[真人真事][校園][純愛]《總有一天，會再次遇見》: 第十二章

跟住就開始放聖誕節假
嗰排真係一個全職廢青
十點零起身,
跟住就全日喺屋企,
除左食野又或者嗰日要去街,
否則我都絕對唔會離開屋企半步
做嚟做去咪又係嗰幾樣,
唔係打機就係打j
梗係冇溫書啦
中四嘅我,




又點會意識到溫書嘅重要性呢
同埋我都唔記得有冇講過,
我嘅惰性係比較重
冇人逼的話,
係唔會主動去做啲冇興趣嘅野
唔知各位有冇聽過一個比喻啦
如果想隻馬要跑得快,
究竟係擺舊食物係前面引誘佢好啲,
定係喺度鞭打佢實際啲
我就擺明係後者啦




所以即使好快就會考,
不過我一於係懶理
咁當然平時成績又唔係好差
合格有餘,
數學自己都覺得唔錯
絕對唔係自吹自擂,
係咪男仔通常都係叻數學
咁樣我就真係唔知,
phy chem bi都唔係好差
咁多科嚟講係英文麻麻地




當然去到後來我先知,
原來我係同全港嘅學生鬥
而唔係淨係顧住自己間中學咁狹窄.

嗰年嘅聖誕節我同左呀邦同埋仲有幾個男仔一齊過
除左呀邦之外,
有啲依家已經冇聯絡,
出到嚟真係好難再聚
除非真係好好朋友啦
咁我又覺得,
如果真係想keep住關係嘅話,
係冇可能keep唔到
有時候係睇你有冇心啫
你覺得嗰個人值得嘅話,
你就會好努力咁樣維繫




相反嘅話,
你寧願喺屋企都唔會想同某某朋友出去
呢個就係分別
我記得嗰陣都係成班人出左去食飯,
成班男仔就係咁架啦
跟住有呢度行下嗰度行下,
癲癲喪喪咁樣又一晚
跟住見到我地班幾個女仔
不過就唔見晞澄,
唔通佢條蛋散仲喺日本未返
跟住我聽到有人問晞澄去咗邊
咁我就口快快答咗去咗旅行,
嗰陣真係一心想解答條友個問題
完全冇其他意思
跟住就梗係俾人抽水啦,




講埋啲「好熟喎」嗰啲野
尷尬就完全冇,
因為真係冇野
就連呀邦都私底下問我係咪對晞澄有野,
佢見我地成日吱吱噚
我都係話冇
因為的確係清白
我嗰陣時只係對佢改觀,
識落又唔係真係咁差
我亦都明點解咁受男仔歡迎
玩得隨和,
笑起上嚟又真係幾靚嘅
不過把口唔收咁解囉
我見佢對住第二啲人都冇咁串嘴,
係唯獨同我傾計嗰陣就零舍多野講,




不過又唔討厭嘅
或者呢啲就係我地嘅相處方式,
同埋仲有一樣,
就係佢整芒果布甸好好食
聖誕嗰幾日就係喺度食佢嗰啲芒果布甸,
唔可以否認佢整野食又幾好食嘅,
出面買嗰啲我覺得都冇佢咁好食
真係睇唔出,
呢啲就係當時我對佢嘅印象喇.

聖誕過左之後就梗係除夕啦
我都係同幾條蛋散一齊過
同聖誕一樣都係通街行下,
唔使問喇,
今次都係冇女




不過講還講,
雖然我當時都係一個毒男,
但正如我之前話齋,
唔係好沉迷拍拖或者身邊有女
都係順其自然啦,
有時有女仔喺度,
講嘅話題自然要縮窄
傾起上嚟又冇咁爽,
你知成班男仔圍埋一齊係傾咩架啦
又點可以俾女仔聽到呢
冇女喺度有好有唔好啦,
我又唔覺得有乜野特別
當時嘅科技冇依家咁發達,
嗰陣係05年轉06年,
依家嗰啲facebook instagram whatsapp,
嗰陣全部都未出咁滯
當時係msn,xanga年代,
但我又冇晞澄個msn,xanga
所以完全聯絡唔到佢,
佢條友就正啦,
可以去旅行
唔知佢條蛋散有冇買手信呢
同埋諗諗下,
問佢拎msn都唔係一件壞事
起碼第日想抄功課嗰陣,
都可以喺msn問定佢
sms就唔好喇,
因為唔係成日用電話
一於喺放完聖誕假之後問佢先.