咩？部跑車識講嘢嘅，唔係咁恐怖呀？

「對唔住呀有怪莫怪呀，一時得罪放過我啦唔好搞我呀！」

嚇到有少少想標尿嘅我，好快放低咗嚿石，頭也不回咁跑返上的士先，不過呢單嘢咁痴線陣間攞完隻鴨返嚟一定要問吓德叔咩料，希望到時仲記得啦。

點都好擾攘咗一陣，都唔好再晒太多時間，事不宜遲依家正式出發去梁順記！





纜好安全帶，撻著部車，我全速咁朝住梁順記呢個終點進發。初時都相安無事，仲好快過埋海添㗎。

只係後來當我渣到去大角咀嗰頭，突然有交通警想嚟截我，可能我超速啦我都唔係好清楚呀，但係時間咁緊迫，我真係唔得閒理佢呀。

於是，我嘗試去撇甩呢條差佬，點知佢條友呀由大角咀一路係咁追，追到我入荔枝角都仲未肯放過我。

所以就係咁樣，我終於都係敵唔過呢個死纏爛打嘅差佬，畀佢截停咗喺路邊。

「熄匙，車牌，身份證。」





「阿Sir，我好趕時間呀！」

「趕時間就可以亂渣快車喇咩？咦，你個司機證……」

係喎一時醒唔起自己無的士牌添，要諗諗計先得。

「係咁㗎阿Sir，相入面嗰個真係我嚟㗎！」

「咪玩喇你叫古天岳，張司機證就寫住劉隆德，點會係你呀？」





「其實係咁㗎，之前我最近去咗韓國整容，返嚟之後又咁啱發現親生老豆係姓古㗎，所以咪改返個咁好聽嘅名，天岳天岳咁囉，身份證同車牌都改埋，係漏咗張的士證無改啫，通融吓啦。」

「嘩你真係當阿Sir弱智㗎喎，咁嘅大話都講得出？落車啦我有嘢要問你呀，唔該合作。」

唉今次出事，又畀人阻一阻。個交通警叫我落車之後要我做酒精呼氣測試，咁我無飲過酒就當然過關啦，點知佢仲未肯放過我！

「打開車尾箱睇吓。」

「唔係咁好喎。」

「咩叫唔好呀，信唔信告你阻差辦公呀？」

呢個差佬真係有風駛盡𢃇，的士當私家車渣啫，大不了咪扣分兼罰錢，好心佢就通氣啲，唔好晒我呢啲良好市民嘅寶貴時間啦！

雖然我都有試過向佢表達過自己嘅意願，但佢真係好堅持，咁無計啦。落車之後我就行咗去車尾箱嗰邊，準備打開嚟比佢睇吓。





「嗱， 開咗喇，你滿意未呀？」

正當我以為呢件事可以就快解決嘅時候，情況居然無咁簡單！

待續...