自掘墳墓: 每個人生裡的邪惡
--------------------------------------------------------------------------------------------------------------------
安叔的回憶（十一年前）
安叔剛升上工程師主管，卻沒空跟同事朋友慶祝，而是放工後趕回家照顧發燒的兒子——志衡。
八歲的志衡，確診自閉和輕度弱智，無法在正常學校讀書，而且身體抵抗力差，時常患病。
回家後，安叔便衝入房間，蹲在志衡的床邊察看病情。
「志衡佢食左藥，應該會好架啦。」妻子阿雯說道。
阿雯是全職家庭主婦，本來她在保險公司裡身高要位，卻要為患病的兒子而辭職。
書架上的結婚照和全家福非常甜蜜和溫馨。工程師和核保師，兩人結婚時大排筵席，多少人羨慕得很，雙方父母都興高采烈。
他們卻生下有特殊需要的兒童。
志衡久久不會說話，無法專注事物，記憶力比一般同齡兒童差，不願跟其他孩子玩耍傾談。安叔和阿雯擔心他的智力成長狀況，便帶他看醫生，他們得到的卻只有壞消息。
至此以後，阿雯便專注家務，親自照顧志衡，而安叔則是家庭的經濟支柱。
本來事業愛情兩得意，現在卻跌進人生的低谷，安叔成為家庭財政收入的唯一依賴，不像以前般夫妻一起工作。
照顧志衡需要付出的金錢和耐心比一般小孩要多。
「老婆今日辛苦啦……」安叔疲憊到坐到沙發上。
「唔辛苦，為左衡仔，大家都要努力。」阿雯嘆氣道。
「我升左職，做左主管，人工多左，希望幫到大家啦。」
「係呀？唔洗同同事慶祝？」
「唔啦，翻嚟睇衡仔。」安叔最看重的，就是自己的家庭。
即使壓力再大，事情變得再糟糕，他都要撐下去。
「我出去食支煙先，順便行下吹風，有嘢要買？」安叔問道。
安叔不賭不喝不嫖，抽煙是他減壓的唯一方法。
「唔洗啦，唔好太夜翻。」阿雯明白安叔的苦況和困擾，是個體諒丈夫的好妻子。
安叔到附近的便利店買煙，坐在店舖前吞雲吐霧。他回想起一家人的種種時光，志衡剛出生時那天真爛漫的面孔，與阿雯新婚時那感動浪漫的時刻。現在他每天要拼勁工作，回家後則是不辭勞苦地協助阿雯照顧志衡。
他和阿雯結婚後本想一年至少去兩次旅行，現在霎那間就是結婚八周年，可是一次出遊都沒有。
不知不覺間就待了二十分鐘，安叔本想回家，卻碰見同事Alan，喝個半醉獨自走著，左右搖晃連站住都不行。
Alan對工程師主管這個位置虎視眈眈，想必他是野心落空，才借酒消愁。安叔雖然工作進取，卻從未將任何同事視為敵人。安叔升遷，是勤奮踏實和歷年貢獻的獎勵，不是耍手段拍馬屁得來的。
「咦？楊阿頭咁悶自己一個人食煙呀？」Alan向安叔說道。
「我落街行下好快走，你都翻屋企盡快休息啦！聽朝仲有Project跟。」安叔回應。
「乜咁快就識擺上司款呀？」Alan展開邪惡的微笑。
「你醉左啦。」安叔說道。
「醉？哈哈，同你慶祝講下笑咋。話說你升職喔，禮拜五都唔嚟玩下？」Alan是指逢星期五的同事聚會。
「唔啦，阿仔病左，要翻去睇佢。」安叔淡然回說。
「係呀？」Alan靠到旁邊的鐵欄：「係關心仔女嘅，工作上就唔好咁搏殺啦。」
「你咩意思？」安叔的情緒被牽動。
「係呀，邊有人好似你咁，睇重家庭但係又要爭上位，成日OT幫老細度橋。安份早D翻屋企食飯唔好咩？係要同人鬥成績，係要懶係勤力。」Alan不屑地說。
「我係一家人嘅經濟支柱，先會憑自己個人努力做好份工，唔係懶勤力。」安叔義正詞嚴。
「哈哈，真係得意，真係好笑。」Alan不禁大笑。
「你好應該反省自己講左咩。」安叔緊皺眉頭。
「楊立安，我話俾你聽，人生好多事都係平等嘅交換……」Alan穿著西裝，語氣卻像一個流氓：「有得必有失。」
「我唔需要理你。」安叔轉身便想離開。
「Raymond唔講都唔知，原來你個仔係弱智嘅！真係諷刺！」Alan抱腹大笑。
這句話立刻觸動安叔的神經，彷彿燃點了怒火的藥引。
「你講嘢小心比較好。」安叔怒目盯緊醉昏昏的Alan。
「哈哈哈哈哈哈哈哈哈哈哈………….唔得啦，太好笑啦。」Alan邊笑邊流淚：「真係連天都睇你唔順眼。」
「你又升職，又娶到好老婆，起初我真係好羨慕，又好妒忌，不過我而家發覺個天好公平，唔會俾你一帆風順。我萬萬估唔到，原來你一直唔喺公司講自己個仔嘅原因，就係因為佢呢度有問題，哈哈！」Alan敲敲右腦。
「夠啦！你唔可以再講我個仔！」Alan的說話燃點了安叔內心憤恨的火苗。
別人可以恥笑他，可以指罵他，可以欺負他，但絕對不能奚落他的家人。
「點解我唔可以講？唔敢面對？定連你自己都覺得生個弱智仔出嚟係種屈辱？你嘅親戚點睇你？有冇叫你生多幾個？係呀！差少少唔記得，你老婆已經生唔到！哈哈……哈哈哈！」
「你唔準！！！」安叔一把拉住Alan的襯衫，將他推到地上。
Alan咳了幾聲，然後緩緩站起來，面容依然是邪惡的笑容。
「楊立安，連喐我都唔敢呀？我就企喺度，等緊你衝過嚟，原來你始終都係個懦夫。」
「你以為我唔敢？」安叔氣得雙手緊握拳頭。
「我話俾你聽，由你個仔出世嘅一刻開始，佢就會成為你一生嘅負累，即使你點呵護佢，點教育佢，佢都只會係個智障仔，永遠係你家族嘅恥辱，一個社會唔會想理嘅渣滓。你唔想承認，但呢個就係現實，好笑嘅現實。」Alan雙手收進褲袋，對怒髮衝冠的安叔毫不害怕：「我地每個人嘅人生裡面，都有……『邪惡』嘅存在，有D喺你嘅心底裡面，有D就喺你嘅面前，可憐緊，唔係，係恥笑緊你嘅寶貝仔，永遠都唔可以同正常小朋友一樣去玩，一樣去翻學，去享受童真，唔可以好似你咁搵份好工不斷升職，唔可以好似你咁搵個好老婆結婚，唔可以……」
Alan話口未完，一記重拳打到Alan的臉上，他心想安叔中計了，斷送了自己的大好前程，誰知這下的無情力直接將Alan打飛，後腦撞到旁邊的鐵欄上。
Alan躺在地上一動不動，鮮血從後腦流出，欄杆上的血跡被便利店的員工發現。
就這樣，安叔被判誤殺，坐牢六年。
獄中第五年，安叔接到消息，志衡在無人看管的情況下，衝出馬路被貨車撞死。
阿雯當時在店內買菜，一轉身便只能看見奄奄一息的志衡，她一個人，又豈能完全保護兒子？倘若安叔還在家人身邊，事情或許就不會變成這樣……
即使出獄，他依然非常自責，不敢面對妻子。
他一時衝動，就斷送了一切。
數年後，政府秘密派人邀請安叔加入考古隊，報酬非常豐厚。他為了從現實中抽離自己，便答應參加計劃。
-------------------------------------------------------------------------------------------------------------------
安叔分享了一切，我感覺到他靈魂裡的哀傷和自責。
「嗰種賤人……唔值得你出手……」我說。
「如果我當時好似你咁諗就好啦。我真係蠢，咁都中計。」安叔坐在牆邊，右手遮蓋著包紮好的傷口：「嗰條友雖然係賤，但都係生命，都有自己嘅屋企人，我變相害左另一個家庭。」
「所以你極力阻止悲劇再次發生……」我恍然大悟：「幫Ocean擋槍，唔想我殺左John。」
「你的確係個明事理嘅人。咳咳，夠廢話啦，我要休息下。」安叔苦笑道。
這時Ocean和小儀走過來這邊。
「而家點樣？出口就喺上面，但係睇大家嘅情況都唔會再去爬。」Ocean抬頭看著「墓頂」的乾屍。
「休息下先，慢慢諗方法。」我無奈地說。
「我地唔可以等太耐，腰包裡面冇乜食物同水。」小儀擔憂地說。
「之前你係咪有咩想法，話要證實一下，而家有結論未？」安叔問我。
對，我已經組織到一個。
「係，我諗係時候要講下……」
我呼了一口大氣，挺起胸膛，將我的想法全部說出來。