<<坐上前往尖沙咀的天星小輪，迷失在維多利亞港>>: <<迷失十>>
「點解......點解會有中文字？」
對，在這刻滿了不明圖案和不明文字的船柱上，竟然刻有中文字。
但這些中文字的痕跡十分淺淡，感覺曾經被誰刻意修復過，好讓別人看不出這些文字。
「迷、等、亡、尋、已......唔得，顏色太淺啦，完全唔知想表達啲咩。」阿康努力地想解讀那些文字，但實在無法組成有意義的句子。
「喂，你又話咩馬雅文字嘅？點解會有中文出現㗎？你係咪又想呃我哋！」阿萍質問周博士。
「哈，真係好笑，又唔係得我一個識睇呢啲字，我會唔會咁蠢講大話。仲有，呃你哋我有咩著數。」周博士冷笑了一下，便又繼續觀察船柱，沒有理會阿萍。
「周博士佢的確無講大話，頭先嗰啲馬雅文字的確係咁嘅意思。」阿華看到阿萍還想發作，便先一步阻止了她，畢竟吵鬧對眼前的狀況並沒有任何作用。
我和其他人都專注於解讀那些中文字，希望能夠發現多一點線索，可惜的是，那些中文字只是徒添了謎團，對事情並沒有任何幫助。
正當大家也準備放棄研究這些文字時，我卻被眼前的痕跡所吸引著。
這痕跡比起剛剛那些中文字還要淺薄，字形更為模糊，基本上是難以看到文字的正體。
但是，在接觸到這痕跡時，我一下子便知道這是甚麼字了。
這是一個「遙」字，而我之所以一下子猜到這個字，是因為這痕跡上，本應是「月」字的部份，被一個彎月的圖案取代了。
會這樣書寫「遙」字的人，我剛好認識一個。
那就是我的前女友 － 林書遙。
「無可能......無可能......書遙明明係去咗外國，無可能係佢......就算佢無去外國，都無理由會出現喺呢度！」我腦海裡閃過很多的念頭，都想不通為何這裡會出現一個這樣的「遙」字，難道真的只是事有湊巧而已？
「阿森，阿森！」阿康拍了拍我的肩膊，把我從混亂的思緒中拉回現實。
「吓？做......做咩呀？」我還沒有從那個「遙」字的震撼中回復過來。
「我啱啱同阿May商量過，認為再係咁落去都唔係辨法，所以我哋想再試下落去駕駛倉。」阿May不知道甚麼時候和阿康商量好了。
「但係度門都打唔開，仲點落去？」我實在不認為用盡吃奶之力也破壞不了的木門，會突然能夠被打開。
「唔係呀，我無諗住打開度門。因為阿May啱啱提醒我，其實我哋可以喺船外面爬落去下一層，咁樣做我哋就可以同外界聯絡啦。」阿康笑著說，好像發現了新大陸似的。
我把視線投向阿May，阿May則別過頭去，避開了我的視線。
「阿康，我唔建議咁做，始終我哋唔知駕駛倉嘅情況係點，萬一落到去發現有危險，我哋無人會救到你。」我嘗試阻止他。
「危險？唔會嘅，一架船可以有咩危險，阿May講得啱㗎，我哋繼續咩都唔做就真係危險啦。」看來阿May灌輸了不少東西給阿康，否則難以想像阿康會主動提議爬向駕駛倉。
「就算駕駛倉無嘢，你徒手爬落去都危險啦，依家仲未危急到要冒呢個險。」
「唔駛擔心我喎，我雖然諗嘢唔叻，但我對身體能力都幾有自信㗎。我除咗做健身，攀岩呀，游水呀都難我唔到。而且，呢度離碼頭唔算遠，有咩事我應該可以游返上岸，半個渡海泳難我唔到嘅。」阿康看了看阿May，自信地說著。
所以說，女人有時候還真可怕。
周博士如此，阿May亦是如此，與她們相比，阿萍真是來得可愛多了。
「咁啦，你要去我都阻止唔到。不過，去之前我諗有必要同大家整理一下現況，同埋，都有必要話畀佢哋知你嘅行動。」
「呢啲小事唔駛話畀佢哋知啦，阿康好快搞掂啫。」阿May聽到後急忙阻止，大概是不想節外生枝吧。
「係囉，我爬落去好快啫，唔駛搞咁多啦。」阿康隨即附和。
「唔得，我哋依家發生嘅事已經夠奇怪，萬一你嘅行動會影響到其他人點算？同埋，喺你行動之前，我有啲嘢想確認一下，我始終覺得，我哋十幾個人聚集喺呢度，並唔係偶然。」
我和他們討論了一會後，便向其他人示意。
「大家，我有少少嘢想講。」
眾人開始聚集起來，但......人數好像不對。
「咦？點解仲爭一個嘅？」我向在場人士詢問，但他們也表演出才剛知道的模樣。
「係李樂彤！」明叔說話的同時，便已動起來找尋著李樂彤的身影，我們亦隨即而行動。
然後，我們終於在船頭發現了李樂彤，只見她的身體開始出現老化的現象，不過，速度並沒有鄧美玉和蕭sir般快速。
「點解會咁㗎？李樂彤，發生咩事？」明叔看到她正在慢慢老化，馬上跑到她身旁。
李樂彤搖了搖頭，甩開了明叔的手，慢慢地走向船柱。
「人生......本來就係無常，死亡，一啲都唔可怕。我哋只係回歸返應該要去嘅地方。」李樂彤輕輕撫摸著船柱上的圖案，口中盡是意義不明的說話。
「李樂彤，你......你係咪知道啲咩呀？」看到李樂彤的變化，我猜想李樂彤應該知道了甚麼。
「我？我咩都唔知，同樣地，你哋都係咩都唔知。正因為無知，所以我哋先會嚟到呢度。如果我哋一早知道自己嘅方向，我哋就唔會嚟到呢度。」李樂彤繼續說著她那意義不明的說話。
「我哋咩都唔知？點解你會咁講？我哋又點樣搵到自己嘅方向？」我沒有放棄與她的對話。
「方向只有自己能夠決定，不過聚集喺度嘅人都係迷途嘅人，只能夠接受死亡嘅命運。」
「你意思係我哋會死？點解你會知道咁多嘢？」雖然李樂彤的說話聽起來瘋瘋癲癲，但我感到，她的神智是正常的，而這些說話，肯定和我們的現況有所關聯。
「點解我會知道？你都可以，當你愈接近死亡，就愈會知道真相，佢會話畀你知一切。」李樂彤突然意義不明地把右手指向上方。
「佢？佢係邊個？」我看到李樂彤身上的老化現象開始加劇，只好趕緊詢問。
「佢......係孕育我哋......嘅......神......」李樂彤的老化現象已十分明顯，說話的能力也漸漸失去。
「神？」聽到這話後，我禁不住抬起頭向上方望去。
「你......係......多......」李樂彤的話還沒有能夠完成，她便站著便成了一副白骨，然後，她便跟蕭sir和鄧美玉一樣，徹底風化並化為塵土。
但......不知道是否錯覺，我好像看到，風化後的李樂彤，並不是單純化為塵土，而是化成一些不明粒子，向上方飛去。
「又一個，點算呀，我哋係咪真係會全部死喺呢度？」阿萍看到後，忍不住哭喊起來。
「李樂彤點解會無啦啦變成咁㗎？」阿康激動地說。
的確，鄧美玉和蕭sir老化前，至少情緒都有變得激動。
但李樂彤，一直都沉默不語，看出去一點也不像會激動的人，甚至乎連老化出現後，都是一臉平靜，這樣的她，到底為甚麼會跟鄧美玉和蕭sir一樣出現老化。
「我......我見到......」鄭樂欣顫抖的聲音，吸引了大家的目光。
「你見到咩呀？」急性子的阿康追問。
「我頭先同阿輝見到，周博士同李樂彤講咗啲嘢，之後......李樂彤就一個人行咗去船頭。
「咩話？」我們聽到後，都把目光投向周博士。
難道，李樂彤是周博士特意引導向死亡的？