[愛情甜故] 因為一次睇到佢打飛機,所以我地變咗做炮友: 140.S325.尷尬﹑冷漠,還有...

當列車去到北角嗰陣，我望住出面有一大群人企喺出面
車門一開，啲人即刻湧晒上車，葉子朗一細步一細步咁行近咗我，但佢始終冇望我，仍然耷低頭，逃避我嘅視線
後面一大群人湧入車廂，車廂內嘅空位都愈嚟愈少，人同人之間都冇咩空位淨落嚟
我同葉子朗之間嘅空間都愈嚟愈少…
葉子朗身後嘅人群一直行入嚟，佢由本來側住身企變成面對住我企
我同佢都冇望對方，我望左邊，佢又另一邊，大家突然間尷尬咗…
喺佢身後嘅人因為一直要逼入嚟，唔小心撞到葉子朗，葉子朗成個人向我踏咗一大步
「啪！」「唔好意思呀！」
葉子朗冇因為後面嗰個人撞一撞而跌落我到，反面伸出另一隻手㩒住咗玻璃上面支撐住
兩隻手，一隻手捉住車門隔離嘅扶手，一隻手喺我手臂隔離嗰個位，㩒住個玻璃


「唔好意思…」葉子朗細細聲咁同我講
「嗯…」我細細聲答佢
佢企穩咗之後就縮開咗㩒住玻璃嗰隻手，我同佢之間嘅距離…好近…近到可以聽到對方嘅呼吸聲…
我唔敢抬頭望佢，只係夠膽耷低頭，然後偷瞄佢一眼
葉子朗一隻手插住喺褲袋度，撇開臉唔望我，望住個扶手
我一直都耷低頭，手不㩒緊握住手袋嘅孭帶，聽到自己嘅心跳快速咁噗噗跳
感覺上成架車入面，周圍都冇人，我眼中宜家望到嘅只有葉子朗呢個人
個子高高，輪廓分明，身上散發住淡淡嘅沐浴露香味，一啲都唔會令人討厭
明明係以前聞過嘅沐浴露香味，呢股香味同佢個人好夾
但…呢個心跳加速係咩事呀…？


我微微抬頭，點知同佢嘅視線對上咗，佢好快就自然咁移開咗視線，我都微微耷番低個頭
「下一站金鐘，Next station Admiralty。」
當列車駛入月台，車門打開，好多人都落咗車，車入面嘅位置即刻鬆動咗
當其他人都落晒車之後，葉子朗即刻後退到我對面企
洗唔洗咁樣呀…我耷低頭輕輕抿嘴
列車再次駛入隧道，廣播再次響起
「下一話中環，Next station Central。」
列車到咗月台，然後打開車門，葉子朗先行出車廂，我跟喺佢後面
我行咗兩步，然後停咗落嚟
「葉子朗…！」我衝口而出叫住咗佢


「請勿靠近車門，Please stand back from the doors。」
佢聽到我叫佢，喺車門閂上同時，佢停低咗，但佢冇擰過嚟…
「葉子朗。」我再次叫佢
佢深呼吸，可能你會問我點解我會知佢深呼吸，因為…佢博頭微微縮起，然後又放鬆番落嚟，係一個沉重嘅呼吸…
佢慢慢成個人擰過嚟面向我
「有咩要講呀？方芷諾。」佢冷漠嘅聲線直打入我心房
「點解你可以咁冷靜，咁冷漠？連最後朋友嘅餘地都唔留低？」我同佢之間保留住一段嘅距離
玻璃上反映我同佢嘅身影，我地之間嘅距離感，已經連玻璃都可以照出嚟
「咁樣唔係你一直以嚟最想㗎咩？」佢伸手插褲袋，定睛望住我反問一句
「我…」我冇辦法答出一個完美嘅答案，又或者解釋
「你一直想要嘅了結，唔係咁樣咩？」佢再反問我，「只係我嘅決斷，係你意料之外嘅事嚟，所以你先會咁啫係咪？」
我…選擇咗沉默…
「你仲想要得到啲咩先足夠？」佢一邊講，一邊行到我面前，然後停低，凝視住我
冰冷嘅言詞，再加上嘅冷漠眼神，呢個葉子朗…好陌生…佢根本就唔係我認識嘅葉子朗
「你喺我身上拎到嘅嘢，唔係已經夠多啦咩？」葉子朗同我對望着，「呢個結果，唔係你一直期待住㗎咩？」


「你唔係我認識嘅葉子朗…」我微微搖頭，「我識嘅葉子朗唔係咁㗎…佢唔會咁冷漠…」
「嗯，啱呀，我唔係你理想中嘅嗰個葉子朗。」佢點一點頭，「唔係嗰個再對你死心塌地，一心一意嘅嗰個葉子朗。」
「對上一次你冷漠對我，係我第一次表白，你拒絕我嘅時候…」我望住佢呢個要將我拒於千里之外嘅表情，心更難受，比起中學時佢拒絕我嘅表白，更難受…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link