親愛的，老師也有喜歡過你: 那年三十，我真的想你了

每朝醒咗第一件事, 就係打開Snapchat, Send張無聊相, 同我D friends儲火火.
然後就係打開晒其他人send俾我嘅相, 之後先會起身. 其實儲火火呢個動作, 已經變得好冇好意思.
因為我根本都唔會睇人哋D相, 我亦唔會特別send啲咩比人哋睇. 啲火火就好似為儲而儲咁. 不過可能慣咗, 大家都係繼續咁儲.

你地以為我同K會儲火火？咁就錯晒喇, 始終佢已經係個30幾歲嘅人, 又點會晒啲咁嘅時間去儲火啊.
我嗰朝開吓開吓啲相, 先打開佢幾日先send比我張相. 佢張相影得好差, 冇構圖, 仲要食超級大特寫嗰「兩杯」iced coffee 同埋我最憎嘅綠茶奶蓋咖啡.
起初我都冇為意, 但張相time-out 咗之後, 我先醒起佢好少會有影「二人份量」嘢食嘅相.
我即刻replay張相, 再screenshot低研究吓. 勉強見到左上角有隻男人皮鞋, 睇落都幾似佢平時着開個對.
唔好問我點解記得佢對鞋係點嘅樣, 你哋唔好諗多咗, 人靠衣裝, 識睇一定睇鞋. 話明張相係大特寫,
咁所以除咗嗰兩杯嘢, 其他嘢都唔係好睇得到. 我放低部電話, 叫自己唔好多諗. 人哋同邊個去街、拍拖, 關我咩事喎.





今個星期六朝早難得唔洗教課, 我緊係喺床度攤多陣. 㩒㩒吓電話, 我手痕, 爬起身拎咗放喺床頭櫃嗰本日記出來,
尋晚攝咗喺日記底嗰張postcard亦隨之掉咗落床度. 我慢慢打開本日記, 望住16歲嘅自己寫下嘅文字.
嗰陣清澀嘅少女情懷, 字裡行間慢慢散發出嚟. 我不禁慨嘆自己又老咗喇. 我望住本日記,
中間有好多頁喺兩年前都比我撕咗落嚟. 唉, 點解我要撕落嚟, 唔撕落嚟, 起碼依家仲有啲嘢回憶吓...
洗咩搞到依家咁, 乜嘢都係憑空想像, 要知道嗰啲回憶一日一日咁變淡, 最後呢個世界記冇人知㗎喇.

我將本日記放返原位, 然後就諗, 如果我有時間, 我一定要將我同佢嘅往事, 寫成一個可歌可泣嘅故事, 哈哈哈.
之後我個故事, 變得街知巷聞, 成為全港最暢銷嘅小說之一. 大家比我ff下啦. 淨係諗吓都開心. 頭先嗰啲無病呻吟嘅情緒, 即刻全部走晒.





係張床度Hea到咁上下, 我好艱苦地離開張床, 走咗去廁所梳洗一下.
當我返到枱頭準備攞面霜揸下塊面嘅時候, 我係我混亂嘅枱頭度, 搵返佢上次寫俾我個封信. 然後我醒起我仲未睇完封信.

「唔知你仲記唔記得我三十歲生日嗰一晚, 除咗呢封信, 嗰次應該係我寫得最多最多嘢比你嘅一次. 當時我冇諗咁多,
我完全冇諗過你睇完之後會點.我淨係知, 當刻我淨係好想搵你, 我想有你係我身邊陪住我, 嗰陣我真係好懷念以前嘅我哋.」

唔好以為老師, 寫嘢就有返一手, 其實佢都只係個普通人, 有時講嘢都可以好冇營養.
望住呢封信, 見到佢呢度講一忽, 嗰度又講一忽, 佢似乎真係諗到咩, 就寫咩出嚟.
學啲老師話齋, 文章結構散亂、內容偏離主題, 表達手法有待改進.
或者, 一講到感情事, 再本事嘅人都會變到心亂如麻; 遇到我哋呢種關係, 再清醒嘅人都會變得當局者迷.





「記得嗰陣過咗排你同我講你分咗手, 我以為我會有機會. 我真係以為你會比一個機會我, 可惜事與願違.
因為你, 我明白了咩叫有緣無份. 但我依然感激喺我感情空窗嘅呢7年, 一直有你陪我.」

好聽啲咪部, 唔好聽咪攝囉. 大家你情我願嘅, 冇話感唔感激嘅.
雖然一直對佢都有好感, 但係次次有得比我揀, 我又好似從來都冇諗過要同佢一齊.
或者咁講, 我地都喜歡對方, 但應該從來都未愛過對方.