我突然間多咗個妹: 我與妹的日常?(上)

坦白講吖，多咗個妹，好似仲開心過有女朋友咁(雖然我咁大個仔都未拍過拖，每次都食檸檬)
過咗大概半個月，我同Priscilla就好似親兄妹咁，越嚟越親密，有咩事第一時間一定係同對方講，Whatsapp呀Snapchat呀一定係佢喺最頂。
而因為考試嘅關係，hip hop班都暫停咗。

呀，終於放飯。
「妹，溫書未呀?就考試喇喎，你知你成績嘛嘛架啦。」
「嗯...都話喺學校唔准咁叫我咯!」
「我知喇，你係傲嬌，呵呵呵。呀妹，呀妹!!!」
「咦，唔想同你講嘢呀，乞人憎!」
「哦，有人怕醜喇~~~唉好喇唔玩，Priscilla，你如果有咩唔識我可以教你。」


「真架?教我跳上堂Missy教嗰啲舞。」
「唔係講緊跳舞呀，溫書呀我講緊，傻妹。」我將自己個額頭貼咗喺佢個額頭到，鼻掂住個鼻，再摸下佢個頭。個動作係好奇怪，不過因為細個嗰陣家姐都係咁對我做，所以我又照版煮碗。
「你...你...你做咩呀....呀信?」嘩Priscilla竟然面紅，不得了，佢真係好可愛，可愛到我好有衝動想攬住佢。當然我冇咁做啦，因為呢個時候已經俾Toby同其他同學見到，心知不妙嘅我想極速逃離現場嘅時候俾Toby捉咗埋一邊。
「嘩你真係大膽，啱啱發生完啲咁嘅事你就咁進取?」
「吓?你講咩呀?咩事呀?我唔明喎?」
Beverly都走埋嚟睇下發生咩事「Vincent，你...你哋...係咪...」
「喂喂喂，咪住先，你哋係咪搞錯咗啲咩呀?Toby，我同你講過架喎，我同Priscilla...你明啦，我費事咁大聲講出嚟喇。更何況，Priscilla唔係已經有男朋友喇咩?你自己講革，唔好成日覺得我溝女先得革。」我只見Beverly露出咗個疑似安心嘅笑容，Toby一臉驚訝，呢兩個奇怪嘅表情令我感到愕然。「呀信，原來你講真架...Priscilla真係做咗你呀妹呀?嘩你正啦，有個咁可愛嘅呀妹。」
「頂你唔好咁大聲啦，我唔想俾人知呀。」
「超，咁你啱啱又同人哄咁埋?」
「關你咩事呀>.<係喎Beverly，Priscilla呢?」


「佢好似同佢啲朋友去食飯呀。」
「哦係喎，見到佢喇，喺出面。」但係點解佢嗰兩個朋友好似怒睥我咁嘅?
「Beverly呀，咁不如我哋一齊食啦。」
「吓...呀，我都想呀Vincent，不...不過我帶咗飯喇...」
「哈傻仔，又食檸檬呀呀信?」
「咩呀，聽唔聽到人哋話想同我食架，我知你葡萄我啫，我唔怪你。」
唔知點解，Beverly又露出咗啱啱嘅笑容。不過我冇理過，同Toby去咗食飯。