《三角•誌》: 2.1 分手

(2)
個晚之後，半年以嚟我都好似冇再同將軍咁樣飲酒傾心事。直到有一日，Cherry打俾我。

「阿郎，我同將軍分咗手。」
「吓！幾時嘅事？咦？點解你又會打俾我？」
「大概三個月前，有次將軍又飲醉，當晚我照顧咗佢成晚，成晚將軍都係度大吵大鬧，仲打咗俾Ashley，講咗一大堆咩好愛佢個啲就訓著咗。過咗個月，有日佢打嚟話好對我唔住，然後就話分手啦。」
「其實你同我都明白，你兩個分手係遲早嘅事⋯⋯」
「嗯，其實都成三四年，我點會唔明白。今次打嚟唔係搵你訴苦，而係我好擔心將軍嘅情況。」
「發生咗咩事？」
「將軍佢要同Ashley結婚，仲要帶球結⋯⋯」




「唔係掛？Ash竟然會俾將軍掂？仲同佢結婚？」
「大家都心知肚明我哋三個人嘅關係，所以我好擔心Ashley其實有啲嘢瞞著將軍。」
「等我搵日約將軍出嚟傾下，你都唔好咁執著將軍呢個人，放生自己啦。」

收線一刻，唔洗我搵，將軍已經打過嚟。