紙言

我係喜達,撈麵界既亞視: 黑林頓與黃俊篇(2)





黃俊同黑仔食呢餐飯之後既一個月

黑仔拎住成副身家去左黃俊屋企

八萬蚊

入到去見到黃俊同佢爸爸

『老闆你好,喂俊』





『老咩闆姐,收左工叫返我uncle啦』

『喂黑仔過來,教你玩』

『那睇住呢到,咁樣就升,咁樣就跌,喇喇喇..有晒圖睇,話晒比你知黎緊會係升定跌,屌送錢呀』

『衣d呢,叫非農』

『飛龍?』





『係呀』

『哇飛龍都有,真係唔簡單呀』

『唉都係慢慢同你解釋,帶左幾多錢來玩』

『呢到我儲左好耐架喇,八萬蚊』

『八萬蚊..玩住先啦..好快你就唔止得一個八萬蚊架喇』





『食得飯喇,呀仔,同黑仔去洗手食飯啦』

成餐飯黑仔都食得心不在焉

黑仔咁大個仔第一次比咁多錢人

黑仔每日都打比黃俊問情況

反而黃俊每日都幫黑仔賺錢

由一開頭既幾百蚊

去到現在幾千咁每日幫黑仔賺錢

當然亦都有輸錢,可能係十日輸兩日咁啦





氣勢如虹

黑仔早就將當初投資既八萬蚊收返

賺返來既錢就由佢賺落去

黑仔都無改變到

每日都好努力咁推銷

黑仔有目標,黑仔要買樓

黃俊最後幫黑仔賺到第一個桶金





黑仔唔再黑啦,黑仔變左唔黑仔

係零二年,同屋企人商量好之後

係當時平均呎價四千蚊,係畢架山花園買左一個單位自住

供得辛苦,但黑仔供得開心

爸爸媽媽既笑容亦都多左

第一桶金用左來比首期

黑仔無再主動搵黃俊投資

因為黑仔目標已經達到,就係買左樓





而黃俊就一路玩落去,上星期又買左隻陀飛輪



零三年快到了

你地仲記得嗎?


SARS


二零零三年





沙士

車行生意大跌九成

老闆馬上炒人,炒淨黑仔

黑仔帶住口罩,係車行百無了賴

黃俊同老闆叫左黑仔入房

『黑仔,間車行我做唔到落去啦,對唔住,呢到係你今期糧同埋一個月通知金』

『死喇咁我點供樓呀』黑仔腳都震埋

黃俊拉左黑仔出門口

『黑仔,多我就無喇,呢到有五萬蚊,我住比你先啦..我玩金都輸到仆晒街』

黑仔發現黃俊手上既江斯丹頓唔見左,變左隻勞力士

好彩lamborghini diablo仲係到

黑仔有儲蓄,無收到黃俊既五萬蚊

黑仔成副身家都有十萬蚊

都夠頂兩,三個月

黑仔覺得沙士好快會過

老闆亦都會東山再起

佢當時唔知道黃俊一家除左炒金,仲有炒股票

黃俊老豆走唔切

輸左八位數字

好在黃俊一家都仲算有個錢,起碼都仲有兩間物業

但係沙士期間

你肯買,都要有人肯買

大家都一值等,等沙士走

每個人都相信,沙士一走

所有事就會好

黑仔係屋企開左個icq

舊同學互相問近況,有無事

黑仔係舊同學口中得知一個消息


『李嘉欣入左隔離病房』



『喂..呀俊』

『黑仔呀?我係超級市場搶緊板藍根同醋呀..做咩事呀講啦?』

『李嘉欣入左隔離病房』

『真係架?抵撚個臭西死啦,點呀?死撚左未呀?』

『未呀..好似未』

『喂呀姐你行撚開啦,我拎先架,搶乜撚野呀你..喂黑仔你係講呢d野咋?』

『係呀..』

『...』

『...』

『那黑仔,我知你諗咩架,唔撚洗同情佢架』

『.....我知呀』

『你咪撚去睇佢呀,醫院好多菌架』

『知道啦』

『喂唔同你講喇,我比個肥師奶搶撚左支醋,我要去刮佢呀,唔講喇』

黑仔換衫出門口

黑仔好擔心,黑仔擔心李嘉欣會唔會有事

咁多年後,黑仔都仲未搵到第二個可以令佢心動既女仔

黑仔仲好愛李嘉欣

黑仔忘記左受過既教訓

忘記左勞教中心既日子

黑仔搭的士去到醫院

好亂,急症室好多人

好多人訓係流動病床,好多人嘔,好多人大叫話好暈

黑仔講出李嘉欣既名,依住指示去搵李嘉欣既病房

黑仔係門外等左一個鐘頭

黃俊打比黑仔

黑仔清楚,黃俊一定會係叫我唔好去睇李嘉欣

黑仔無聽電話

黑仔依住醫護人員指示換上全套防護衣物

來到李嘉欣既病房

黑仔唔可以入去,只可以隔住塊玻璃望入去

李嘉欣插左好多喉係個身到

黑仔好心痛

李嘉欣望住黑仔

李嘉欣無任何表情,只係望住黑仔,不停咁流淚

好似係叫黑仔救佢一樣

黑仔無流淚,微笑住望實李嘉欣

黑仔笑,黑仔笑自己點解無能力,點解唔可以幫李嘉欣擋住傷害佢既病菌

黑仔心入面好多問題,醫唔醫得返好呢?點解無人係你身邊支持你呢?你既家人呢

呢幾年你過成點?比我扑穿個頭既男人呢?去左邊

有兩個醫護人員拍一拍黑仔

『夠鐘啦』

『嗯,唔該..係呀我想問下李嘉欣會唔會醫得返好?』

『係有一種新既藥物研制到出來,但照李小姐現在既情況...你知唔知仲有無人要來見下佢?』

黑仔明白,黑仔只係望住李嘉欣

黑仔想盡量記得李嘉欣個樣

一個愛左咁多年既女人

『係呀,夠鐘啦,出返去換衫,記得洗手,返屋企換完衫即刻放入洗衣機』

『知道..唔該晒』

黑仔換好衫,準備搭電梯落地下

係電梯口,黑仔終於忍住流淚,黑仔不停咁抹,強裝一副堅強既樣子

醫護人員追過來

『係喇先生,我要同你登記返』

叮,電梯到了

『先生,同你登記返先,你叫咩名?係病人既邊位』

黑仔無心情答佢問題,按關門制

醫護人員用手擋住電梯門

『先生?』

『...』



『我叫黑林頓,佢係我女朋友』

黑仔成晚都訓唔到

等到第二朝

黑仔就出發去醫院

黑仔走左去買橙,黑仔先醒起拎唔到入去比李嘉欣

黑仔好亂

黑仔只係想見到李嘉欣

去到醫院換好保護衣物

黑仔係玻璃窗見到李嘉欣面色好差

黑仔好擔心

『請各醫護人員盡快到急症室,有七個病人需要急救』

所有醫護人員都跑晒落去

黑仔見到所有人走晒

黑仔試下開門

黑仔入左去

黑仔坐係李嘉欣床邊

李嘉欣醒左望住黑仔

『黑仔..』

『唔好出聲』

『黑仔呀..對唔住呀』

『得啦,唔好出聲』

黑仔拖住李嘉欣隻手,黑仔終於拖到李嘉欣隻手

『點解,點解我每次想拖你隻手,都會發生事』

『對唔住呀..』

黑仔想同李嘉欣閒話家常下

黑仔想講下發生過既事比李嘉欣聽,黑仔又想報喜不報憂

黑仔最尾都無出過一句聲

因為黑仔都無發生過喜事

李嘉欣訓著左

黑仔依然拖住佢隻手

突然間,有部機器係到響

黑仔即刻禁鐘,係間房都大聲叫醫生

黑仔唔肯鬆手,依然拖住李嘉欣

黑仔叫到力竭聲嘶都無人理

李嘉欣開始呼吸唔到,個人係咁震

黑仔嚇到咩都做唔到,只係爬上床好用力咁抱住李嘉欣

直至到機器長響

然後唔響

醫護人員衝入來拉黑仔出去

馬上同李嘉欣做急救

十五分鐘後醫生出返來

黑仔坐係地下到

醫生望住黑仔,黑仔望住醫生

醫生同黑仔一齊坐係地下

相對無言

大約坐左十分鐘到

醫生買左兩支飲品返來

『請你飲』

然後醫生就走左

係一支橙汁

黑仔記得第一次飲橙汁係謝師宴,係果一日,佢見過最靚既李嘉欣

今次係第二次飲





只要可抱緊你等那天到來

總算好過這個壞時代

當世間要審判

請你跑過來

就陪著我

在默哀



今天開始那個都不愛

http://www.youtube.com/watch?v=PVNSbos_M5k